OʻQITUVChI MEHNATI NATIJASI OʻQUVChILAR KAMOLIDA KOʻRINADI

Mana, mustaqilligimizning 24 yilligi arafasidamiz. Mustaqillik – xalqimizning asriy orzusi boʻlib, bizga juda koʻp imkoniyatlar olib keldi. Oʻquvchilar uzluksiz taʼlim bilan hunarni birga olish imkoniyatiga ega boʻldi. Oldinlari kasb-hunar oʻrganish uchun olis shaharlarga borish zarur boʻlsa, endi oilada, ota-ona bagʻridan uzoq ketmagan holda istagan kasb egasi boʻlish imkoniyatiga ega boʻldi.

Mana shunday shiddat bilan rivojlanib borayotgan davrda ayniqsa biz – oʻqituvchilar oldiga qoʻyilayotgan talab juda muhim. Oʻqituvchi davr talabiga monand qadam tashlashi zarur. Talabalik davrimda ustozimning shu gaplari mening uchun hamon shiordek yangraydi: Qobiliyatsiz shifokor bir odamning hayotini zaharlab qoʻysa, xatolashgan oʻqituvchi bir paytda butun bir sinf oʻquvchilarining ongini zaharlab qoʻyishi mumkin.

Oʻquvchilar har doim oʻz ustozlariga taqlid qilishni yaxshi koʻrishadi. Shuning uchun oʻqituvchi nafaqat maktabda, oilada, jamoat joylarida, farzand tarbiyasida ham namuna boʻlishi zarur.

Oʻz hayotiy tajribamdan xulosa qilsam, 2003 yildan boshlab deyarli har yili oʻquvchilarim fan olimpiadasi, keyinchalik bilimlar bellashuvi tuman bosqichida gʻoliblikni qoʻlga kiritib, 3-bosqich Respublika tanlovida qatnashib kelmoqda. Bir qancha oʻquvchilarim oliy oʻquv yurtlariga davlat granti asosida kirish baxtiga muyassar boʻldi. 2013-2014 oʻquv yilida birdaniga uch nafar oʻquvchim tumanda bilimlar bellashuvi gʻolibi boʻldi. Ayniqsa, 2014-2015 oʻquv yili men uchun yana ham quvonchli boʻldi. Oʻquvchim Oyzoda Haytanova 3-bosqich - Respublika fanlar olimpiadasida yaxshi qatnashib qaytdi. Sundetova Feruza va Haytanova Gulzodalar tumanda bilimlar bellashuvi gʻolibi sifatida 3-bosqich Respublika bosqichiga yoʻllanma oldi. Haytanova Gulzoda 3-bosqich gʻolibi boʻlib, Toshkent shahrida oʻtkaziladigan 4-bosqichga yoʻllanma olishi men uchun juda katta faxr va quvonch boʻldi.

Bundan 4-yil avval 11-sinf oʻquvchim Usenboyeva Zarina olimpiada gʻolibi sifatida Toshkent shahrida oʻtkazilgan 4-bosqich fan olimpiadasida qatnashgan edi. Ikkinchi bor bu quvonch meni oʻz ogʻushiga oldi.

Men oʻzim dars berayotgan sinflarda sinf kutubxonasi tashkil qilaman. Masalan, sinfda 30 oʻquvchi boʻlsa, har biri imkoniga loyiq bir yoki ikkita badiiy kitob olib kelib, sinf kutubxonasiga aʼzo boʻladi. Qarabsizki, bir badiiy kitob olgan oʻquvchi 30 ta badiiy kitob oʻqish imkoniga ega boʻladi. Darsdan tashqari  paytlarda "Men sevgan badiiy qahramon”, "Mening sevimli kitobim”, "Men yoqtirgan shoir”,  yoki "Husnixat - husn”, "Kimning xati chiroyli” mavzularida oʻzaro musobaqalar oʻtkazilsa va bunga barcha oʻquvchilar jalb qilinsa, albatta yaxshi natija beradi. Oʻquvchining fikrlash qobiliyati oʻsadi, soʻz boyligi ortib boradi, oʻquvchidan ortiqcha narsalar bilan mashgʻul boʻlish fikri chekinadi. Oʻquvchilarning oʻz mehnatlarining samarasini koʻrishi albatta quvonchli hol.

Davlatimiz har bir ishni eʼtibordan chetda qoldirmaydi, 4-bosqich bilimlar bellashuvida qatnashgan oʻquvchim Gulzodaning intellektual bilimdonlar oromgohida dam olishi, oʻquvchimning olisdan turib telefonda hayajon bilan oʻz quvonchlari, yaxshi dam olayotgani, Oʻzbekistonning barcha viloyatlaridan borgan oʻquvchi-gʻoliblar bilan doʻstlashgani haqida toʻlqinlanib gapirishi meni juda quvontirdi. Yangi zafarlar sari chorladi. Chunki kamtarin, zaxmatkash, oddiy oiladan chiqqan oʻquvchining bunday joylarda dam olishi orqali men oʻz mehnatimning samarasini koʻrdim.

Davlatimiz bizga yurtimizning kelajagi boʻlgan yosh avlod tarbiyasidek masʼuliyatli va sharafli ishni ishonib topshirgan ekan, uni oqlashimiz, yosh avlodni Oʻzbekiston atalmish buyuk mustaqil yurtga loyiq farzandlar qilib tarbiyalashimiz shart.

Chunki biz asrlar davomida tibbiyot, ilmu-fan, buyuk isteʼdodlar makoni boʻlib dunyoni lol qoldirib kelayotgan yurt farzandlarini tarbiyalamoqdamiz. Ajdodlarga munosib avlod tayyorlashda siz hamkasblarimga yangi oʻqish yilida omad, kuch-gʻayrat tilayman.

Jumagul QOʻShChANOVA,