“XAVFSIZ XONADON” OYLIGI DOIRASIDA PROFILAKTIK TADBIRLAR DAVOM ETMOQDA

Xalqimizda “Olov — tilsiz yov”, degan naql bor. Bir lahzalik eʼtiborsizlik yoki oddiy xavfsizlik qoidalariga rioya qilmaslik oqibatida yuzaga keladigan yongʻin inson hayoti, salomatligi va mol-mulkiga jiddiy ziyon yetkazishi mumkin. Ayniqsa, kuz-qish mavsumida isitish moslamalaridan foydalanishga boʻlgan ehtiyojning ortishi bu borada hushyorlikni ikki karra oshirishni talab etadi.

Shu sababli ham mamlakatimiz boʻylab joriy yilning 1-31-yanvar kunlari oraligʻida “Xavfsiz xonadon” oyligi oʻtkazilmoqda. Oylik doirasida aholi xonadonlari, koʻp qavatli uylar, talabalar yotoqxonalari, ijtimoiy soha obʼektlari, qurilish maydonlarida yongʻin xavfsizligi qoida va talablariga amal qilinishi, kelib chiqishi mumkin boʻlgan yongʻinlar va boshqa favqulodda holatlarning oldini olishga qaratilgan profilaktik-targʻibot tadbirlari oʻtkazilishi belgilangan. Amudaryo tumani Favqulodda vaziyatlar boʻlimi tomonidan ham mazkur oylik doirasida keng koʻlamli profilaktik tadbirlar yuqori saviyada tashkil etilmoqda.

Oylik doirasida boʻlim xodimlari joylarda boʻlib, aholiga tushuntirish ishlarini olib bormoqda. Bu borada navbatdagi manzil tumanning “Boʻston” mahallasi boʻldi. Mahalla markazida tashkil etilgan uchrashuvda tuman Favqulodda vaziyatlar boʻlimi masʼul xodimlari, mahalla faollari va keng jamoatchilik vakillari ishtirok etishdi.

Muloqot davomida asosiy eʼtibor “is gazi”dan zaharlanishning oldini olishga qaratildi. Mutaxassislar taʼkidlaganidek, is gazi hidsiz va rangsiz boʻlgani uchun uni sezish qiyin, shu bois har bir xonadondagi dudburon va ventilyatsiya tizimlarining sozligi doimiy nazoratda boʻlishi shart. Xonalarni muntazam shamollatib turish, qoʻlbola va nosoz isitish pechlaridan foydalanmaslik hayotiy zarurat ekanligi tushuntirildi.

Profilaktika ishlari faqat yigʻilish oʻtkazish bilan cheklanib qolmadi. Tuman Favqulodda vaziyatlar boʻlimi xodimlari “xonadonbay” usulida aholi yashash uylariga tashrif buyurib, u yerdagi gaz va elektr jihozlarining texnik holatini koʻzdan kechirdilar. Fuqarolarga isitish qurilmalarini nazoratsiz qoldirmaslik boʻyicha zarur tavsiyalar berilib, ogohlikka chorlovchi maxsus eslatmalar va bukletlar tarqatildi. Bunday jonli muloqotlar aholining yongʻin xavfsizligi madaniyatini oshirishda muhim omil boʻlmoqda.

Tadbirlar Amudaryo muhandislik texnologiyalar texnikumida ham davom etdi. Talabalar turar-joylari, yaʼni yotoqxonalar — yongʻin xavfsizligi nuqtai nazaridan eng koʻp eʼtibor qaratiladigan obʼektlardan sanaladi. Mutaxassislar talabalar yotoqxonasidagi sharoitlarni, xususan, oshxonadagi gaz plitalaridan foydalanish tartibini oʻrgandilar. Yoshlarga gaz jihozlaridan toʻgʻri va ehtiyotkorlik bilan foydalanish, elektr tarmogʻiga ortiqcha yuklama bermaslik qoidalari tushuntirildi.

Shuningdek, binodagi birlamchi yongʻin oʻchirish vositalari — oʻt oʻchirgichlarning mavjudligi va yaroqlilik muddati tekshiruvdan oʻtkazildi. Ularning favqulodda vaziyatlarda zudlik bilan foydalanishga shay holatda boʻlishi hayotiy muhim ahamiyatga ega ekanligi taʼkidlandi.

Profilaktik tadbirlar doirasida tuman hududidagi yongʻin xavfsizligi infratuzilmasining muhim elementi boʻlgan yer osti suv olgich gidrantlarining texnik holati ham nazoratdan chetda qolmadi. Qutqaruvchilar gidrantlarning sozligi, suv bosimi va ularga maxsus texnikalarning toʻsiqsiz yaqinlashish imkoniyatlarini koʻzdan kechirdilar. Aniqlangan texnik kamchiliklarni bartaraf etish yuzasidan mutasaddilarga tegishli koʻrsatmalar berilib, ijrosi nazoratga olindi.

Xulosa oʻrnida aytganda, Amudaryo tumanida oʻtkazilayotgan “Xavfsiz xonadon oyligi” tadbirlari shunchaki mavsumiy kampaniya emas, balki yurtdoshlarimizning qish mavsumidan betalafot chiqishlarini taʼminlashga qaratilgan tizimli harakatdir. Zero, oʻz uyining xavfsizligiga befarq boʻlmagan inson, nafaqat oʻzining, balki yon-atrofidagilarning ham osoyishtaligini asragan boʻladi.