Jayxun ilhomlari

Vatan posbonlariga

Xalqim, deb talpinib turguvchi Oʻgʻlon,

El-u yurt dardiga darmon boʻladi.

Koʻksini toʻldirib qudratli tugʻyon,

Vatan tinchligiga qalqon boʻladi!

Shu qalqon bor uchun oʻttiz millionli

Ahli Oʻzbekiston osuda, xurram.

Bir yuz oʻttiz millat serquyosh hovli –

Oʻn ming mahallada yashaydi birdam!

Shu qalqon bor uchun beshigin quchgan,

Onalar yuragi baxtga musharraf.

Dalalar tomonda rizqqa yoʻl ochgan

Fasllar taftida oʻzbaki sharaf!

Shu qalqon bor uchun yurt tongi oppoq,

Goʻdaklar koʻzida baxtning rangi bor.

Har dilda bir orzu – kelgusi porloq

Yuraklarda ERKning xush jarangi bor!

Koʻrdingizmi, oʻzbek oʻgʻlonlarini,

Temuriy kelbatli! Zakovatli, mard.

Asrab ona Vatan qoʻrgʻonlarini,

Xalqin kiprigiga qoʻndirmaydi gard!

Har biri yurtim, deb jon bermoqqa shay,

Boʻlsa, oriyatga maydon boʻladi.

Alpomish siyoqli bobolariday,

Yovuzlikka qarshi paykon boʻladi!

Ana, postda turar zabardast Oʻgʻlon,

Askarlik – yigitga armon boʻladi!

Onajonim mening! Hur Oʻzbekiston,

Solih Oʻgʻlonlaring posbon boʻladi!

Ming tashakkur Vatan, posbonlaringga

Ular bor, yurt buyuk arkon boʻladi.

Gard yuqmagay zamin, osmonlaringga

Har oʻgʻling TINChLIKka sarbon boʻladi!

Robiya YOʻLDOShEVA.