Oʻzbekiston Respublikasi Adliya vaziri Akbar Toshqulov Amudaryo tumani Adliya boʻlimi faoliyati bilan tanishdi

Mamlakatimizda soʻnggi yillarda olib borilayotgan keng qamrovli islohotlar davlat va jamiyat hayotining barcha sohalarida oʻz natijalarini koʻrsatmoqda. Xususan, adliya tizimida boshlangan yangilanish jarayonlari fuqarolarning huquq va erkinliklarini taʼminlash, huquqiy xizmatlarni yanada ommalashtirish va adliya organlarining masʼuliyatini oshirishga xizmat qilmoqda.

2024-yil 24-may kuni qabul qilingan “Maʼmuriy islohotlar doirasida Adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi Prezident Farmoni adliya tizimidagi islohotlarning yangi bosqichini boshlab berdi. Ushbu hujjat orqali adliya organlari zimmasiga aholi manfaatlarini yanada samarali himoya qilish, davlat xizmatlarini ixcham va sifatli koʻrsatish, shuningdek, joylarda huquqiy tarbiya va targʻibotni kuchaytirish kabi qator dolzarb vazifalar yuklatildi.

Mazkur islohotlarning hududlarda qanday ijro etilayotgani bilan tanishish maqsadida Oʻzbekiston Respublikasi Adliya vaziri Akbar Toshqulov Qoraqalpogʻiston Respublikasiga xizmat safarini amalga oshirdi. Safar davomida vazir Amudaryo tumanida boʻlib, tuman Adliya boʻlimi faoliyatini oʻrgandi.

Oʻrganish jarayonida Qoraqalpogʻiston Respublikasi Adliya vaziri Elmurod Tursunov, vazirning birinchi oʻrinbosari Aman Prenov, Amudaryo tumani hokimi Sobir Xoʻjametov, tuman Adliya boʻlimi boshligʻi Mansur Sadikov ham ishtirok etdilar.

Dastlab aholining huquqiy muammolarini oʻrganish, ularni hal etish mexanizmlarini takomillashtirish va mahalla darajasida huquqiy targʻibot ishlarini samarali tashkil etish boʻyicha amalga oshirilayotgan chora-tadbirlar bilan tanishildi. Shu bilan birga, mahalla fuqarolar yigʻinlari hamda davlat organlarining quyi boʻgʻinlariga metodik yordam koʻrsatish masalalari ham alohida muhokama qilindi.

Qoraqalpogʻiston Respublikasi Adliya vazirining birinchi oʻrinbosari Aman Prenov respublika va tuman miqyosida adliya sohasida olib borilayotgan ishlar yuzasidan taqdimot oʻtkazdi. Unda aholining huquqiy savodxonligini oshirish, jinoyatchilik va huquqbuzarliklarning oldini olish, oilaviy muammolarni huquqiy mexanizmlar orqali hal etishga doir yangicha yondashuvlar tilga olindi.

Oʻzbekiston Respublikasi Adliya vaziri Akbar Toshqulov ham yigʻilish ishtirokchilariga bir qator amaliy tavsiyalar berdi. Xususan, ovul va mahallalarda huquqbuzarliklarning oldini olish, aholi bandligini taʼminlash, ijtimoiy himoyaga muhtoj fuqarolarga huquqiy yordam koʻrsatish orqali ularni qoʻllab-quvvatlash, oilaviy zoʻravonlik va ajrimlarning oldini olish masalalari boʻyicha vazifalar belgilab berildi.

Shuni alohida qayd etish joizki, huquqiy targʻibot ishlari qanchalik kengaytirilsa, fuqarolar oʻz huquqlarini shunchalik yaxshi bilib, ularni himoya qila oladi. Adliya tizimidagi islohotlar nafaqat huquqshunoslar yoki davlat idoralari faoliyatiga, balki har bir fuqaroning hayotiga bevosita taʼsir etmoqda.

Oʻzbekiston Respublikasi Adliya vaziri Akbar Toshqulovning Qoraqalpogʻistonga tashrifi adliya tizimidagi islohotlarning joylardagi ijrosini kuchaytirish, aholiga bevosita yordam koʻrsatish va mahallalarda huquqiy madaniyatni yuksaltirishga qaratilgan amaliy qadamlardan biri boʻldi. Zero, kuchli huquqiy poydevor – taraqqiyotning asosiy garovidir.

Charos Arslonova, tuman hokimligining Axborot xizmati rahbari.