KOʻNGLIMDAGI KUVONCh – MUSTAQILLIK TUFAYLI

Baʼzan davralarda madaniy hordiq haqida soʻz ochilsa, koʻpchilik sihatgohlarda dam olish, biror madaniy-maʼrifiy tadbirda ishtirok etish yoki miriqib televizor koʻrishni afzal, deb bilishadi. Toʻgʻri, insonning hayotida bunday hordiq chiqarish ham muhim ahamiyatga ega. Sihatgohlarda dam olib, havo almashtirish, koʻngilochar tadbirlarda ishtirok etish ham maʼlum maʼnoda sogʻligimiz uchun foydali. Lekin menga qolsa, miriqib dam olish va asablarni tinchlantirishning eng maqbul yoʻli – shaxmat sporti bilan shugʻullanish, derdim.

Men hozir 80 yoshdaman, 65-yildan beri shaxmat mening eng yaqin hamrohim. Umrim davomida turli vazifalarda ishladim. Fermer xoʻjaligi rahbarligidan nafaqaga chiqdim. Qayerda, qanday vazifada ishlasam-da, shaxmatdan bir kun ham ayro tushganim yoʻq. Hatto 1981-yildan 1992-yilgacha Qoraqalpogʻiston Respublikasi shaxmat terma jamoasiga trenerlik qildim. Oilamizda esa oʻgʻil-qizlarim, kelin-u nevaralarimning barchasi shaxmatchi. Qizlarim Gulnora va Muborak Rahimovalar shaxmat boʻyicha xotin-qizlar oʻrtasida oʻtkazilgan Oʻzbekiston Respublikasi chempionatida ishtirok etishib, bir necha marta gʻolib boʻlishdi. Ikkala qizim ham shaxmat boʻyicha Oʻzbekiston chempionlari. Rahmatjon oʻgʻlim esa BOʻSMda trener, nevaralarim Azimjon Rahimov va Sabohat Rahimovalar yaqindagina oʻz yoshlari toifasida Qoraqalpogʻiston chempionlari boʻlishdi. 18 nafar nevaralarimning barchasi sportning bu turi bilan doimiy shugʻullanishadi.

Shaxmatni aql gimnastikasi deyishadi. Bu – juda toʻgʻri! Men shu nuroniy yoshimda ham bemalol yoshlar bilan bellasha olaman. Xotiram juda yaxshi, oʻzimni hamisha tetik his qilaman. Mamlakatimizda yoshlarga, hatto biz keksalarga ham beqiyos gʻamxoʻrliklar koʻrsatilayotganidan, farzandlarim sogʻlom va baxtiyor hayot kechirayotganidan quvonib ketaman. Toʻgʻrisini aytay, umrim bino boʻlib bundayin farovonlikni, erkinlik va bagʻrikenglikni, toʻkin-sochin hayotni koʻrganim yoʻq. Koʻrib, his qilayotganlarim, koʻzimni quvontirib, qalbimda gʻurur uygʻotayotgan tuygʻularim – bu faqat va faqat mustaqillik tufayli!  Mustaqillik – xalqimizga nainki ozodlik va erkinlik, balki tinchlik, toʻkin-sochin hayot berdi, oʻz orzu-umidlarini roʻyobga chiqarish uchun cheksiz imkonlar ato  etdi! Biz bunday dorilomon kunlarning qadriga yetishimiz kerak. Bu baxt hammaga ham nasib etavermaydi. Dunyoning qaysidir burchaklarida keksalar, bolalar ogʻir mehnatga jalb qilingan. Nonga zor, suvga, hatto musaffo havoga zor millionlab insonlar bor. Bizning mamlakatda esa xalqimizning baxt-saodatga chulgʻanib yashashi uchun davlatning oʻzi bosh-qosh. Bundan ortiq baxt, bundan ziyoda eʼtibor va gʻamxoʻrlik yoʻq, azizlar!

Biz – keksa avlod vakillari har bir ishimiz, har bir soʻzimiz, intilishlarimiz bilan yoshlarga ibrat boʻlmogʻimiz kerak. Yoshlar bizdan bugungiday obodlik, tinchlikning qadriga yetishni oʻrgansinlar, hayot deb atalmish ulkan karvon-da adashib qolmaslikka, bor kuch va bilimini  ezgulikka, istiqlol gʻoyalarini mustahkamlashga sarflab yashamoqni odat qilsinlar. Istiqlolning istiqboli yanada yuksak boʻlsin! Barcha yurtdoshlarimizga mustaqillik bayrami muborak, azizlar!

Bekjon RAHIMOV,

sport faxriysi,

Mangʻit shahrining "Doʻstlik” mahallasi.

(Foto - http://uza.uz)