Ijtimoiy himoyaga muhtoj fuqarolarning uylari taʼmirlab, yashashga yaroqsiz holga kelib qolganlari qaytadan qurib berilmoqda

Oʻzbekiston Respublikasi Vazirlar Mahkamasining 2023-yil 2-fevral kungi “Qoraqalpogʻiston Respublikasida aholi uchun munosib turmush sharoitlarini yaratish va mahallalar infratuzilmasini yanada yaxshilash chora-tadbirlari toʻgʻrisida” gi qaroriga asosan, ogʻir turmush sharoitidagi oilalarga tegishli uylarni taʼmirlash, tom qismini yopish, hamda yashash uchun yaroqsiz va avariya holatidagi uylarni yangidan qurish ishlari amalga oshirilishi belgilangan.

Qarorga muvofiq Amudaryo tumanidagi jami 49 ta ovul va mahallalarda joylashgan jami 1868 ta xonadondan 1856 ta uyning tom qismi yopib beriladi. Shuningdek, yashash uchun va taʼmirlash uchun yaroqsiz boʻlgan 12 ta uy qaytadan quriladi. Qolgan 190 ta uy esa toʻliq taʼmirlab beriladi.

 Undan tashqari qarorga muvofiq, Qoraqalpogʻiston Respublikasining janubiy tumanlari hisoblangan Amudaryo, Beruniy, Ellikqalʼa va Toʻrtkoʻl tumanlaridagi 2 ming kilometr tuproq yoʻllarga qum-shagʻal yotqizish ishlari olib boriladi.

Mazkur qaror ijrosini taʼminlash maqsadida Amudaryo tumanidagi barcha xonadonlar toʻliq xatlovdan oʻtkazilib, oilalarning ijtimoiy-iqtisodiy sharoitlari oʻrganildi. Oʻrganishlar natijasida ushbu oilalar haqiqatdan ham yordamga muhtoj ekanligi aniqlandi. Bugungi kunda tumanda ushbu uylarni taʼmirlash va qayta qurish ishlari boshlab yuborilgan.

Amudaryo tumanining Boʻz yop ovul fuqarolar yigʻinida istiqomat qiluvchi Amat Bazarbayev yakka-yu, yolgʻiz yashaydi. Fuqaroning uyiga tashrif buyurganimizda shu narsaning guvohi boʻldikki, uning uyi haqiqatdan ham yashashga yaroqsiz ahvolga kelib qolgan. Fuqaroning uyi bugungi kunda “Goʻna qalʼa Mangʻit” masʼuliyati cheklangan jamiyati quruvchilari tomonidan qayta qurilmoqda. 2 xonali zamonaviy uslubda qurib berilayotgan uyining qurilish ishlari boshlab yuborilganidan u juda ham mamnun boʻlib quruvchilarga oʻzi ham yordam bermoqda.

Yana shunday ijtimoiy himoyaga muhtoj fuqarolardan biri Qizilcholi mahallasida istiqomat qiluvchi Nasiba Siytmamutova. U ikki nafar farzandi bilan yolgʻiz yashaydi. Turmush oʻrtogʻining vafotidan keyin yolgʻiz ona roʻzgʻor yukini koʻtarishga ancha qiynalib qolgan edi. Buning ustiga yashash uchun yaroqsiz ahvolga kelib qolgan eski uyning tomidan chakka oʻtishi, balogʻat yoshiga yetib qolgan farzandlarining moddiy zarurati yolgʻiz onani kecha-yu kunduz dala ishlaridan boʻshamay yollanma ishchi boʻlib mehnat qilishga majbur qilardi. Biz tashrif buyurgan paytimizda uy egasi mavsumiy ishchi boʻlib ishlayotganligi sabab oʻzi yetib kelolmadi. Prezidentimizning alohida gʻamxoʻrligi va eʼtibori sabab uning uyi ham yangidan qurib berilmoqda.

Qurilish ishlari “Jumurtov tex taʼmir servis” masʼuliyati cheklangan jamiyati tomonidan olib borilmoqda. Quruvchilarning taʼkidlashicha, qurilish ishlari iyun oyida nihoyasiga yetkazilib, uy egasiga tantanali tarzda topshiriladi.

Albatta, bunday xayrli ishlar mazkur xonadon sohibasi dilida ezgulik chirogʻini yanada ravshan etib, uning yogʻdusi yana bir qator xayrli yumushlarga turtki beradi. Zero, ezgulikning javobi ham ezgulikdir.

Tuman hokimligining Axborot xizmati.