“TURMUSh” PROFILAKTIK TADBIRI: MANZILLI YoRDAM VA AMALIY EʼTIBOR

Joriy yilning 18-fevral sanasidan 18-mart kuniga qadar respublika miqyosida oʻtkazilayotgan “Turmush” profilaktik tadbiri aholining ijtimoiy himoyaga muhtoj qatlamlarini har tomonlama qoʻllab-quvvatlash, ayniqsa, xotin-qizlar muammolarini oʻz vaqtida aniqlash va bartaraf etishda muhim ahamiyat kasb etmoqda. Mazkur tadbir doirasida Amudaryo tumanida ham tegishli hamkor tashkilotlar ishtirokida keng qamrovli manzilli ishlar amalga oshirilib, fuqarolarning turmush sharoitini yaxshilash, salomatligini muhofaza qilish va ijtimoiy muhofazasini kuchaytirishga alohida eʼtibor qaratilmoqda.

Xususan, tuman hududidagi Navoiy, Oybek va Boʻston mahallalarida istiqomat qilayotgan ogʻir hayotiy vaziyatga tushib qolgan ayol-qizlar hamda yolgʻiz yashovchi fuqarolar holidan xabar olinib, ularning kundalik ehtiyojlari, salomatligi va yashash sharoiti atroflicha oʻrganildi. Bu kabi uchrashuv va suhbatlar orqali aholining muammolarini joyida aniqlash, ularga tezkor va amaliy yechim topish imkoniyati yanada kengaymoqda.

Tadbir davomida ijtimoiy koʻmakka muhtoj fuqarolarga bepul dori-darmonlar yetkazib berildi. Bu esa, ayniqsa, sogʻligʻi bilan bogʻliq muammolari mavjud, biroq tibbiy xizmatdan toʻliq foydalanish imkoniyati cheklangan ayollar uchun muhim koʻmak boʻldi. Shu bilan birga, koʻchma ultratovush tashxisi uskunasi yordamida tibbiy koʻriklar tashkil etilgani aholi salomatligini muhofaza qilish borasidagi ishlar samarasini yanada oshirdi. Mutaxassislar tomonidan oʻtkazilgan tekshiruvlar natijasida sogʻligʻida muammolar kuzatilgan fuqarolarga tegishli tavsiyalar berildi, zarur holatlarda esa ularni qoʻshimcha davolanish yoki chuqurlashtirilgan tibbiy koʻrikka yoʻnaltirish choralari koʻrildi.

Tadbir doirasida amalga oshirilgan ishlar faqat tibbiy yordam bilan cheklanib qolmadi. “Inson” ijtimoiy xizmatlar markazi xodimlari tomonidan yolgʻiz yashovchi ayollarga biriktirilgan yordamchi xodimlar faoliyati ham oʻrganildi. Xususan, mazkur xodimlar tomonidan koʻrsatilayotgan xizmatlar sifati, ularning oʻz vazifalariga masʼuliyat bilan yondashayotgani, fuqarolar ehtiyojlariga qanchalik eʼtibor qaratayotgani amalda tekshirildi. Jarayonda yolgʻiz yashovchi ayollar bilan suhbatlar oʻtkazilib, ulardan koʻrsatilayotgan xizmatlardan rozi yoki norozi ekani soʻraldi. Bu esa ijtimoiy xizmatlar tizimidagi kamchiliklarni oʻz vaqtida aniqlash, xizmat sifatini oshirish va fuqarolar murojaatlariga tezkor munosabat bildirishda muhim omil boʻlmoqda.

Shuningdek, yolgʻiz yashovchi ayollarning xavfsizligini taʼminlash masalasiga ham jiddiy eʼtibor qaratildi. Xususan, ularning xonadonlariga qoʻriqlash pultlari oʻrnatilib, turli xavf-xatarlarning oldini olishga qaratilgan amaliy choralar koʻrildi. Bu kabi yondashuv, avvalo, fuqarolarning tinch va xotirjam yashashini taʼminlash, ularni turli tazyiq va tahdidlardan asrash, zarurat tugʻilgan hollarda tezkor yordam chaqirish imkoniyatini yaratishga xizmat qiladi. Shu bilan bir qatorda, profilaktik suhbatlar ham tashkil etilib, xotin-qizlarning huquqiy ongi va huquqiy madaniyatini yuksaltirish, ularga oʻz huquq va manfaatlarini himoya qilish mexanizmlarini tushuntirishga alohida ahamiyat berildi.

Mutaxassislar taʼkidlaganidek, “Turmush” profilaktik tadbiri ijtimoiy himoyaga muhtoj fuqarolarni qoʻllab-quvvatlash, ularning muammolarini manzilli oʻrganish va amaliy yordam koʻrsatishda muhim oʻrin tutadi. Ayniqsa, ogʻir turmush sharoitida yashayotgan ayol-qizlar, yolgʻiz fuqarolar va eʼtiborga muhtoj oilalarga nisbatan bunday gʻamxoʻrlik jamiyatda mehr-oqibat, hamjihatlik va inson qadrini ulugʻlash kabi ezgu tamoyillarni yanada mustahkamlaydi.

Amudaryo tumanida oʻtkazilayotgan bu kabi manzilli ishlar aholi manfaatlarini himoya qilish, ayniqsa, xotin-qizlarning salomatligi, xavfsizligi va ijtimoiy farovonligini taʼminlash yoʻlida olib borilayotgan amaliy saʼy-harakatlarning yorqin ifodasidir. Eng muhimi, bunday tadbirlar orqali inson qadri, uning dardu tashvishi va ehtiyojlariga befarq boʻlmaslik tamoyili hayotda oʻzining amaliy ifodasini topmoqda.