BOLAJON!

Tili shirin, asal, qand,

Dili dilimga payvand.

El ichra qaddim baland,

Yashayman eng davlatmand –

Qalbda ardogʻim mening!

Ey, nasli Sohibqiron,

Seniki Yer-u Osmon.

Mustaqillik mangu shon –

Boshingda ERK soyabon –

Suyangan togʻim mening!

Sen Vatanning erkasi

Va millatning ertasi.

Tinchlikning xaritasin

Tuzguvchi farishtasi –

Alpdil siyogʻim mening!

Yurtda oltin qoida –

Muqaddasdir Oila.

– Ber, – deb,  – Tangri taolo,

Vatanga sogʻlom Bola –

Mangu soʻrogʻim mening!

Tonglarda ajib viqor,

Har hovli, uyda viqor.

Yillar oʻtsa-da takror,

Bu yurtdan ketmas bahor –

Mevazor bogʻim mening!

Bogʻbonim – Onajonim,

Vatan, degan tugʻyonim.

Allalari irfonim –

Buyuk Oʻzbekistonim –

Oʻchmas chirogʻim mening!

Bobolar yoqqan chiroq,

Nur sochar! Qarang, porloq!

Qadami dadil, chaqmoq –

Jaloliddin yo Shiroq

Yangligʻ urpogʻim mening!

Yayrab ulgʻay, Bolajon,

Amringda YuRT – jonajon.

Barcha millat bir tan-jon,

«Bolam!» – deb evrilgan on –

Gullar har yogʻim mening!

Bir kun kuchga toʻlasan,

Marrani keng olasan.

Yo olim, fuzalo – sen

Balki podshoh boʻlasan –

Ilmi bayrogʻim mening!

Robiya YOʻLDOShEVA.

(Foto - OʻzA)