ISTIQLOL MADHI

Istiqlol nuridan dillar munavvar,

Chaman iforidan koʻngil muattar.

Bugun bunday dorilomon zamonga,

Hurriyat tufayli boʻldik muyassar.

Naqarot:

Goʻzal va betakror, muqaddas Vatan,

Jonim fido senga, butun jismu tan!

Bulbullar madh etgan goʻzal boʻstonim,

Jahonda yagona Oʻzbekistonim!

Shod yashar qoʻyningda turli millatlar,

Bol kabi bogʻingda ungan neʼmatlar.

Dasturilamaldir oʻgʻil-qizingga,

Ulugʻ allomalar aytgan hikmatlar.

Naqarot

Butun xalq birlashib koʻrsatib gʻayrat,

Yutuqlar koʻngilga surur solgan payt.

Yayrab-yashnayotgan bu ulugʻ oʻlkam,

Butun dunyo uzra koʻrsatur haybat.

Naqarot

Dildagi gʻururning boʻlib taʼsiri,

Chizilar bu buyuk yurtning tasviri.

Xalqimizni olgʻa undaydi doim,

Dono Yurtboshining har bir tadbiri.

Ahmad NAFASOV.

YaXShI DAVRONDA

Vatan, vasfing qilay doston,

Jaranglasin yer-u osmon.

Koʻngil toʻlguncha soz aylay,

Dilimda bor edi armon.

Naqorat:

Vatan, sensan turar joyim,

Yashil bogʻim oqar soyim.

Joʻshqin Amu, Sir daryoim,

Meni shodmon etar doim.

Xazinang togʻ-u toshingda,

Nasibang ob-u oshingda.

El-u yurt obod, farovon,

Chorak asrlik yoshingda.

Naqorat

Yoqimli, yorqin husning bor,

Qancha  atoqli doʻsting bor.

Totuvsan tinch hayot birla,

Tasadduq jon senga ming bor!

Istiqlolga boʻlib hamdam,

Vatanda baxt topib men ham.

Yasharman yaxshi davronda,

Etib koʻnglimni shod, hurram.

Qanot bogʻlab quvonch quchgan,

Bulut oshib, baland uchgan.

Bugun kuchli, jasur qushman,

Amu - Jayxun suvin ichgan!

Jumaboy HIDOYaTOV.

AMUDARYoM

Amu sohilida ulgʻayib oʻsdim,

Qulochimni kerib toʻlqinlar toʻsdim.

Sohiliga chiqib, qumlarni kezdim,

Sevimli maskanim, jon Amudaryom!

Dunyoga tanilding istiqlol sabab,

"Amudaryo asali” nomli bol sabab.

Har ishda erishgan istiqbol sabab,

Xirmonlaring toʻla don, Amudaryom!

Sening taʼrifingga topa olmay soʻz,

Oq qogʻoz yuzida bugun tolmay koʻz.

Hamma rejalaring boʻlib qolgay yuz,

Paxta-yu gʻallaga kon Amudaryom!

Bu yilgi xirmonlar toʻlibdi donga,

Bozoringda bisyor – ne kerak jonga.

Muhayyo ne lozim boʻlsa insonga,

Rastalaring toʻla non, Amudaryom!

Ayni yigit yoshi – muborak yoshing,

Ne bir azoblarga yetib bardoshing,

Qatorda kam boʻlma, magʻrur tut boshing

Abad nasib etgay shon, Amudaryom!

Farhod AVEZOV, "Jayxun ilhomlari” NNT aʼzosi.

ona diyorim

Hayoldan ketmaydi kecha-yu kunduz,

Qayerda boʻlsa-da, sogʻinch-xumorim.

Men uchun dunyoda yagona, yolgʻiz,

Sen oʻzing faxrimsan, ham iftixorim,

Goʻzal Oʻzbekiston – ona diyorim.

Ellarning ichida erur sarasi,

Bepoyon yerlari, togʻ-u darasi.

Oʻzingsan gavharim – koʻzim qorasi,

Boʻynimga marjonim, tilla tumorim,

Goʻzal Oʻzbekiston – ona diyorim.

Sanʼatiga bugun tan berdi jahon,

Dovrugʻini koʻrib qoldi lol-hayron.

Oʻgʻil-qizi bari botir, paxlavon,

Shu sabab dilimda yoʻqdir-gʻuborim,

Goʻzal Oʻzbekiston – ona diyorim.

Oʻzbek elim doim oʻziga bekdir,

Oʻzgalardan aslo, hech kami yoʻqdir.

Bugun hayotidan koʻngillar toʻqdir,

Qancha fido qilsam arziydi borim,

Goʻzal Oʻzbekiston – ona diyorim.

Mustaqillik – ulugʻ farovon hayot,

Mustaqillik bilan el-u yurt obod.

Mustaqillik boʻlsin mudom barhayot,

Shomurod, abadiy boʻlsin shiorim –

Goʻzal Oʻzbekiston – ona diyorim,

Shomurod XOʻJANOV.