Suv taʼminoti tizimiga oʻzboshimchalik bilan ulanish holatlari bartaraf etilmoqda

Hayot manbai boʻlmish suvning har bir tomchisi qadrli boʻlgan bugungi davrda, ichimlik suvi taʼminoti va oqova suv xizmatlaridan oqilona foydalanish nafaqat iqtisodiy, balki yuksak maʼnaviy masʼuliyatga aylanib bormoqda. Oʻzbekiston Respublikasi Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspektsiyasining Qoraqalpogʻiston Respublikasi hududiy boshqarmasi tomonidan ayni shu yoʻnalishda, yaʼni isteʼmolchilar bilan huquqiy munosabatlarni tartibga solish va suvdan foydalanish madaniyatini yuksaltirish borasida keng koʻlamli ishlar amalga oshirilmoqda.

Inspektsiyaning ichimlik suvidan oqilona foydalanish va sotishni muvofiqlashtirish hamda oqova suv xizmatlaridan foydalanish boʻlimi xodimlari faoliyatida bugun "mahallabay" ishlash tizimi asosiy mezonga aylangan. Mazkur izchil oʻrganishlar natijasida suv taʼminoti tizimiga oʻzboshimchalik bilan ulangan, biroq rasmiy shartnomaviy munosabatlarga kirishmagan koʻplab holatlar aniqlanib, ularni huquqiy jihatdan rasmiylashtirish choralari koʻrilmoqda. Ana shunday maqsadli tadbirlarning navbatdagi manzili Amudaryo tumani boʻlib, bu yerda inspektsiya mutaxassislari nafaqat nazoratchi, balki sohadagi muammolarni bartaraf etuvchi koʻmakchi sifatida ham faoliyat yuritdilar.

Raqamlar va tahlillarga nazar tashlaydigan boʻlsak, joriy yilning oʻtgan davri mobaynida Qoraqalpogʻiston Respublikasi boʻyicha jami 11 ta maqsadli oʻrganish tadbirlari tashkil etildi. Ushbu izlanishlar besamar ketmadi – natijada 29 ta yangi isteʼmolchi bilan ichimlik suvi taʼminoti boʻyicha rasmiy shartnomalar tuzilishiga erishildi. Bu oddiygina statistik koʻrsatkich emas, balki 129 nafar aholining markazlashgan suv taʼminoti tizimiga qonuniy tarzda qamrab olinishi demakdir.

Oʻrganishlar davomida suvdan noqonuniy foydalanishni yoki uni isrof qilishni odatga aylantirgan isteʼmolchilar ham aniqlanmoqda. Bunday holatlarga qarshi inspektsiya tomonidan keskin va murosasiz kurash olib borilmoqda. Joriy yilning yanvar va fevral oylari yakunlariga koʻra, 46 nafar fuqaro va 7 ta yuridik tashkilot tomonidan suvdan foydalanish qoidalari qoʻpol ravishda buzilgani fosh etildi. Mazkur qoidabuzarliklarga nisbatan belgilangan jami 190,7 million soʻmlik maʼmuriy jarimalar shunchaki jazo emas, balki suv isrofiga befarq qarovchilar uchun jiddiy ogohlantirishdir.

Sohadagi islohotlar faqatgina jazo va nazoratdan iborat emas. Aholining ijtimoiy ongini oʻzgartirish, suvni tejash koʻnikmasini shakllantirish inspektsiya faoliyatining ustuvor yoʻnalishi boʻlib qolmoqda. Shu maqsadda ikki oy davomida 40 ga yaqin targʻibot tadbirlari oʻtkazildi.

Inspektsiya xodimlari tarmoqqa noqonuniy ulanishlarning oqibatlari va oqova suv xizmatlaridan foydalanish madaniyati haqidagi tushuntirishlar bilan har bir xonadonga kirib bormoqda. Bundan tashqari, Oʻzbekiston mahallalar uyushmasi bilan imzolangan memorandum ijrosi doirasida 39 ta mahalla fuqarolar yigʻinida oʻtkazilgan uchrashuvlar muammolarni bevosita jamoatchilik bilan bamaslahat hal etish imkonini berdi.

Ichimlik suvi va oqova suv tarmoqlariga ulanish uchun berilgan texnik shartlar yuzasidan oʻtkazilgan 39 ta nazorat tadbiri davomida esa texnik talablarni chetlab oʻtishga uringan 4 ta holat aniqlandi. Ushbu kamchiliklar boʻyicha 2 nafar fuqaroga nisbatan Maʼmuriy javobgarlik toʻgʻrisidagi kodeksning 163-moddasi asosida 8,2 million soʻm jarima qoʻllanildi.

Amalga oshirilayotgan bu kabi tizimli tadbirlar shunchaki nazorat emas, balki kelajak avlod uchun toza ichimlik suvi zaxiralarini asrab qolishga qaratilgan strategik harakatdir. Zero, suvga boʻlgan munosabat – bu bizning kelajakka, ona tabiatga va qonun ustuvorligiga boʻlgan munosabatimiz koʻzgusidir.