Ichimlik suvi taʼminotidagi ishlar holati oʻrganildi

Maʼlumki, har qanday jamiyatning farovonligi va iqtisodiy barqarorligi eng avvalo, uning kommunal infratuzilmasi qanchalik mustahkam ekanligi bilan oʻlchanadi. Ayniqsa, tabiat injiqliklari kuzatiladigan kuz va qish mavsumida aholi xonadonlari, ijtimoiy soha obʼektlari va iqtisodiyot tarmoqlarining uzluksiz ishlashini taʼminlash davlat siyosatining ustuvor yoʻnalishi hisoblanadi. Bu borada Xoʻjayli tumanida amalga oshirilayotgan tizimli ishlar aholining hayot sifatini oshirishga xizmat qilmoqda.

Joriy yilda kuz-qish mavsumiga tayyorgarlik ishlari har yilgidan-da jiddiy va kompleks yondashuv asosida tashkil etildi. Buning huquqiy asosi sifatida 2025-yil 2-iyul kuni Oʻzbekiston Respublikasi Vazirlar Mahkamasi tomonidan qabul qilingan “Iqtisodiyot tarmoqlarini, ijtimoiy va energetika obʼektlari va koʻp kvartirali uy-joy fondidan 2025/2026-yillar kuz-qish mavsumida barqaror ishlashga tayyorlashni taʼminlash chora-tadbirlari toʻgʻrisida”gi 453-sonli qarorini keltirish mumkin. Mazkur strategik hujjat nafaqat muammolarni bartaraf etish, balki tizimni modernizatsiya qilish boʻyicha aniq yoʻl xaritasini belgilab berdi.

Ushbu qaror ijrosini taʼminlash maqsadida Qoraqalpogʻiston Respublikasi boʻylab keng koʻlamli qurilish-taʼmirlash ishlari boshlab yuborilgan. Xususan, respublika miqyosida jami 45,2 km ichimlik suvi tarmoqlarini yangilash hamda 95 ta nasos agregatlarini texnik sozlash vazifasi qoʻyilgan. Bu borada Xoʻjayli tumanida belgilangan rejalar ham salmoqlidir. Tumanda aholini toza ichimlik suvi bilan taʼminlash sifatini oshirish maqsadida 250 metr uzunlikdagi eskirgan suv quvurlari toʻliq almashtirilib, mukammal taʼmirlandi. Bundan tashqari, 3,5 km uzunlikdagi tarmoqlarda joriy taʼmirlash ishlari amalga oshirilmoqda.

Suv taʼminotida asosiy yuklamani koʻtaradigan qurilmalar — bu nasos agregatlaridir. Tumanda 2 ta yirik nasos agregatini mukammal taʼmirlash va 4 tasini mavsumiy sozlash ishlari rejalashtirilgan boʻlib, bu tizimdagi bosimning barqarorligini taʼminlashga xizmat qiladi.

Mazkur vazifalarning ijrosini nazorat qilish maqsadida Qoraqalpogʻiston Respublikasi Qurilish va uy-joy kommunal xoʻjaligi sohasida nazorat qilish hududiy inspektsiyasi hamda “Qoraqalpoq suv taʼminoti” aktsiadorlik jamiyati tuman filiali mutaxassislari hamkorligida “Xoʻjayli” suv olish inshootida maxsus monitoring oʻtkazildi. Oʻrganishlar davomida aniqlandiki, tuman hududida 250 metrlik tarmoqning mukammal taʼmirlanishi natijasida mahallalardagi suv bosimi meʼyoriga kelgan va aholining suv taʼminotidagi uzilishlar sezilarli darajada qisqargan.

Inspektsiya xodimlari nafaqat qurilish sifatini, balki suvning sanitariya-gigiyena talablariga javob berishini ham chuqur tahlil qildilar. Ichimlik suvi — strategik resurs. Shu bois, tarmoqlarda suvning ifloslanishiga yoʻl qoʻymaslik, xlorlash va zararsizlantirish jarayonlarining standartlarga mosligi qatʼiy nazoratga olindi. Shuningdek, mutaxassislar obʼektda energiya tejamkor texnologiyalarning qoʻllanilishiga alohida eʼtibor qaratishdi. Zamonaviy nasoslarning oʻrnatilishi elektr energiyasi sarfini kamaytirish bilan birga, ekologik barqarorlikka ham hissa qoʻshadi.

Taʼkidlash joizki, toza ichimlik suvi — millat genofondi va aholi salomatligining garovidir. Sifatli suv taʼminoti turli yuqumli kasalliklarning oldini olishda eng samarali vosita hisoblanadi. Ayniqsa, oʻsib kelayotgan yosh avlodning jismonan sogʻlom rivojlanishida uning oʻrni beqiyos. Bundan tashqari, xonadonda suvning uzluksiz kelishi oilalarning maishiy turmush madaniyatini yuksaltiradi, ayollarning ogʻirini yengil qiladi.

Xulosa oʻrnida aytganda, Xoʻjayli tumanida kuz-qish mavsumiga tayyorgarlik doirasida amalga oshirilayotgan bunday xayrli ishlar "Inson qadri uchun" tamoyilining amaldagi yorqin ifodasidir. Ichimlik suvi tizimining barqaror ishlashi qishning sovuq kunlarida aholiga xotirjamlik va farovonlik bagʻishlashi shubhasiz.