TAʼLIM-TARBIYa SAMARADORLIGI OShMOQDA

Hozirgi kunda bizning 64-sonli umumtaʼlim maktabimizda 400 dan ziyod oʻquvchi taʼlim-tarbiya  olishmoqda. Oʻquvchilarga puxta taʼlim va tarbiya berishda 4 nafar oʻrta maxsus maʼlumotli, 33 nafar  oliy maʼlumotli pedagoglar fidokorona mehnat qilmoqdalar.

Maktabimiz barcha koʻrsatkichlar boʻyicha soʻnggi 7-yil davomida tuman maktablari reytingida birinchi oʻntalikda kelmoqda.

Maktabimiz pedagoglar jamoasining yil sayin yangi yutuqlarga erishuvida Oʻzbekiston Respublikasi xalq taʼlimi vazirligi tomonidan amaliyotga joriy etilayotgan pedagogik innovatsiyalardan unumli foydalanish asosiy omil boʻlmoqda. Jumladan, "Oʻrgan-oʻrgat”, "Ustoz - shogird”, "Dars muqaddas”, "Sogʻlom muhit – sogʻlom jamoa”, "Yaxshi muallim – sifatli taʼlim” kabi bir qancha tadbirlarning hayotga tatbiq etilishi sababli muallimlar ish faoliyatida katta ijobiy oʻzgarishlar sodir boʻlayapti.

"Oʻrgan - oʻrgat” tadbiri doirasida har bir pedagog haftasiga bir marta, oyiga toʻrt marta namunaviy darslar oʻtkazmoqda.

XTMFMTTE boʻlimi rahbarining shu yil 25-fevral kungi maxsus buyrugʻi asosida "Oʻrgan - oʻrgat” tadbiri boʻyicha ish rejasi ishlab chiqildi va reja asosida bir qancha ishlar amalga oshirildi. Masalan, 5-sonli maktab rahbari va oʻqituvchilari maktabimizga kelib, har xil metodlardan foydalangan holda darslar tashkil etishmoqda. Biz ham 5-sonli maktabga borib, xuddi shu usulda dars oʻtayapmiz va bu jamoaning ilgʻor ish tajribalarini oʻrganayapmiz.

Bizning oʻz faoliyatimizda yangicha  ish uslublaridan foydalanishimiz oʻquvchilarga berilayotgan taʼlim-tarbiya sifatining oshishiga samarali taʼsir koʻrsatmoqda. Maktabda oʻtkazilgan "Fanlar olimpiadasi”da ishtirok etgan oʻquvchilardan 7 nafari ona tili, tarix, huquq, rus tili, frantsuz tili, qoraqalpoq tili va iqtisod fanlaridan tuman bosqichiga chiqishdi. Fanlar olimpiadasining tuman bosqichida maktabimiz oʻquvchisi Dinora Rahimboyeva tarix fanidan 71 ball toʻplab, 3-oʻrinni, Shahodat Oʻrozboyeva huquq fanidan 88 ball toʻplab, 1-oʻrinni egalladi va Respublika bosqichida qatnashish huquqini qoʻlga kiritdi.

Shuningdek, Islomjon Xudoyberganov rus tili fanidan 72 ball toʻplab, 1-oʻrinni, Umida Marksova 64 ball toʻplab, 2-oʻrinni egalladilar.

Maktabda "Bilimlar bellashuvi”ga tayyorgarlik koʻrish reja asosida amalga oshirildi. Bu bellashuvda jami 29 nafar bola qatnashib, ulardan 16 nafari tuman bosqichiga chiqdi. "Bilimlar bellashuvi”ning tuman bosqichida ishtirok etgan oʻquvchilarimizdan 3 nafari quvonarli natijalarni qoʻlga kiritdilar. Rus tili fanidan Ogʻabek Egamberganov, tarix fanidan Bekzod Odilov va matematika fanidan Renat Chorshamovlar bellashuvning Qoraqalpogʻiston Respublikasi bosqichida qatnashish huquqini qoʻlga kiritdilar.

Maktabimizda oʻquvchilarning boʻsh vaqtlarini mazmunli oʻtkazish maqsadida 7 turdagi fan toʻgaraklari tashkil etilib, ularda 131 nafar bola faol ishtirok qilmoqda. 6 ta sport toʻgaragida 72 nafar oʻquvchi sportning oʻzlari qiziqqan turi boʻyicha shugʻullanishadi. Bizning yosh sportchilarimiz tuman miqyosida oʻtkazilayotgan musobaqalarda faxrli oʻrinlarni egallab kelmoqdalar. 2015-2016 oʻquv yilida tuman miqyosida oʻtkazilgan "Umid nihollari” musobaqasida maktabimiz sportchilari badiiy gimnastika, stol tennisi turlari boʻyicha oldingi oʻrinlarni egalladilar.

Shuningdek, maktabimizda "Orasta qizlar”, "Zulfiyaxonim qizlari”, "Yil sardori” va "Kamalak bilimdonlari”, "Yashil chiroq” kabi koʻrik-tanlovlarga tayyorgarlik koʻrish va ularni oʻtkazish ishlariga ham alohida eʼtibor beriladi. Albatta, bunday saʼy-harakatlar natijasi maktabimizda taʼlim-tarbiya samaradorligining oshishida namoyon boʻlmoqda.

Shuhrat  QURBONOV, 

64-sonli maktab direktori.