MAQSAD – TAʼLIM SAMARADORLIGINI OShIRISh

Bizning oʻquv muassasamiz ingliz tili, matematika va ona tili fanlarini chuqur oʻrgatishga ixtisoslashtirilgan davlat umumtaʼlim maktabi boʻlib, maktabning ingliz tili, matematika va ona tili fanlarini chuqur oʻrgatishga ixtisoslashtirilgan sinflariga oʻquvchilar 2-sinfdan boshlab maxsus test sinovlari asosida oʻqishga qabul qilinadi. Maktabning barcha sinflarida dars mashgʻulotlari axborot-kommunikatsiya texnologiyalaridan unumli foydalangan holda oʻtilmoqda. Barcha sinf xonalari zamonaviy televizorlar va noutbuklar bilan taʼminlangan boʻlib, dars mashgʻulotlari elektron darsliklar va elektron slaydlar  orqali oʻtkazilmoqda, bu esa oʻquvchilarning kafolatli taʼlim-tarbiya olishlarini taʼminlamoqda. Jumladan, oʻtgan 2015-2016 oʻqish yilida maktabning 14 nafar oʻquvchisi "Bilimlar bellashuvi”ning tuman bosqichida faxrli 1-oʻrinni egallab, Qoraqalpogʻiston Respublikasi bosqichida qatnashish huquqini qoʻlga kiritishib, unda ham faol ishtirok qildilar. "Bilimlar bellashuvi”ning Qoraqalpogʻiston Respublikasi bosqichida  faxrli 1-oʻrinni egallagan bir nafar oʻquvchimiz Oʻzbekiston Respublikasi bosqichida ham faol ishtirok qilib, mukofot bilan taqdirlandi. Fan olimpiadasining tuman bosqichida maktabimizning 5 nafar oʻquvchisi faxrli 1-oʻrinni qoʻlga kiritishdi. Ulardan biri esa Qoraqalpogʻiston Respublikasida faxrli 1-oʻrinni qoʻlga kiritdi. Shuningdek, maktabimiz oʻquvchilari "Umid nihollari”, "Yoz – 2016”sport musobaqalarida ham nafaqat tuman miqyosida, balki, Qoraqalpogʻiston Respublikasida ham faxrli oʻrinlarni egallab kelmoqdalar. Maktabimizning stol tennisi bilan shugʻullanuvchi jamoasi Respublikada eng kuchli jamoa sifatida tan olinib kelinmoqda.

Jamoamizning hamkorlikda olib borgan ishlarining natijasini "Bilimlar bellashuvi”, "Fan olimpiadasi” tadbirlarining Qoraqalpogʻiston Respublikasi bosqichida faxrli 1-oʻrinni egallagan tuman oʻquvchilarining yarmini maktabimiz oʻquvchilari tashkil qilganligida koʻrish mumkin.

Maktabimizda taʼlim samaradorligini oshirish yuzasidan olib borilayotgan ishlar Qoraqalpogʻiston Respublikasi Xalq taʼlimi vazirligi tizimidagi umumiy oʻrta taʼlim maktablarining taʼlim sifati parametr koʻrsatkichlari boʻyicha reytingida ham  oʻz aksini topgan boʻlib, mazkur reyting parametri boʻyicha maktab tumanda 1-oʻringa, Qoraqalpogʻiston Respublikasidagi mavjud 700 dan ortiq maktablar orasida 7-oʻringa loyiq deb topildi.

Men fursatdan foydalanib, tumanimizning barcha taʼlim muassasalarida mehnat qilayotgan hamkasblarimizni, ustoz va murabbiylarimizni hayotimizga kirib kelgan yangi yil bilan chin koʻnglimdan muborakbod qilaman va ularning yosh avlodga taʼlim-tarbiya berishdek sharafli ishlarida katta muvaffaqiyatlar yor boʻlishini tilayman.

Shuhrat JUMANIYoZOV,

16-sonli ixtisoslashtirilgan davlat umumtaʼlim maktabi direktori.