9-may tongi oʻylari

Hur, ozod Vatanda qancha yayrasak

Dildan shukronalar aytishib takror.

Bugungi hayotga poydevor qoʻygan,

Ota, bobolarga tashakkur ming bor.

Yashasalar hamki dillarda mangu,

Yod etib tursak ham ularni har dam.

Bugun bizlar uchun alohida kun,

Ruhlarin shod etmoq uchun boʻlib jam.

Qirgʻinbarot qilgan basharni dahshat,

Yetmish bir yil oldin topsa-da yakun.

Insonlar qalbiga yetgan jarohat,

Azob berar hamon, hattoki bugun.

Avval esa surib zafar nashʼasin,

Oldda muammolar boʻlsa-da hali,

Qaytganlar diydori yuvib hammasin,

Koʻp ayro koʻngillar topdi tasalli.

Toʻldirgan  edilar bizni gʻururga,

Ulugʻ jangda zafar quchishib qaytib.

Xuddi ular bilan boʻlganday birga,

Yurdik gʻalabaning qoʻshigʻin aytib.

Mudhish fashizmning tomirin qirqib,

Poydevor qoʻyganlar dunyo erkiga.

Vayron mamlakatni obod etish ham,

Tushgan edi yana ular chekiga.

Koʻksida qoʻrgʻoshin boʻlagi bilan,

Yana kim odimlab qoʻltiqtayoqda.

Ishlagani bois qisqa muddatda,

Vayrona mamlakat turdi oyoqqa.

Bir gʻisht qoʻysa biri yangi binoga,

Bitta ketmon ursa kechagi askar.

Yana bir gʻisht – shahid doʻstim uchun deb,

Mehnat qildilar to tongdan tun qadar.

Doʻstlik-birodarlik vositasida

Bizlarga yaratib turmush osuda.

Hayotga tashrifning maqsadin oqlab,

Koʻp inson yotibdi mangu uyquda.

Oldin imkoniyat beruvchi fursat,

Umrga chegara qoʻyar beshafqat.

Oʻtganlar ruhini shod etibgina,

Insoniylik qarzin uzarmiz faqat.

Hayot boʻlganlari hurmatda doim,

Ularni qoʻyarmiz davra toʻrida.

Chunki har lahzani gʻanimat bilib

Lozim eʼzozlamoq imkon borida.

Lekin, esiz, sigʻmas oʻtmish "aypad”ga,

Internetga butkul joylashmas tarix.

Ajdodlar ibratin koʻrsatmoq uchun,

Avlodlarga kerak necha muarrix.

Chunki urushlarning solgan kulfatin,

Bilmagan yo bilib unutgan kaslar.

Turli nizolarni yana yangidan,

Boshlash niyatidan qaytgan emaslar.

Dolgʻali dunyoda kecharkan hayot,

Bunday sinovlar koʻp oʻtar oradan.

Bizga sezgir nigoh, oʻtkir ong lozim,

Ajratib olish-chun oqni qoradan.

Bobolar ming xavfdan asrashib omon,

Bizlarga qoldirgan aziz Vatanni.

Asramoq koʻzimiz qorachigʻiday,

Burchimiz, bagʻishlab jon ila tanni.

Ahmad NAFASOV.

(Foto - http://umid.zn.uz)