Savol bering, javob qaytaramiz

Savol: Er va xotinning mulkiy huquq va majburiyatlariga nimalar kiradi?

Javob: Oʻzbekiston Respublikasi Oila kodeksi 23-moddasiga asosan er va xotinning nikoh davomida orttirgan mol mulklari, shuningdek nikoh qayd etilguniga qadar, boʻlajak er-xotinning umumiy mablagʻlari hisobiga olingan mol-mulklari,  agar qonun yoki nikoh shartnomasida boshqacha hol koʻrsatilmagan boʻlsa, ularning birgalikdagi umumiy mulki hisoblanadi.

Er va xotinning nikoh davomida orttirgan mol-mulklari jumlasiga (er va xotinning umumiy mol mulkiga) er va xotin har birining mehnat faoliyatidan, tadbirkorlik faoliyatidan va intellektual faoliyat natijalaridan orttirgan daromadlari, ular tamonidan olingan pensiyalar, nafaqalar, shuningdek maxsus maqsadga moʻljallanmagan boshqa pul toʻlovlari (moddiy yordam summasi, mayib boʻlish yoki salomatligiga boshqacha zarar yetkazish oqibatida mehnat qobiliyatini yoʻqotganlik munosabati bilan yetkazilgan zararni qoplash tarzida toʻlangan summalar va boshqalar) kiradi.

Er va xotinning umumiy daromadlari hisobiga olingan koʻchar va koʻchmas ashyolar, qimmatli qogʻozlari, paylari, omonatlari kredit muassasalariga yoki boshqa tijorat tashkilotlariga kiritilgan kapitaldagi ulushlari hamda er va xotinning nikoh davomida orttirgan boshqa har qanday mol-mulklari, ular er yoki xotindan birining nomiga rasmiylashtirilgan yohud pul mablagʻlari kimning nomiga yoki er va xotinning  qaysi biri tomonidan kiritilgan boʻlishidan qatʼiy nazar ular ham er va xotinning umumiy mol-mulki hisoblanadi.

Er va xotinning biri uy-roʻzgʻor ishlarini yuritish, bolalarni parvarish qilish bilan band boʻlgan yoki boshqa uzrli sabablariga koʻra mustaqil ish haqi va boshqa daromadlarga ega boʻlmagan taqdirda ham er va xotin umumiy mol-mulkka nisbatan teng huquqqa ega boʻladi.

Fermer xoʻjaligi va dehqon xoʻjaligi aʼzolarining birgalikdagi mulki boʻlgan mol-mulkka nisbatan er va xotinning egalik qilish, foydalanish va tasarruf etish huquqlari fermer xoʻjaligi va dehqon hoʻjaligi toʻgʻrisidagi qonunlarda belgilanadi. Fermer xoʻjaligi va dehqon xoʻjaligining mol-mulkini boʻlish 223- va 225-moddalarda nazarda tutilgan qoidalar asosida amalga oshiriladi.    

Savolga tuman FHDYo boʻlimi mudirasi

Sanobar XOlbOyeva javob berdi.