Ichimlik suvining sifati ustidan qatʼiy nazorat oʻrnatilmoqda

Suv — nafaqat hayot manbai, balki kelajak avlodlar oldidagi yuksak masʼuliyat demakdir. Ayniqsa, ekologik muvozanatni saqlash va tabiiy resurslardan oqilona foydalanish global ahamiyat kasb etayotgan bugungi davrda, ichimlik suvining har bir tomchisini qadrlash dolzarb masalaga aylangan.

Oʻzbekiston Respublikasi Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspektsiyasining Qoraqalpogʻiston Respublikasi hududiy boshqarmasi bu borada tizimli nazoratni amalga oshirib, sohada qonun ustuvorligini taʼminlash yoʻlida samarali faoliyat yuritmoqda qilmoqda.

Bu borada avvalo isteʼmol qilinayotgan suvning sifat koʻrsatkichlariga alohida eʼtibor qaratilmoqda. Zero, aholi salomatligi bevosita isteʼmol qilinayotgan suvning tozaligiga bogʻliq. Shu sababli, Qoraqalpogʻiston Respublikasi Sanitariya-epidemiologik osoyishtalik va jamoat salomatligi qoʻmitasi bilan yaqin hamkorlik oʻrnatilib, hududlar kesimida ichimlik suvi sifati boʻyicha jami 213 ta laboratoriya tahlillari olindi. Bu koʻrsatkich har bir xonadonga va tashkilotga yetib borayotgan suvning davlat standartlariga muvofiqligini taʼminlash yoʻlidagi muhim qadamdir.

Inspektsiyaning ichimlik suvidan oqilona foydalanish va sotishni muvofiqlashtirish hamda oqova suv xizmatlaridan foydalanish boʻlimi xodimlari rejaga asosan Amudaryo tumanida ham boʻlib, tuman Sanitariya-epidemiologik osoyishtalik va jamoat salomatligi boʻlimi xodimlari bilan hamkorlikda aholi xonadonlari va tashkilotlarga yetkazib berilayotgan ichimlik suvining sifatini taʼminlash borasida oʻrganish ishlarini olib bordilar.

Nazorat tadbirlari faqatgina sifat bilan cheklanib qolmay, balki davlat mablagʻlaridan foydalanuvchi tashkilotlardagi ichki intizomni ham qamrab olmoqda. Birgina joriy yilning yanvar-fevral oylarida Qoraqalpogʻiston Respublikasi boʻyicha 63 ta byudjet tashkilotlarida ichimlik suvidan foydalanish qoidalariga rioya qilinishi holati chuqur oʻrganildi.

Afsuski, tekshiruvlar natijasida 15 ta holatda jiddiy kamchiliklar aniqlanib, ularni bartaraf etish boʻyicha tegishli koʻrsatmalar berildi. Masʼuliyatsizlikka yoʻl qoʻygan va belgilangan tartib-qoidalarni buzgan 7 nafar byudjet tashkiloti xodimlariga nisbatan Maʼmuriy javobgarlik toʻgʻrisidagi kodeksning tegishli moddalariga asosan jami 30 million soʻm miqdorida jarimalar qoʻllanildi. Bu choralar davlat mulki va resurslariga boʻlgan munosabatni tubdan oʻzgartirishga xizmat qiladi.

Inspektsiya oldida turgan eng asosiy vazifa — faqatgina jazolash emas, balki aholi va tadbirkorlar oʻrtasida suvdan foydalanishning yuksak madaniyatini shakllantirish, aholiga yetkazib berilayotgan ichimlik suvining belgilangan talablarga mos boʻlishini taʼminlashdir. Zero, sifat bor joyda salomatlik boʻladi, tejamkorlik bor joyda esa isrofgarchilikka chek qoʻyiladi.

Qoraqalpogʻiston Respublikasi hududiy nazorat qilish inspektsiyasi tomonidan amalga oshirilayotgan bu kabi tizimli ishlar suv taʼminotida uzluksizlikni taʼminlash va sifatni kafolatlashga qaratilgan yaxlit strategiyaning bir qismidir. Zero, suv — bu shunchaki resurs emas, balki millatning sogʻligʻi, iqtisodiyotning barqarorligi va farovon turmushning kafolatidir.

Sohadagi nazorat tadbirlari kelgusida ham izchil davom ettirilib, har bir tomchi suvning hisob-kitobli, xizmatlar sifatining esa yuqori darajada boʻlishi taʼminlanadi.