SAYLOVChILAR XURSAND BOʻLIShDI

Mamlakatimizda Oʻzbekiston Respublikasi Prezidenti saylovi oʻtkaziladigan kun – 4-dekabr tongi barcha joydagi kabi Amudaryo tumanida ham zoʻr shodiyonalar bilan qarshi olindi. Barcha saylov uchastkalari erta tongdanoq istiqbolga intilgan kishilar – ertangi tinchligimizni, nurafshon hayotimizni taʼminlashga qodir boʻlgan nomzodni Prezidentlikka saylashni niyat qilgan saylovchilar bilan gavjum boʻldi.

Biz erta tongda Mangʻit shahrining "Boyovul” mahallasida joylashgan 80-sonli saylov uchastkasiga yetib kelganimizda bu yerda saylov jarayoni qizgʻin tus olayotganining guvohi boʻldik.

– Saylov uchastkamizda 2400 dan ziyod saylovchi roʻyxatga olingan, – dedi uchastka saylov komissiyasi raisi Shuhrat Jumaniyozov bizni komissiya faoliyati bilan tanishtirar ekan. – Shundan 79 nafari birinchi marta saylovda ovoz beradigan yoshlar hisoblanadi. 28 nafar saylovchimizning bu yerga kelib, ovoz berish imkoniyatlari yoʻq. Shu sababdan ham biz ularga saylovda ishtirok etishlari uchun imkoniyat yaratib berish maqsadida, saylov  qutilari bilan ularning yashash joylariga tashrif buyurayapmiz. Oʻzlaringiz guvohi boʻlayotganiningdek, saylovchilarimiz bu saylovda faol ishtirok etayaptilar. Ularning kayfiyatlari juda yaxshi.

– Bu galgi saylovning oʻzgachaligi saylovchilarning har qachongidan ham ogʻizbirchilik bilan faol harakat qilishayotganligida yaqqol koʻrinib  turibdi, – deydi 82 yoshli onaxon – saylovchi Valentina Kuznetsova. – Men ham saylovga erta tongda kelib, eldoshlarim qatori oʻzim munosib deb hisoblagan nomzodga ovoz berdim. Biz ertangi kunimizning, yoshlarimiz kelajagining porloq boʻlishini istaymiz.

– Biz bemor saylovchi Qizlargul Jumaniyozova yashayotgan xonadonga tashrif buyurganimizda bu saylovchi ayolning quvonchi ichiga sigʻmay ketdi, – deydi uchastka saylov komissiyasi raisi oʻrinbosari Bozorboy Xolimbetov. – Keyin u: "Men betobligim sababli bu  galgi saylovda ishtirok qila olmasam kerak, deb umidsizlikka tushgandim. Ammo uchastka saylov  komissiyasi xodimlari – Siz saylov qutisini  uyimga olib kelib, mening Oʻzbekiston Respublikasi Prezidentligiga nomzod uchun ovoz berishimga sharoit yaratib berdingiz. Men bundan benihoya xursand boʻldim”, deya minnatdorchilik bildirdi.

Saylov jarayonida saylov uchastkasida faol saylovchilarni taqdirlash marosimlari ham oʻtkazildi.

80-sonli uchastka saylov komissiyasi tomonidan saylovda birinchi marta ishtirok etayotgan 3 nafar yosh saylovchiga, 10 nafar faol saylovchiga  qimmatbaho sovgʻalar topishirildi. 10 nafar saylovchi ayol-qizlarga tuman hokimligi tomonidan tayyorlangan guldastalar va 5 nafar yosh saylovchiga badiiy kitoblar sovgʻa qilindi.

Allambergan JUMANIYoZOV,

"Taraqqiyot koʻzgusi” gazetasi muxbiri.

(Foto - OʻzA)