Savol bering – javob qaytaramiz

Savol: – Baʼzan tumanimizning olis hududlariga ijodiy safarlarga borganimizda fuqarolar elektr energiyasidagi uzilishlardan shikoyat qilishadi. Elektr energiyasini grafik asosida oʻchirish tartibi qonuniymi?

Javob: – Oʻzbekiston Respublikasining "Elektr energetikasi toʻgʻrisida”gi Qonunining 23-moddasiga koʻra:

Avariya rejimini bartaraf etishda tizim operatori yagona elektr energetikasi tizimida mavjud boʻlgan barcha zaxira quvvatlarni jalb etish, shuningdek elektr energiyasi isteʼmoliga cheklovlar joriy etish huquqiga ega.

Tizimda quvvat tanqisligi boʻlganda, issiqlik elektr stantsiyalarining  ayrim bloklari vaqtincha ishdan chiqqan vaqtlarda, katta magistral liniyalarda avariya holatlari roʻy bergan vaqtlarda, tizimning bir meʼyorda ishlashini taʼminlash uchun isteʼmolga cheklovlar kiritiladi.

Bundan tashqari energiya sohasida elektr quvvati tanqisligi, elektr energiyasi quvvati yuklamasi ortganligi (peregruzka) oqibatida sutkaning ertalabki maksimum (06:00-09:00), va kechqurungi maksimum (18:00-22:00) vaqtlari oraligʻida cheklashlar amalga oshiriladi. Bundan ijtimoiy hamda strategik ahamiyatga ega obʼektlar mustasnodir.

Keyingi vaqtlarda tumanimizda sugʻorish ishlari asosan elektrlashgan nasos stantsiyalari orqali amalga oshirilib, bu ham elektr energiyasi isteʼmoli oshishiga olib kelmoqda.

Savol: – Yaqinlashib kelayotgan qish mavsumida tumanimiz aholisini uzluksiz elektr energiyasi bilan taʼminlash uchun qanday chora-tadbirlar koʻrildi?

Javob: – Rejaga asosan 10 kV havo tarmoqlarining 29,1 kilometri kapital taʼmirlandi, liniyalar daraxtlardan tozalandi. Qiyshaygan tayanchlar toʻgʻrilandi, atrofi daraxtlardan tozalandi. 0,4 kV havo tarmoqlarida 34,2 km. uzunlikda kapital taʼmirlash ishlari bajarildi, 31 dona transformator taʼmirlandi, eskirgan ehtiyot qismlari yangisiga almashtirildi.

14 ta quvvati 1115 kVa boʻlgan transformator punktlarida transformatorlarning shitlari boʻyaldi, ehtiyot qismlari va ichki jihozlari yangisiga almashtirilib, atroflari yovvoyi oʻtlardan tozalandi.

Savollarga "KKXETK” AJ Amudaryo TETK boshligʻi A.YOʻLDOShEV javob berdi.