DEPUTATLAR SAYLOVChILARI HUZURIDA

Butun mamlakatimizda boʻlganidek, mustaqillik yillarida Qoraqalpogʻiston Respublikasida ham keng koʻlamli islohotlar amalga oshirildi.

Puxta oʻylangan, bosqichma-bosqich amalga oshirilayotgan izchil islohotlar tufayli Qoraqalpogʻiston Respublikasi agrar oʻlkadan zamonaviy ishlab chiqarish va ijtimoiy-iqtisodiy infratuzilmasi, transport-kommunikatsiya tarmoqlari rivojlangan mintaqaga aylandi.

Barcha jabhalarda islohotlarning izchil va samarali joriy etilishida deputatlarning ham munosib oʻrni bor. Ular oʻz hududlaridagi saylovchilari bilan uchrashuvlarida   Qoraqalpogʻiston  Respublikasi Joʻqorgʻi Kengesi hayotiga oid yangiliklar, yurtimizda amalga oshirilayotgan ulkan yuksalishlar, qonun ijodkorligi faoliyati yuzasidan, qabul qilingan qonunlarning turmushga  qay tarzda tatbiq etilayotgani xususida aholiga batafsil maʼlumotlar berishmoqda.

Yaqinda 38-sonli maktabda Qoraqalpogʻiston Respublikasi Joʻqorgʻi Kengesi deputati, tuman hokimi oʻrinbosari, Xotin-qizlar qoʻmitasi raisi M.Ahmedovaning oʻz saylovchilari bilan uchrashuvida aynan shu jihatlar oʻz ifodasini topdi.

Deputat oʻz soʻzida mamlakatimizning kichik bir boʻlagi boʻlmish tumanimizda amalga  oshirilayotgan ulkan bunyodkorlik ishlari haqida ham keng toʻxtalib oʻtdi hamda saylovchilarning savollariga batafsil javoblar berdi.

30-Mangʻit saylov okrugidan Qoraqalpogʻiston Respublikasi Joʻqorgʻi Kengesi deputati Otabek Yoʻldoshev 3-avgust kuni oʻz saylovchilari bilan boʻlgan uchrashuvida  joriy yilning oʻtgan davrida mamlakatimizda qabul qilingan qonunlarning, koʻrib chiqilayotgan yangi qonun loyihalarining mazmun-mohiyati haqida, shuningdek, Oʻzbekiston Respublikasi Prezidentining 2016 yil 2-iyundagi "Oʻzbekiston Respublikasi davlat mustaqilligining yigirma besh yillik bayramiga  tayyorgarlik koʻrish va uni oʻtkazish toʻgʻrisida”gi qarori  mohiyati toʻgʻrisida maʼruza qildi. Saylovchilar oʻzlarini qiziqtirgan savollariga batafsil javoblar oldilar.

Shuningdek, 33-Oʻzbekiston saylov okrugidan Qoraqalpogʻiston Respublikasi Joʻqorgʻi Kengesi deputati Anvar Yoʻldoshev ham oʻz saylovchilari bilan boʻlgan uchrashuvida xuddi shunday masalalar yuzasidan maʼruza qildi.

Uchrashuvlarda saylovchilarning faol qatnashganligi, deputatlar maʼruzasiga munosabatlar bildirib, takliflar oʻrtaga tashlaganligi yurtimiz aholisining huquqiy savodxonligi va mamlakatimiz taqdiriga daxldorlik hissi tobora ortayotganini koʻrsatadi.