KEKSALAR BIZGA FAQAT YaXShILIK TILAShADI

Men bir oilani bilar edim. U oilaga agar qish faslida borib qolsak ham hovlisi atrofi supurilgan, xonadoni orasta, hamma yogʻi chinnidek top-toza boʻlib turardi. Bu oiladagi ozodalikka, fayzga koʻpchilik havas qilishardi. Uydagi keksa nuroniy onaxon bu dunyodan koʻz yumdi. Uyda kelin va qiz nabiralari bor. Hozirgi kunda shu uyning yon-atrofidan oʻtib qolsak, ilgarigi ozodalik, saranjomlikdan asar ham yoʻqligini koʻramiz.

Nahotki bu kelin rahmatlik qaynonasidan oʻrnak ola olmagan boʻlsa, deya oʻylayman har gal shu xonadon oldidan oʻtganimda. Nahotki oʻsha ozodalik faqat qaynona uchungina kerak boʻlgan boʻlsa. Axir kelin ham ertaga qaynona boʻladi-ku. Shularni oʻylasam, yoshlik paytlarimda buvim rahmatlik aytgan "qarisi bor uyning parisi boʻladi”, degan gaplari yodimga tushadi. Bu gapning magʻzini chaqqandek boʻlaman.

Koʻpincha kelinlar suhbatiga quloq solsangiz, ular qaynonasining kamchiliklarini aytishayotganiga guvoh boʻlasiz. Shunday damlarda yuqoridagi aytganim, tanish hovli koʻz oʻngimda jonlanadi. Qissadan hissa shuki, qaynona ham ona! Kelinlar va boʻlgʻusi kelinlarga qarata shunday degim keladi:

– Qaynonalarning har bir oʻgiti, maslahati sizlar uchun oltin sirgʻa boʻlib quloqlaringizga osilsin! Axir ular sizlarni joidan ortiq koʻruvchi onangizday insonlardir. Ular faqat sizlarga yaxshilik tilashini unutmang!

Inobat OTAJONOVA,

38-sonli maktab oʻqituvchisi. 

(Foto - http://uza.uz)