JAYXUN ILHOMLARI

Iftixor

Bir maromda aylangani kabi yer,

Bir maromda inson kechirsa hayot.

Vatan ravnaqi deb har kim toʻkib ter,

Yurtning parvoziga boʻlolsa qanot.

Otaning umidin oqlasa farzand,

Yayratsa boboning koʻnglin nevara.

Hayotda tashvishlar boʻlsa-da garchand,

Insonning baxtiga bormi chegara?!

Uyingda boʻlganda toʻy yo maʼraka,

Yaqin qarindoshday tursa qoʻshnilar.

Topgan-tutganingda boʻlar baraka,

Yegan-ichganingga maza qoʻshilar.

Ertalab ish sari uyingdan chiqsang,

Ahli oilangdan boʻlib xotirjam.

Kechqurun ishingdan uyga oshiqsang,

Mehnating rohatin koʻrmoqqa baham.

Keksa ota-onang koʻnglini xushlab,

Har tong, har oqshomda hol soʻrab tursang,

Yursang oʻgitlarin yodingda ushlab,

Ajabmas hayotda qoqilmay yursang.

"Bunday osuda yurt qayda?” – deb nogoh

Kimdir savol berib qolsa oʻsha tob.

Bizni taniganlar "Boʻlingiz ogoh,

Oʻzbekiston – bu!” – deb berishar javob!

Ahmad NAFASOV.

Onam kabi sevimli

Taʼrifingga sheʼr bitdim bugun,

Mehrim aslo topmagay yakun.

Muhabbatim oshadi har kun,

Onam kabi sevimli Vatan.

Seni bir kun koʻrmasam  – armon,

Senga mehrim beradi darmon.

Kerak boʻlsa boʻlayin qurbon,

Onam kabi sevimli Vatan.

Xizmatingda turay erta-kech,

Gʻanimlarni yoʻlatmayin hech.

Gʻanimlarning xayollari puch,

Onam kabi sevimli Vatan.

Mustaqil yurt -Oʻzbekistonim,

Senga fido bu shirin jonim.

Manglayimga surayin nonim,

Onam kabi sevimli Vatan.

Nishonlaymiz yigitlik yoshing,

Kam boʻlmasdan tutib tik boshing.

Porlayversin iqbol quyoshing,

Onam kabi sevimli Vatan.

Farhod AVEZOV, "Jayxun ilhomlari” NNT aʼzosi.

JANNATIM – OʻZBEKISTON

Togʻlari bulutga teng,

Bagʻri osmon kabi keng.

Keng bagʻri jannatga teng

Qirlari bagʻridan keng.

Jannatim – Oʻzbekiston,

Har goʻshasi guliston.

Bogʻlaringni yashnatgan,

Chevar qoʻlli qizlaring.

Bedov otni kishnatgan,

Dovyurakdir oʻgʻloning.

Jannatim – Oʻzbekiston,

Har goʻshasi guliston.

Zulfiyadek qizing bor,

Baxtingdan kuylab kelgan.

Alisherdek oʻgʻloning

Noming elga tanitgan.

Jannatim – Oʻzbekiston,

Har goʻshasi guliston.

Dinora KARIMBOYeVA, Amudaryo akademik litseyi oʻquvchisi.

Xiva

Meʼmorlarning sanʼati oʻzing,

Suronlarga berolding bardosh.

Har gʻishtingda yurtim tarixi,

Bugun menga boʻlding yelkadosh.

Minoralar koʻkka ustundir,

Yer yuzini hayratga solgan.

Ertakdagi billur qasrlar,

Timsolingdan andoza olgan.

Koʻhna tarix bagʻringda yashar,

Nomdor shahar, ulugʻvor shahar.

Jamila YaNGIBOYeVA,

"Yosh muxbir” toʻgaragi aʼzosi.

VATAN

Men mustaqil yurtda dunyoga keldim,

Mustaqillik mening hayotim, tongim.

Baralla madhingni kuylayman Vatan,

Yoʻqdir dunyoda armonim hech ham.

Vatanning ertasi - porloq kelgusi,

Mendurman bagʻrida baxtli qizchasi,

Ulgʻayib, boʻlolsam yurtim suyanchi,

Vatan, senga umrim hadya etaman.

Nomingni eng suyuk qoʻshiqday bilib,

Oʻzingni onamdek aziz tutaman.

Qadringni koʻtarib, otamday bilib,

Vatan, hayotimni hadya etaman!

Feruza YOʻLDOShEVA,

Mangʻit iqtisodiyot kolleji oʻquvchisi.

Yoz keldi

Yurtimga kelmoqda tarovatli yoz,

Yozda hamma ishlar albat boʻlar soz.

Xayr, koʻrishguncha aziz maktabim,

Koʻrishguncha xayr, qadrli ustoz.

Yoz kelsa, shodlanar quvnoq bolalar,

Koʻngillar yorishar, toʻlar hislarga.

Quyosh kulib boqar butun olamga,

Mehr nurlarini sochar bizlarga.

Daraxtlar shoxini ohista silab,

Biz tomon bir iliq shamollar yelar.

Quvonchli tuygʻular dilni allalab,

Yurtimga fayz berib fasli yoz kelar.

Javohir YOʻLDOShEV,

38-sonli maktab oʻquvchisi.