FUQAROLARNING OʻZINI OʻZI BOShQARISh ORGANLARI FAOLIYaTINI YaNADA TAKOMILLAShTIRISh YOʻLIDA

Prezidentimizning joriy yil 3 fevraldagi "Mahalla institutini yanada takomillashtirish chora-tadbirlari toʻgʻrisida”gi Farmoni mahallaning joylardagi dolzarb masalalarni samarali hal qilishdagi rolini oshirish, uyushmaga birlashish huquqlarini roʻyobga chiqarish, moddiy-texnika bazasini mustahkamlash hamda davlat va jamoat tashkilotlari bilan oʻzaro hamkorligini yanada rivojlantirishga qaratilgan chora-tadbirlarni belgilab berdi. Shuningdek, mazkur Farmon bilan Fuqarolarning oʻzini oʻzi boshqarish organlari faoliyatini yanada takomillashtirishga doir kompleks chora-tadbirlar Dasturi tasdiqlandi.

Farmon asosida fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman va shaharlarda taʼsis konferentsiyalari oʻtkazilishi belgilangan edi.

Shu maqsadda yaqinda Fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman kengashining taʼsis konferentsiyasi boʻlib oʻtdi. Unda tumandagi mavjud 47 ta fuqarolar yigʻinlarining raislari, diniy maʼrifat va maʼnaviy-axloqiy tarbiya masalalari boʻyicha maslahatchilari qatnashdilar.

Konferentsiyada fuqarolarning oʻzini oʻzi boshqarish organlari faoliyatini muvofiqlashtirish boʻyicha Qoraqalpogʻiston Respublikasi Kengashi aʼzosi, Qoraqalpogʻiston Respublikasi Vazirlar Kengashi Raisining oʻrinbosari, Respublika Xotin-qizlar qoʻmitasi raisi Zuhra Ibragimova,  tuman hokimi Sultonboy Yoʻldashev, "Mahalla” xayriya jamoat fondi Qoraqalpogʻiston Respublikasi boʻlimi raisining oʻrinbosari Ajiniyoz Mnajov ishtirok etdi.

Konferentsiyada tuman hokimi Sultonboy Yoʻldashev soʻzga chiqib, muhtaram Prezidentimizning yuqorida qayd etilgan Farmonining mazmun-mohiyatiga toʻxtalib oʻtdi va mahalla institutini yanada takomillashtirish, ularni joylarda xalqning chinakam maslakdoshi va koʻmakdoshiga aylantirish zarurligi toʻgʻrisida gapirdi.

Yigʻilishda dastlab Fuqarolarning oʻzini oʻzi boshqarish organlari faoliyatini muvofiqlashtirish boʻyicha Amudaryo tumani kengashini tuzish va aʼzolarini tasdiqlash masalasi muhokama qilindi. Mazkur Kengashni tuzish hamda 39 kishidan iborat tarkibda kengash aʼzolarini tasdiqlash taklifi muhokama qilinib, bir ovozdan maʼqullandi.

Soʻngra, Fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman kengashi Namunaviy nizomi loyihasi, Kengash ijro apparatining tashkiliy tuzilmasi muhokama qilinib, tasdiqlandi.

Konferentsiyada tuman hokimi Sultonboy Yoʻldashev Fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman kengashining raisi lavozimiga tasdiqlandi. Shuningdek, Kengash raisining birinchi oʻrinbosari lavozimiga Ashirbay Qoʻshayev, yoshlar ishlari boʻyicha oʻrinbosari lavozimiga Mansur Oʻrazbayev, diniy-maʼrifiy masalalar boʻyicha oʻrinbosari lavozimiga Muqaddas Beknazarova, keksalar va faxriylar ishlari boʻyicha oʻrinbosari lavozimiga Rim Oʻrazbayev, Kengash kotibi – tuman Kengashi ijro apparatidagi tashkiliy-uslubiy guruh bosh mutaxassisi lavozimiga Otabek Ibragimovlarning nomzodlari taklif qilinib, bir ovozdan tasdiqlandi.

Konferentsiyada shuningdek, Fuqarolarning oʻzini oʻzi boshqarish organlari faoliyatini muvofiqlashtirish boʻyicha Respublika Kengashi taʼsis Konferentsiyasida ishtirok etish uchun ishonchli vakil belgilanib, Qoraqalpogʻiston Respublikasi kengashining tashkiliy yigʻilishiga 8 nafar  delegatlar saylandi.

Tadbir yakunida kun tartibidagi barcha masalalar boʻyicha tegishli qarorlar qabul qilindi. Oʻylaymizki, yangi tashkil etilgan fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman Kengashi Yurtboshimiz taʼbiri bilan aytganda, mahalla  institutini "adolat tarozisi”ga aylantirishdek sharafli ishlarda masʼuliyat bilan ish olib boradi va jamiyat farovonligi, yurtimiz taraqqiyotiga xizmat qiladi.