NAVROʻZ SAYLI

(Chorlov)

Kel, hey, davraga kel, turlandi olam,

Tabiat zoʻr naqqosh – tutdi moʻyqalam.

Kamalak ranglarin ichganda dalam,

Abri nayson undi, undi gul, lolam –

Koʻrdingmi, Vatanga iforin sochib,

Yana Navroʻz keldi quchogʻin ochib!

Anov shudgorlarda ajib harorat,

Har zarra tuproqda ming bir sinoat.

Dillarga baxsh etib fayz-u tarovat,

Hamalga bosh qoʻyib undi ziroat –

Iliq nafaslardan toʻlgʻonib, koʻpchib,

Ona Yer uygʻondi Quyoshni quchib!

Xivchin otga mingan bolakayni koʻr,

Alpomishga mengzar, yurak toʻla qoʻr.

Ismini soʻrsang gar yo Amir Temur,

Yoki Jaloliddin siyoqli yovqur –

Koʻksida yurt ishqi lovullab, tepchib,

Chavandozlar keldi davraga koʻchib!

Jahoniy iforni sezdingmi, oh, oh!

Sumalak saylidan yulduzlar ogoh.

Koʻngillar mayliga oqshomlar panoh,

Muhabbat fasliga oshno koʻkda moh –

Koʻngillar koʻngildan mehri-ob ichib,

Qadrdonlar keldi bir-birin quchib!

Mardlik maydonidir yam-yashil oʻtloq,

Qizib borayotir  koʻpkari, uloq.

Sabolar bazmiga tutgancha quloq –

Shamoldan oʻzdi oʻh! Anov argʻumoq –

Oʻzbaki shaʼn, deya oromdan kechib,

Mardi-yorlar keldi toʻshini ochib!

Bunchalar yoqimli oriyat bahsi,

Alplarni chorlagan alplarning bahsi.

Xalqimga joʻmardlik irsiyat asli.

Asl  joʻmardlarning halol har lafzi –

Halollik  lavhidan ketmaydi oʻchib

Mardlar maydon kirar oʻzidan kechib!

Dalalar tomonda mehnat ayyomi,

Ezgu niyatlarning yoʻqdir poyoni.

Gullamoq faslida yurtning har yoni,

Taʼrifga sigʻmaydi Navroʻz bayoni –

In qurgan ayvoni tomon ichikib,

Qaldirgʻochlar qaytdi uy gʻamin chekib.

Kel, hey, davraga kel, bahor bazmiga,

Xushxonlar kuy bitdi gullar bazmiga.

Samolarni quchgan hislar azmiga,

Ahli shuaroning har bayt – nazmiga –

Oʻzbekiston uzra quchogʻin ochib,

Navroʻz chechaklarin yubordi sochib!

Robiya YOʻLDOShEVA.