IMKONIYaTI ChEKLANGAN AYoL-QIZLARGA KASB-HUNAR OʻRGATILMOQDA

Qanday sharoitda, qanday ahvolda-yu qay manzilda dunyoga kelishini inson oʻzi belgilay olmaydi. Biroq, inson zoti borki, bu yorugʻ olamda orzu-havas bilan yashaydi, orzulari roʻyobi uchun intilib yashaydi.

Oramizda shunday odamlar ham uchraydiki, orzu-intilishlari yoʻlidagi harakatlari boshqalarnikidan mashaqqatliroq, ogʻirroq kechadi. Biroq ular bundan oʻkinmaydilar, hamisha  kurashib, hech kimdan kam boʻlmasdan yashaydilar. Ular – imkoniyati cheklangan insonlardir.

Tumanimizda ana shunday odamlarning 240 nafardan ziyodini birlashtirgan Oʻzbekiston Nogironlar jamiyatining tuman boʻlimi tumanimizdagi imkoniyati cheklangan kishilarga munosib  turmush sharoitlarini yaratishga, ularning toʻlaqonli hayot kechirishlariga koʻmaklashishga intilmoqda.

Jamiyat raisi Nilufar Xolboyevaning saʼy-harakati bilan ular bir-birini taniydilar, bir-birlari bilan tez-tez uchrashib, hol-ahvol soʻrashib turishadi, hayit, bayramlarni birga nishonlashadi.

Bundan bir necha yillar oldin jamiyat Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat Fondi taʼsis etgan grant tanlovlarida imkoniyati cheklangan yoshlarni kompyuter mutaxassisligi boʻyicha oʻqitishga moʻljallangan loyihasi bilan qatnashib, gʻolib boʻlgan, grant mablagʻi evaziga kompyuter jamlanmalari olib kelinib, koʻplab oʻgʻil-qizlar ushbu soha boʻyicha bilimga ega boʻlgan edilar.

Joriy yilda bu ezgu ishning davomi sifatida jamiyat yana "Nogiron ayol-qizlarning ijtimoiy faolligini oshirish maqsadida kasbga tayyorlash uchun bichish-tikishga, toʻqishga oʻrgatish va ularning imkoniyatini roʻyobga chiqarish” nomli loyihasi bilan Oliy Majlis huzuridagi NNTlarni va fuqarolik jamiyatining boshqa institutlarini qoʻllab-quvvatlash jamoat Fondining grant tanlovlarida qatnashdi va gʻolib boʻlib, fond mablagʻlarini boshqarish boʻyicha Parlament komissiyasi qaroriga koʻra, 25 mln. soʻmlik davlat granti sohibi boʻldi.

Ushbu mablagʻlar loyihada koʻzda tutilgan rejalarni amalga oshirishga keng imkoniyatlar yaratmoqda. Yaʼni imkoniyati cheklangan ayol-qizlarni kasbga tayyorlash uchun bichish-tikishga, toʻqishga oʻrgatish uchun shart-sharoitlar yaratildi. Amudaryo qishloq xoʻjalik kasb-hunar kolleji binosidan ajratib berilgan xona eng soʻnggi rusumdagi uchta tikuv mashinalari, bitta tikilgan kiyimga naqsh oʻyish mashinasi, stol-stullar va boshqa zarur uskunalar bilan jihozlandi.

Shu yilning 30-iyunida loyiha doirasida imkoniyati cheklangan ayol-qizlarni kasbga tayyorlash uchun bichish-tikish va toʻqish boʻyicha oʻquv kursi oʻz faoliyatini boshladi.

- Ayni kungacha bu yerda hunar oʻrganish istagida boʻlgan oʻn nafarga yaqin ayol-qizlar mashgʻulotlarga jalb qilinayapti. Hademay ularning safi kengayadi. Chunki kasb-hunar oʻrganish, biror faoliyat turi bilan shugʻullanish imkoniyati cheklangan insonlarning koʻnglida yashash zavqini uygʻotadi, ijtimoiy faolligini oshiradi. Koʻnglida istak boʻlsa-da, bu yerga kelaolmaydigan, tumanimizning olis hududlarida yashaydigan,  yurish-turishda oʻzgalar koʻmagiga muhtoj qizlar ham bor. Biz loyihani ishlash jarayonida ularni ham unutganimiz yoʻq. Yaʼni hududlarga borib oʻqitishni ham yoʻlga qoʻyamiz, - deydi jamiyat raisi Nilufar Xolboyeva.

Ana shunday ezgu ishni boshlagan rais bundan uch yil oldin, jamiyat aʼzosi boʻlgan 26-sonli maktab bitiruvchisi Yulduz Karimovaning ota-onasi bilan maslahatlashib, uni iqtidorli, zehnli va oʻta tirishqoq boʻlganligi sababli Toshkentdagi imkoniyati cheklanganlarning respublika kasb-hunar kollejida oʻqitishini soʻragan va bunga erishgan ham edi.

Yulduz Karimovaning mazkur kollejni tugatib, tikuvchilik boʻyicha modeler-dizayner, konstruktorlik mutaxassisligi diplomini olib, tumanimizga qaytishi oʻquv kursida yoshlarga shu sohada taʼlim beradigan mutaxassisga ehtiyoj tugʻilib turgan bir paytga toʻgʻri keldi.

 - Jonim bilan kollejda oʻqigan bilimlarimni, amaliy tajribalarimni opa-singillarimga oʻrgataman. Ular ham mohir tikuvchi boʻlib yetishisha-di, - deydi Yulduzxon Karimova.

Jamiyat aʼzolari – chevar tikuvchi Saida Oʻrozboyeva, toʻqish ustasi Shoira Najmiddinovalar ham bu savobli ishga bosh qoʻshganlardan.

Xonada ular tikkan, toʻqigan liboslarni koʻrib, hamsuhbat boʻlib, Yaratganning ular jismini nuqson bilan yaratgan boʻlsa-da, yuksak aql-idrok va qobiliyat berganiga amin boʻladi, odam. Va beixtiyor tilingizga  ularga olqish otilib keladi. Axir atrofimizda, koʻz oʻngimizda barcha muchasi sogʻ-u, umrini bemaqsad oʻtkazayotganlar qancha?

Hunarni asrabon netgumdir oxir,

Olib tuproqqami ketgumdir oxir, -

deydi hazrat Mir Alisher Navoiy bobomiz.

Avvalo imkoniyati cheklangan boʻlsa-da, qiyinchiliklarni yengib kasb oʻrgangan, kasbini oʻzlaridek ayol-qizlarga ham oʻrgatishdek qutlugʻ ishga bel bogʻlagan Nilufar Xolboyeva rahbarligidagi besh barmogʻi hunarli qizlarga boshlagan ishlaringiz oʻngidan kelsin, deya tilak bildirdik.