HAMJIHATLIK SAMARASI

Bugungi kunda tumanimizda boʻlayotgan rivojlanishni koʻrib, kechagi kunlar bilan solshtirsak, ming bora shukronalar aytsak arziydi. Yurtimizda olib borilayotgan bunyodkorlik ishlari, yoshlarimizning keksalarga koʻrsatayotgan hurmat-ehtiromlarini aytmaysizmi? Bularning hammasi avvalo oila, mahalla va taʼlim muassasalarining hamkorligi natijasida farzandlarning olayotgan taʼlimtarbiyasi boʻlsa ne ajab. Bizning davlatimizda har bir fuqaro vijdon erkinligini his qilib yashamoqda. Davlatimizda bu borada olib borilayotgan odilona siyosat natijasi oʻlaroq har kim oʻzi xohlagan dinga eʼtiqod qilish, yoki hech qaysi dinga eʼtiqod qilmaslik huquqiga ega.

Mana, elimizga muqaddas Ramazon oyi kirib keldi. Yurtimizdagi moʻʼminu musulmonlar ushbu oyda roʻza tutib, Allohning savobidan bahramand boʻlib, umrguzaronlik qilmoqdalar.

Men imomlik qilayotgan Xitoy ovuli hududida ham koʻp savobli ishlar qilinmoqda. Hududdagi barcha qabristonlar atroflari tozalanib, tartibga keltirildi va lozim boʻlgan joylarda taʼmirlash ishlari olib borilmoqda. Koʻchalar, xonadonlarning tozaligi va obodligiga eʼtibor qaratilmoqda va bu borada targʻibot-tashviqot ishlari doimiy ravishda olib borilmoqda. Bu ishlarning olib borilishida menga yaqindan amaliy yordam berib kelayotgan Xitoy OFY raisi Davlatboy Atajonov, "Namuna” MFY raisi Koʻklan Yusupov, "Tor yop” MFY raisi Davlatboy Oʻtaboyev, qolaversa, xalq deputatlari tuman Kengashi deputati Gulmirza Bobojonov va mahalla imomlariga chuqur minnatdorchilik bildirmoqchiman.

Ularning yordami bilan hududimizda har bir maʼraka, toʻyu-tomoshalar ixcham, kamchiqim va tartibli ravishda oʻtkazilmoqda.

Fursatdan foydalanib butun tumanimiz ahlining, barcha moʻminu musulmonlarning Roʻzai Ramazon savobidan bahramand boʻlishligini tilab qolamiz.

Farhod AVEZOV, Xitoy ovuli.

(Foto - http://muslim.uz)