EL DILIDA NOMI AZIZ AZIMBOY

Azimboy Xoʻjaqov. Nigohlari teran, istarali, qaddi-qomati kelishgan bu yigitni nafaqat oʻzi tugʻilib-oʻsgan "Tosh qalʼa” mahallasi ahli, balki tumanimizda koʻpchilik yaxshi tanirdi. Tabiatan soddadil, atrofidagilarga mehribon va ochiqkoʻngil boʻlgan Azimboy oʻquvchilik paytidayoq ustozlarining nazariga tushgan, barcha fanlarni hayron qolarli darajada tez va puxta oʻzlashtirar, maktabda faqat "aʼlo” baholarga oʻqirdi.

Ovuldagi 34-sonli maktabni muvaffaqiyatli tugatgan Azimboy Xoʻjaqov Berdaq nomidagi Qoraqalpoq davlat Universitetining iqtisod fakultetiga oʻqishga kirdi. Universitet tahsili davrida oʻzining epchilligi, qatʼiyatliligi, chet tillarni oʻzlashtirishdagi alohida qobiliyati bilan ajralib turgan Azimboy Universitet bitiruvchilari taqsimot komissiyasi tavsiyasi bilan tuman ichki ishlar boʻlimiga ishga joylashdi.

U dastlab Qilichboy ovul fuqarolar yigʻini militsiya tayanch punktida voyaga yetmaganlar bilan ishlash boʻyicha nozir sifatida oʻz ish faoliyatini boshladi.

– "Bilimimni oshirishim kerak”, – deb kun-u tun qoʻlidan kitob tushmasdi, – eslaydi Azimboyning akasi, "Toshqalʼa” MFY masʼul kotibi Safarboy aka Xoʻjaqov. – Oliy maʼlumot olding-ku, – derdim hayron boʻlib.

– Aka, yana oʻqiyman, huquqshunoslik yoʻnalishi boʻyicha, –derdi u qatʼiyat bilan.

Azimboy Xoʻjaqov oʻqib-izlanishdan charchamaydigan yigit edi. U bir vaqtning oʻzida "Namuna” MFY profilaktika noziri vazifasi-da ishlab yurib, QDUning huquqshunoslik fakulteti sirtqi boʻlimini muvaffaqiyatli tugatdi. Baxtli oila sohibi boʻldi. Umr yoʻldoshi Nazokatxon bilan ota-onalik baxtiga yetishdi. El-yurt, kasbdoshlari orasida hurmat-eʼtibor qozondi. Lekin... Hayotning inson xohish-irodasiga boʻysunmaydigan beshafqat qonuni oldida barcha ojiz...

Oʻsha kuni xizmat vazifasini ado etayotgan Azimboy Xoʻjaqovning yoʻl chetida turgan mashinasiga yoshlarning "toʻy sayli” ("gulyanka”) deb atalmish marosimida ishtirok etayotgan boshqa bir mashina kelib urildi...

2003-yilning 3 oktyabr kuni ogʻir ahvolda shifoxonaga tushgan el-yurt osoyishtaligi posboni Azimboy Xoʻjaqov oʻn besh kun davomida oʻlim bilan olishib, 30 yoshida hayotdan koʻz yumdi.

Olti nafar Alpomish oʻgʻlon va bir qizni kamolga yetkazgan onaizor Norgul momo "Bolam!” deb boʻzlaganida butun Qilichboy ahli ayriliqdan zir titradi. Endigina tili chiqayotgan oʻgʻli Davronbek dadasini  izlab-izlab topolmagach, amaki-yu bobolariga bagʻir bosdi. Dadasiday alpqomat boʻlib ulgʻaydi. 14-yildirki, Azimboyning xotirasini qalb koʻshkida eʼzozlab yashayotgan rafiqasi Nazokat, Azimboyni yaxshi koʻradigan el-elat, uning  kasbdoshlari-yu, oshna, yor-doʻstlari har gal Xotira va qadrlash kunida Xoʻjaqovlar xonadoniga kelishib, Azimboy Xoʻjaqovning qisqagina umri davomida el-yurt osoyishtaligi, farovonligi yoʻlida qilgan ezgu ishlarini yodga oladilar.

Kimdir hayotda 80-100-yil umr koʻradi. Lekin u dunyodan oʻtganidan soʻng atrofidagilar juda tez unutib yuboradi. Chunki bundaylar oʻz qobigʻiga oʻralgan, oʻz "men”idan narini koʻrolmaydigan insonlardir. Biroq shunday insonlar borki, xuddi bir chaqmoq umrichalik hayot kechirsa-da, uning nomi hamisha el-yurt qalbida aziz, tillaridan tushmaydi. Azimboy Xoʻjaqov ana shunday – ismi ham, ezgu ishlari ham el-yurt yuragiga oʻchmas nur kabi yozilgan osoyishtalik posboni edi.

Robiya YOʻLDOShEVA.