ZAMONAMIZ YoShLARI
Qoʻlida kitob ushlab, oʻqishga shoshayotgan yoshlarni koʻrib koʻz quvnaydi, ammo kitobni hamma ham oʻqish uchun qoʻlga olmas ekan.
Bir kun oʻqishdan qaytayotib roʻparamdan kelayotgan, oʻqishdan qaytgan aka-singillarim-u tengdoshlarimni diqqat bilan kuzatdim. Ularning hayotdagi maqsadini bilgim keldi. Yana ular qoʻlidagi qimmatli kitob eʼtiborimni tortdi, ammo kitob ortidagi telefoni va qandaydir sovgʻani koʻrib, jahlim chiqdi. Bechora kitobning qadrini shu darajada past qilishibdiki, u bilim olish uchun emas, balki qoʻlidagi ahamiyatsiz narsalarni berkitish uchun foydalanarkan. Qizlar kiyib yurgan kalta yubka, baland poshnali oyoq kiyim, quloq-u boʻyinlaridagi oltin-u zar, qimmatbaho telefon, yuzlariga jilo berish oʻrniga bachkana qilib koʻrsatayotgan boʻyoqlar nima maqsadga xizmat qilarkin? Ularning kelgusi hayotida bu narsalarning nima ahamiyati bor ekan? Oʻz farzandining shu ahvolda yurishiga qanday qilib ota-ona bemalol qaray olarkan?
Mana shu savollar xayolimdan oʻtdi. Hatto ular orasida mening oʻqiyman, deb intilgan doʻstlarim borligi alam qildi. Oʻgʻil bolalar ham bundan mustasno emas, ular ham oʻzlariga yarashmagan turfa libosda, sochlari allam-balo turmakda, yonidagi oʻziga oʻxshagan hamrohlari bilan bemaʼni soʻzlarni aytib yurishlari dilingni ogʻritadi. Men ulardan bir nechtasiga bu haqda gapirganimda ular menga "bu mening hayotim, aralashma, men zamondan ortda qolishni istamayman. Sen nimaniyam bilarding, oʻzingcha kitobiy gaplar gapirma” degan javobni oldim. Hozir siz ham balki shunday oʻylayotgandirsiz? Unda aytingchi, zamon bilan tenglashish nima? Siz qaysi zamonni aytyapsizki, unda oʻqish qolib, masxarabozdek kiyinish talab qilinadigan? Siz kimga oʻxshashni istayapsizki, oʻzligingizni unutgudek? Aziz tengdoshim! Siz hamma istaklaringizni muhayyo qilayotgan ota-onangizga jahl qilishdan oldin siz tengi koʻngli yarimlar borligini oʻylang. Siz gapirayotgan bemaʼni gaplar-u zamon talabi, deb bilgan jamiki narsalar kelajangiz uchun nima qilib bera olishi haqida bir oʻylab koʻring. Zamon talabi ilmga chanqoq, dunyoqarashi keng, Vatan ravnaqiga oʻz hissasini qoʻsha oladigan yoshlar kamolidir. Har bir oʻtayotgan soniyani qadrlang, siz uchun jon kuydirib mehnat qilayotgan ota-onangiz ishonchini oqlang.
Aziz tengdoshlarim, sizga yaratilgan imkoniyatdan oqilona foydalaning! Shunda siz uchun ota-onangizning chekkan mashaqqatlari zoya ketmagan boʻladi!
Aʼloxon RAJABOVA, Amudaryo akademik litseyi oʻquvchisi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
