Arna boʻyi mahallasida asalarichilik maktabi shakllanmoqda

Bugun qishloq xoʻjaligining eng nozik va shu bilan birga eng barakali yoʻnalishlaridan biri boʻlgan asalarichilik sohasi yurtimizda tobora rivojlanib bormoqda. Ayniqsa, bu sohada tajriba, sabr-toqat va tabiat bilan uygʻunlik muhim oʻrin tutadi. Amudaryo tumani Arna boʻyi mahallasida shakllanib borayotgan “asalarichilik maktabi” ana shu mezonlarning yorqin namunasidir.

Ushbu maktabning asoschisi, Arna boʻyi mahallasida yashovchi tadbirkor — “Farhod Qoʻchqorovich asali” dehqon xoʻjaligi rahbari, asalarichilik ustasi Farhod aka Bekimbetov uchun bu soha shunchaki kasb emas, balki ota-bobolardan meros boʻlib kelayotgan hayot yoʻlidir. Farhod aka Bekimbetov qariyb 20-yildan buyon asalarichilik bilan mustaqil shugʻullanib kelmoqda. 2016-yildan esa oʻz faoliyatini dehqon xoʻjaligi shaklida yoʻlga qoʻyib, sohaga zamonaviy yondashuvni olib kirdi.

Bugungi kunda Farhod aka oila aʼzolari va shogirdlari bilan birgalikda 550 ta quti asalari oilasini parvarishlamoqda. Bu raqamlar ortida nafaqat mehnat, balki katta masʼuliyat, uzluksiz kuzatuv va tabiat qonunlarini chuqur his etish yotadi. Dehqon xoʻjaligida asalari parvarishidan tashqari, asalari uyalari ishlab chiqarish ham yoʻlga qoʻyilgan boʻlib, bu mahalliy asalarichilar uchun qulaylik yaratmoqda.

Shuningdek, “Farhod Qoʻchqorovich asali” dehqon xoʻjaligida asalarichilikda keng qoʻllaniladigan dori-darmon va parvarish vositalari savdosi ham tashkil etilgan. Bu nafaqat xoʻjalik faoliyatini kengaytiradi, balki boshqa asalarichilar uchun ham qulay sharoit yaratadi.

Farhod aka asalarilarni parvarishlashda hudud tanlashga alohida eʼtibor beradi. U asalari oilalarining asosiy qismini Qoraoʻzak, Taxtakoʻpir va Xoʻjayli tumanlarida joylashtirishni maʼqul koʻradi. Mazkur hududlarda kunjut, beda, yantoq, yulgʻun hamda xalq tilida “boʻyan” deb ataluvchi qizilmiya kabi nektarga boy oʻsimliklar keng tarqalgan. Ana shunday tabiiy muhitda yetishtirilgan asal moʻl hosildorligi, yuqori sifati va shifobaxsh xususiyatlari bilan ajralib turadi.

Har yili Farhod Bekimbetov ikki marotaba asal hosilini yigʻib oladi. Har bir qutidan oʻrtacha 10-15 kilogrammgacha sifatli mahsulot olinayotgani xoʻjalik faoliyatining samaradorligini yaqqol namoyon qiladi.

Asalarichilik — bu faqat asal yetishtirish bilangina cheklanib qoladigan soha emas. U mum, propolis, gulchang, asalari suti kabi yuqori qiymatli, shifobaxsh va eksportbop mahsulotlarni oʻz ichiga olgan ulkan iqtisodiy salohiyatga ega yoʻnalishdir. Shu jihatdan qaraganda, Arna boʻyi mahallasini asalarichilik boʻyicha boy tajriba va anʼanalarga ega maskan, deb atash mumkin.

Mahallada shakllanib borayotgan “asalarichilik maktabi” esa nafaqat aholining barqaror daromad manbai, balki yoshlar uchun amaliy bilim va koʻnikmalarni egallash, mehnatga muhabbat va tabiatga hurmat ruhida tarbiyalanish maktabiga aylanmoqda. Bu esa qishloq taraqqiyoti, bandlikni taʼminlash va milliy mahsulotlarimiz salohiyatini oshirish yoʻlidagi yana bir muhim qadamdir. 

Charos Arslonova, tuman hokimligining Axborot xizmati rahbari.