"Xorijiy tillarni oʻqitish boʻyicha eng yaxshi maktab" tanlovining tuman bosqichi oʻtkazildi

Amudaryo tumanida xorijiy tillarni oʻqitish sifatini yanada oshirish, maktablar oʻrtasida sogʻlom raqobat muhitini shakllantirish va taʼlim samaradorligini yuksaltirish maqsadida “Xorijiy tillarni oʻqitish boʻyicha eng yaxshi maktab” tanlovining tuman bosqichi oʻtkazildi.

1-sonli maktabda oʻtkazilgan mazkur tanlovda Qoraqalpogʻiston Respublikasi Taʼlim markazi direktori Nargiza Matlatipova, tuman Maktabgacha va maktab taʼlimi boʻlimi mudiri Yalgʻashboy Shamuratov, tuman ixtisoslashtirilgan maktabi masʼul xodimi Muhayyo Toirova hamda tuman Maktabgacha va maktab taʼlimi boʻlimining masʼul xodimlari ishtirok etdi.

Tanlovning asosiy maqsadi maktablarda xorijiy tillarni oʻqitish darajasi va sifatini oshirishni ragʻbatlantirish, xalqaro mezonlar va standartlar asosida yuqori natijalarga erishish uchun mustahkam zamin yaratishdan iborat. Shuningdek, taʼlim muassasalarida amalga oshirilayotgan ishlar natijadorligini tahlil qilish, samarali faoliyat olib borayotgan oʻqituvchilarni aniqlash va ragʻbatlantirish, ilgʻor tajribalarni ommalashtirish ham tanlovning ustuvor vazifalari sifatida belgilandi.

Nizomga muvofiq, tanlovda har bir maktabdan bitta xorijiy til yoʻnalishi — ingliz, nemis yoki frantsuz tili boʻyicha 5 nafar 7–9-sinf oʻquvchilaridan tashkil topgan jamoa qatnashdi. Amudaryo tumanidagi 84 ta umumtaʼlim maktabidan jami 420 nafar oʻquvchi mazkur bilimlar sinovida ishtirok etdi. Bu esa tanlovning keng qamrovli va yuqori raqobat muhitida oʻtganini koʻrsatadi.

Tanlovda ishtirok etish istagini bildirgan maktablar 2025-yilning sentyabr–dekabr oylarida Maktabgacha va maktab taʼlimi vazirligining axborot tizimiga belgilangan asosiy koʻrsatkichlarni kiritgan hamda ular tizim tomonidan baholangan. Asosiy bosqichda esa oʻquvchilarning xorijiy tilni bilish darajasi test sinovlari orqali aniqlandi. Ishtirokchilarga xalqaro taʼlim standartlari asosida tayyorlangan 30 ta topshiriqni bajarish uchun 90 daqiqa vaqt ajratildi.

Yakuniy natijalar yaqin vaqt ichida eʼlon qilinadi va tanlovning tuman bosqichida 1-oʻrin sohibiga 100 million soʻm, 2-oʻringa 75 million soʻm, 3-oʻringa esa 50 million soʻm miqdorida Prezident sovrini beriladi.

Mazkur tanlov nafaqat oʻquvchilarning bilimini sinovdan oʻtkazish, balki maktablarda xorijiy tillarni oʻqitish sifatini yangi bosqichga olib chiqish, oʻqituvchilar mehnatini munosib baholash va taʼlim muassasalari oʻrtasida sogʻlom raqobatni kuchaytirishda muhim ahamiyat kasb etmoqda.

Har yili muntazam ravishda oʻtkazib kelinayotgan ushbu tanlov maktablarda xorijiy tillarni oʻqitish boʻyicha amalga oshirilayotgan chora-tadbirlar natijadorligini tahlil qilish, xorijiy tillar boʻyicha oʻquvchilarga sifatli taʼlim berayotgan, samarali faoliyat olib borayotgan oʻqituvchilarni aniqlash va ragʻbatlantirishda muhim ahamiyatga ega boʻlmoqda. Qolaversa, maktablarda xorijiy tillarni oʻrgatish boʻyicha koʻrsatilayotgan taʼlim xizmatlari sifati va samaradorligini oshirish, ularda amalga oshirilayotgan ishlar va erishilayotgan natijalar toʻgʻrisida keng jamoatchilikni xolis axborotlar bilan taʼminlashda ham ushbu tanlovning oʻrni beqiyosdir.