Mehnat yarmarkasida 16 nafar fuqaro doimiy ishga joylashdi

Amudaryo tumanida aholi bandligini taʼminlash, ayniqsa ishsiz aliment toʻlovchilarni ishga joylashtirish orqali ularning ijtimoiy masʼuliyatini oshirishga qaratilgan navbatdagi amaliy tadbir — boʻsh ish oʻrinlari mehnat yarmarkasi tashkil etildi. Tuman Kamagʻalllikni qisqartirish va bandlikka koʻmaklashish boʻlimi, Bosh prokuratura huzuridagi Majburiy ijro byurosining Amudaryo tumani boʻlimi bilan hamkorlikda oʻtkazgan mazkur yarmarka ishsiz fuqarolarni munosib ish oʻrinlari bilan taʼminlash, ularga huquqiy maslahat berish hamda kasbga yoʻnaltirish kabi vazifalarni oʻzida jamladi.

Tadbirda hamkor tashkilotlar va tijorat banklari vakillari faol ishtirok etdi. Xususan, Oʻzbekiston mahallalar uyushmasi Amudaryo tumani boʻlimi boshligʻi Alisher Yuldashev, Majburiy ijro byurosi Amudaryo tumani boʻlimi boshligʻi, I-darajali yurist Medetbay Ismetullayev, shuningdek, tuman Ichki ishlar boʻlimi huzuridagi Probatsiya boʻlimi boshligʻi Ruslan Iskandarovlar yarmarka jarayonida ishtirokchilar bilan muloqot qilib, bandlik masalalaridagi mavjud imkoniyatlar va hamkorlik yoʻnalishlariga toʻxtaldi.

Mehnat yarmarkasida tumandagi 37 ta korxona va tashkilot 127 ta boʻsh ish oʻrni bilan qatnashdi. Bu esa ish qidirayotganlar uchun tanlov imkoniyatini kengaytirib, turli soha va yoʻnalishlarda ishga joylashishga yoʻl ochdi. Yarmarkada jami 52 nafar fuqaro ishtirok etdi. Ular orasida ishsizlar, probatsiya hisobida turgan shaxslar, aliment toʻlovchilar hamda nogironligi boʻlgan shaxslar borligi tadbirning ijtimoiy ahamiyatini yanada oshirdi.

Yarmarka davomida tuman Kamagʻalllikni qisqartirish va bandlikka koʻmaklashish boʻlimi xodimlari ishtirokchilarga har tomonlama amaliy yordam koʻrsatdi. Jumladan, boʻsh ish oʻrinlari va ularga ishga joylashish tartiblari tushuntirildi, ishsiz aholini kasb-hunarga oʻqitish imkoniyatlari boʻyicha maʼlumotlar berildi, fuqarolarni xorijiy davlatlarga qonuniy asosda ishga joylashtirish masalalari yuzasidan maslahatlar taqdim etildi. Shuningdek, mehnat huquqlari va mehnat muhofazasiga oid huquqiy koʻmakni kuchaytirish maqsadida videoroliklar, bannerlar, broshyura va bukletlar orqali keng targʻibot ishlari ham tashkil etildi.

Tadbirning amaliy natijasi sifatida 16 nafar fuqaro doimiy ishga joylashtirildi. Ulardan 10 nafari aliment toʻlovchilar boʻlib, 6 nafari esa ishsiz fuqarolardir.

Bundan tashqari, 17 nafar fuqaroga mehnat qonunchiligiga oid masalalar hamda mavjud boʻsh ish oʻrinlariga oʻtkaziladigan tanlovlar boʻyicha huquqiy maslahat va amaliy yordam koʻrsatildi. Yarmarka jarayonida alohida yoʻnalishlar kesimida ham tushuntirish ishlari olib borildi: 12 nafar fuqaroga boʻsh ish oʻrinlari va ishga joylashish tartiblari boʻyicha, 8 nafar fuqaroga kasb-hunar va tadbirkorlikka oʻqitish boʻyicha, 12 nafar fuqaroga xorijda ishlash imkoniyatlari boʻyicha, 8 nafar fuqaroga mehnat huquqlari va mehnat muhofazasi masalalari yuzasidan huquqiy maslahatlar, zarur maʼlumot va tavsiyalar berildi.

Amudaryo tumani Kamagʻalllikni qisqartirish va bandlikka koʻmaklashish boʻlimi tomonidan bunday tadbirlarni tizimli ravishda davom ettirish rejalashtirilgan.