OILAM – FAXRIM
Oila - muqadas. Oilada tinchlik, osoyishtalik hukm sursa, oila aʼzolari bir-birlariga mehr-oqibatli boʻlsagina chinakam mustahkam oila boʻla oladi. "Bir kun janjal chiqqan uydan qirq kun baraka qochadi”, deganlaridek, oilada kelishmovchilik, urush-janjal boʻlaversa, bunday oilada hech qachon baraka boʻlmaydi. Oila aʼzolarining bir-biriga boʻlgan hurmati, shirin muomalasi oilani yanada mustahkamlaydi.
Bizning oila unchalik katta boʻlmasa-da, hech ikkilanmasdan aytishim mumkinki, oilamiz mehrdan bunyod boʻlgan. Dadam, oyim, ikkita akam va men. Bizning oila mustahkam va sogʻlom oila deya olaman. Chunki har doim biz birgamiz. Birgalikda turli xil yumushlarni bajaramiz, sport bilan shugʻullanamiz. Dadam boʻsh vaqtlarida biz bilan shaxmat oʻynaydilar va shaxmat oʻyinining sir-sinoatlarini oʻyin paytlarida bizga tushuntirib oʻtadilar. Oyim esa boʻsh vaqtlarida uy yumushlari bilan mashgʻul boʻladi. Uy yumushlarini tugatgach, menga tikuvchilik bilan birga toʻquvchilikni ham oʻrgatadilar. Kichkina paytlarimizda oyim bizga turli xil oʻyinchoqlar tikib berardi. U maktabda oʻqituvchi boʻlib ishlaydi. Maktabdan charchab qaytsalarda bizlar uchun albatta vaqt topib darslarimizni tekshiradi.
Katta akam Sanjarbek Toʻliboev Ajiniyoz nomidagi Nukus Davlat pedagogika instituti 3-bosqich talabasi. Akam kichkina paytlaridayoq rus tili faniga juda qiziqqanligi bois, fanlar olimpiadasida rus tili fanidan maktab bosqichida 1-oʻrinni, tumanda ham faxrli oʻrinni egallagan. "Umid nihollari” sport musobaqalarida ham shaxmat sport turi bilan faol qatnashib, faxrli 1-2-3-oʻrinlarni egallab kelgan. Kichik akam Ravshanbek Toʻliboev Amudaryo qishloq xoʻjalik kasb-hunar kollejida tahsil olmoqda. U ham shaxmatga juda qiziqadi. Uzoq masofaga yugurishni mashq qilib turadi. Shu sabablimi, Ravshanbek akam baquvvat, epchil. Koʻpchilikka yoqadigan fazilatlaridan biri bu – vazminligi. Har qanday holatda oʻzini tuta biladi. Uning eng sevimli fani – matematika va fizika. Kelajakda u ham Sanjarbek akamdek ustoz-muallim boʻlmoqchi. Bu – uning oldiga qoʻygan maqsadi. Maqsadi yoʻlida hozirdanoq izlanishlar olib bormoqda.
Biz sogʻlom oilamiz! Men mana shunday oilada dunyoga kelganimdan mamnunman!
Ozoda TOʻLIBOYeVA,
71-sonli maktab oʻquvchisi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
