USTOZLAR IZIDAN BORIB...
Men 1995-yilda, 32-sonli maktabni tugatgan vaqtimda otajonim va akam, opalarim singari oʻqituvchi boʻlaman, deb qatʼiy ahd qilgan edim. Chunki, ular orqali bu kasbning sharafi va masʼuliyatini ham chuqur his qilaman, deb oʻylagandim. Biroq Nukus Davlat pedagogika institutining tarix-geografiya fakultetini bitirib kelib, 38-sonli maktabda oʻz soham boʻyicha dars bera boshlaganimda ustoz-murabbiylik men oʻylaganimdan ham mashaqqatliroq ekanini his qildim. Chunki, sinfxonani toʻldirib oʻtiradigan 25-30 nafar atrofidagi, har biri har xil oila muhitida tarbiyalangan, har biri oʻziga xos xulq-atvorli bolalarning barchasining koʻngliga yoʻl topib, muomala qilish, oʻz faningga qiziqishini oshirish oson emas.
Men avvalo oʻz mehnat faoliyatimni boshlagan bu taʼlim maskani tumanimizdagi eng nufuzli, bolalarga taʼlim-tarbiya berish borasida oʻziga xos maktab yaratgan mohir pedagoglar jamlangan maskan ekanligini aytib oʻtishni istar edim. Men shu dargohda oʻz kasbining mohir egalari boʻlgan kasbdosh ustozlarim Toʻliboy aka, Norgul opa, Imsinoy opa, Maxsuda opalardan dars oʻtish mahorati, bolalarning diqqatini oʻtilayotgan dars saboqlariga toʻla jalb qilish sir-asrorlarini oʻrgandim. Sharofat opa Chorshamova, Sayyora opa Xudoyberganova, Soatboy aka Begimov, Inobat opa Otajonova kabi koʻplab ustoz oʻqituvchilar menga erinmay beminnat maslahatlar berishdi.
Bugungi kunda ham yosh avlodni barkamol insonlar qilib tarbiyalashdek mashaqqatli kasbda halol mehnat qilayotgan maktabimiz oʻqituvchilari jamoasi bir-birimizdan oʻrganib, oʻrgatib, kasbimizga doir yangiliklardan, ilgʻor pedtexnologiyalardan unumli foydalanib, darslarimiz yuqori samarali boʻlishiga intilayapmiz. Natijada oʻquvchilarimiz turli koʻrik-tanlovlarda, bilimlar bellashuvi va fan olimpiadalarida, sport musobaqalarida yuqori oʻrinlarni egallab kelishmoqda. Butun dunyoda globallashuv jarayoni shiddat bilan kechayotgan tezkor davr bizning zimmamizga dunyoqarashi keng, milliy urf-odatlarimiz, qadriyatlarimizga, madaniyatimizga yuksak hurmat bilan qaraydigan, ularni chuqur oʻrganib, kerakli saboqlarni ola biladigan yuksak maʼnaviyatli oʻgʻil-qizlarni tarbiyalash vazifasini qoʻymoqda. Men maktabimiz oʻqituvchilar jamoasi bu vazifani sidqidildan ado etadilar, deb ishonaman.
Xolbika DURDIYeVA,
38-sonli maktab oʻqituvchisi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
