ISTIQLOL BERGAN FAROVON TURMUSh

Istiqlol bayramiga ham sanoqli kunlar qoldi. Biz mustaqilligimizning qadriga yetish uchun bosib oʻtgan tarixan qisqa davrda nimalarni boshdan kechirdik, muhtaram Prezidentimiz aytganidek, "Biz kecha kim edigu bugun kim boʻldik” degan savolni har birimiz oʻzimizga berib koʻrishimiz kerak.

Yurtimiz istiqlolga erishganidan buyon tumanimiz hududida juda koʻp ishlar amalga oshirildi. Katta xajmda bunyodkorlik ishlari  amalga oshirilib, yangi bogʻchalar, maktablar, kasb-hunar kollejlari va akademik litsey, yangi bozorlar, doʻkonlar, toʻyxonalar, istirohat bogʻlari bunyod etildi. Bularning hech biri mustaqillikdan oldingi davrda boʻlgan emas. Hozirgi kunda tumanimiz yoshlari chet ellarda tahsil olishmoqda. Tadbirkorlarimiz esa chet davlatlar bilan savdo aloqalarini oʻrnatib, tumanimizda yetishtirilgan mahsulotlarni chet ellarga olib chiqishmoqda.

Yurtboshimiz rahnamoligida mamlakatimizda amalga oshiri-layotgan kuchli ijtimoiy siyosat natijalari nuroniylarga koʻrsatilayotgan eʼtibor va gʻamxoʻrlikda oʻz ifodasini topmoqda. 2015-yil "Keksalarni eʼzozlash yili” deb eʼlon qilindi. Shu munosabat bilan "Keksalarni eʼzozlash yili”  Davlat Dasturida belgilangan vazifalarga muvofiq bizning fondimiz tomonidan ham bir qancha ishlar amalga oshirildi.

Faxriylarni, xususan, Ikkinchi jahon urushi qatnashchilari va front ortida mehnat qilgan yurtdoshlarimizni ijtimoiy muhofazalash, ularga moddiy-maʼnaviy koʻmak berish ustuvor vazifalarimizdan biridir. Tumanimizda 16 nafar urush qatnashchisi, 319 nafar front-orti faxriylari, yakka-yolgʻiz fuqarolarni har tomonlama qoʻllab-quvvatlash boʻyicha tegishli ishlar amalga oshirildi. 16 nafar urush qatnashchisining barchasiga analogli va raqamli televideniya signallarini qabul qiladigan televizorlar berildi. Shuningdek, 1941-1945-yillardagi urush va mehnat fronti faxriylari, shuningdek yolgʻiz va ijtimoiy madadga muhtoj keksa kishilarning 2015-2017-yillarda uy-joy sharoitlarini yaxshilashning hududiy dasturlarini ishlab chiqdi  va ijtimoiy qoʻllab-quvvatlashga muhtoj keksalarning uylarini hashar yoʻli bilan joriy taʼmirlash, zarur hollarda esa mukammal taʼmirlashni, shuningdek hovlilarini obodonlashtirishni nazarda tutgan holda ularning turar-joy sharoitlarini yaxshilash boʻyicha amaliy ishlar qilinishi rejalashtirilmoqda.

Bundan tashqari, fuqarolar yigʻinlarida 15-apreldan 15-may oraligʻida "Keksalar duosini olaylik” shiori ostida aktsiya oʻtkazildi. Aktsiya davomida xududdagi 2000 nafardan ziyod qariya otaxonlar va onaxonlar savobli ishga qamrab olindi. Xududdagi barcha umumtaʼlim maktablari va kasb-hunar kollejlarida keksalar bilan 111 ta uchrashuvlar, badiiy kechalar va kontsert dasturlari tashkil etildi. Bunga 1024 nafar keksalarimiz qatnashdilar, xomiylar tomonidan 3 mln. soʻmlik sovgʻalar berildi.

Hozirgi kunga kelib tumanimizdagi 47 ta ovul hamda mahalla fuqarolar yigʻinlarida Mustaqilligimzning 24 yilligiga tayyorgarlik koʻrish va uni yuqori saviyada oʻtkazish boʻyicha qizgʻin ish olib borilayapti.  Barcha mahallalarda bayramga tayyorgarlik koʻrish va hududlarni obodonlashtirish boʻyicha guruhlar tuzildi. Mustaqillik bayrami arafasida shahrimizning koʻrkiga koʻrk qoʻshadigan bir qator binolar, xususan "Kamolot uyi”, 70 ta namunali uylar, "Gulzor” mahalla fuqarolar yigʻinining yangi binosi va mahalla guzari, chekka qishloqlarimizda goʻzallik salonlari, savdo va maishiy hizmat koʻrsatish shoxobchalarini foydalanishga topshirish koʻzda tutilgan.

Shuningdek, hozirgi kunda  tumanimiz hududida 6 ta sunʼiy qoplamali chim yotqizilgan mini futbol maydonchalari mavjud boʻlib, bayram arafasida yana 2 ta shunday maydonning foydalanishga topshirilishi kutilmoqda.

Tumanimizdagi har bir fuqaro istiqlol bayramini yuragida oʻzgacha fahr va iftihor bilan kutmoqda, desam mubolagʻa qilmagan boʻlaman. Istiqlolimizning 24 yillik shukuhi har bir mahalla, har bir xonadonga kirib borib, hammaga bayram kayfiyatini ulashmoqda. Men barcha yurtdoshlarimizni istiqlolimizning 24 yilligi bilan muborakbod etaman.

Rustam ROʻZMETOV, "Mahalla” xayriya jamoat fondi tuman boʻlinmasi raisi, xalq deputatlari tuman Kengashi deputati.

(Foto - http://uza.uz)