HALI MEN EGALLAShIM KERAK BOʻLGAN PILLAPOYaLAR KOʻP
Yurtboshimiz I.Karimov aholi bilan boʻlgan uchrashuvlarida, yigʻilishlarda bizning farzandlarimiz hech kimdan kam emas, hech qachon kam ham boʻlmaydi, deya faxr bilan aytadilar.
Bu ishonch har bir yosh yigit-qizning zimmasiga mamlakatimizda yoshlarga yaratilgan imkoniyatlarga loyiq inson boʻlib yetishish masʼuliyatini yuklaydi.
Men uch yildan beri tumanimizdagi BOʻSMning Ildar Erimmetov trenerlik qiladigan karate guruhi mashgʻulotlariga qatnashaman. Maktabimizda jismoniy tarbiya darsi mashgʻulotlarini sidqidildan bajarib, uyda ham chiniqish mashqlarini bajarib yurganim karate bilan shugʻullanganimda juda qoʻl keldi. Qolaversa, ustozim mening shu sport turidan iqtidorimni rivojlantirishga koʻp eʼtibor berdi. Avval BOʻSM birinchiliklarida, keyin nufuzli davralarda gʻalabaga erisha boshladim.
Mening hayotimda 2015-yil oʻchmas taassurotlar qoldirdi. May oyida Urganch shahrida boʻlib oʻtgan Xorazm viloyatining ochiq birinchiligida ikkinchi oʻrinni, dekabr oyida boʻlib oʻtgan Qoraqalpogʻiston Respublikasi birinchiligida ikkinchi oʻrinni yengib oldim va erishgan natijalarim tufayli Qoraqalpogʻiston Respublikasi karate terma jamoasi aʼzosi boʻldim.
Shu yilning 26-28-fevral kunlari Chirchiq shahrida karate boʻyicha boʻlib oʻtgan Oʻzbekiston Respublikasi birinchiligida Qoraqalpogʻiston terma jamoasi safida, 45 kg.gacha boʻlgan vazn toifasida davraga tushib, eng yuqori oʻrinni yengib oldim va Oʻzbekiston chempioni boʻldim.
Gʻoliblik shohsupasida turib, taqdirlangan damlarim hayotimning eng unutilmas damlari boʻlib qoladi.
Men erishgan natijalarim tufayli 14 yoshimda sport ustaligiga nomzod boʻldim. Bu gʻalabalar mening oʻzimga boʻlgan ishonchimni mustahkamladi. Ustozim ham har bir mashgʻulotimizda "hali sen zabt etishing kerak boʻlgan pillapoyalar koʻp, chempion boʻldim, deb boʻshashma”, deb taʼkidlaydi.
Aslida mening ham niyatim – tumanimiz sport sharafini xalqaro musobaqalarda yuqori koʻtarish.
Har safargi gʻalabam bilan ota-onam, qarindoshlarim, maktabdagi ustozlarim, doʻstlarim quvonib tabriklashganida koʻnglimdagi shu niyatimga xuddi qanot bagʻishlaganday boʻlishadi.
Ularning ishonchini oqlashga doimo intilaman. Barcha tengdoshlarimga: "bolalik damlarini behuda oʻtkazmay, oʻzlaringiz xohlagan mashgʻulot bilan jiddiy shugʻullaning, iqtidoringizni namoyon eting!”, – deyman.
Barchaga mustaqilligimizning 25 yilligi qutlugʻ boʻlsin!
Jahongir JUMABOYeV,
55-sonli maktab oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
