"Uch avlod uchrashuvi" maʼnaviy-maʼrifiy tadbiri oʻtkazildi

Insoniyat tarixi shundan daolat beradiki, har bir xalqning maʼnaviy boyligi avlodlar oʻrtasidagi uzviy aloqalarda namoyon boʻladi. Keksalarning hayotiy tajribasi, oʻrta avlodning mehnatkashligi va yoshlarning tashabbuskorligi birlashganda jamiyat rivojining mustahkam poydevori yaratiladi. Nuroniylarning donishmandligi bilan yoshlar kuch-gʻayratining uygʻunligi milliy qadriyatlarni asrash va rivojlantirishning garovidir. Aynan shu ijtimoiy hamkorlik tufayli anʼanalar avloddan-avlodga oʻtib, bugungi kungacha yetib kelgan.

Shu sababli ham mamlakatimizda avlodlar oʻrtasidagi mazkur uzviylikni taʼminlash va yanada mustahkamlash maqsadida "Uch avlod uchrashuvi" kabi maʼnaviy-maʼrifiy tadbirlar muntazam ravishda tashkil etilmoqda. Bu uchrashuvlar nafaqat turli avlod vakillarini bir maydonga toʻplaydi, balki ularning oʻzaro muloqotini yoʻlga qoʻyish, tajriba almashish va milliy qadriyatlarni yanada boyitish uchun xizmat qiladi. Ana shunday tadbirlardan yana biri 26-sentyabr kuni Amudaryo tumanida keng koʻlamda oʻtkazildi.

Respublika miqyosida tashkil qilingan bu katta tadbirda turli soha rahbarlari, fidoyi mehnat faxriylari, tumanning iqtisodiy-ijtimoiy taraqqiyotiga salmoqli hissa qoʻshgan tajribali insonlar, shuningdek, kelajagimiz egalari boʻlmish isteʼdodli yoshlar jam boʻlishdi. Mehmonlar tuman markazidagi "Oltin saroy" toʻy-tantanalar majmuasi oldida tantanali tarzda, karnay-surnay sadolari ostida kutib olindi.

Tadbir doirasida tashkil etilgan koʻrgazmada hunarmandlarimizning nafis qoʻl mehnati mahsulotlari, mahalliy tadbirkorlarning ishlab chiqargan turfa xil mahsulotlari namoyish etilib, tashrif buyurganlarning katta qiziqishiga sabab boʻldi.

Aytish joizki, bugungi globallashuv davrida milliy urf-odat va anʼanalarni asrab-avaylash masalasi alohida dolzarblik kasb etmoqda. Texnologiyalar rivoji, axborot oqimining tezligi, turli madaniyatlarning oʻzaro taʼsiri sharoitida oʻz milliy qiyofasini yoʻqotmaslik, ajdodlar merosini saqlab qolish muhim vazifaga aylangan. Aynan shu nuqtai nazardan "Uch avlod uchrashuvi" kabi tadbirlar milliy oʻzligimizni mustahkamlashda beqiyos ahamiyat kasb etadi.

Tadbirni Qoraqalpogʻiston Respublikasi Joʻqorgʻi Kengesi Raisi oʻrinbosari Rajabboy Nurazizov kirish nutqi bilan ochib, uch avlod uchrashuvining ijtimoiy-maʼnaviy hayotimizdagi oʻrni, xususan, yoshlarni vatanparvarlik ruhida tarbiyalashdagi ahamiyati xususida alohida toʻxtalib oʻtdi. U avlodlar oʻrtasidagi koʻprikni mustahkamlash nafaqat oʻzligimizni asrash va boy oʻtmishimizni unutmaslik, balki porloq kelajagimizni bunyod etish uchun ham nihoyatda zarurligini taʼkidladi.

"Nuroniy" jamgʻarmasi Qoraqalpogʻiston Respublikasi boʻlimi raisi Tursunboy Abdijabbarov, jamgʻarmaning tuman boʻlimi raisi Bekmon Allabeganov, faxriy nuroniy Bahrom Jumaniyozov, Amudaryo tumani hokimi Sobir Xoʻjametovlar oʻz nutqlarida ushbu tadbir ajdodlarning jasoratli mehnati, bugungi avlodning bunyodkorlik intilishlari va kelajak yoshlar zimmasidagi masʼuliyat vazifalarni yana bir bora esga olish va tahlil qilish imkonini berishini taʼkidladilar. Bunday uchrashuvlar tarbiyaviy va tarixiy jihatdan beqiyos ahamiyat kasb etishini, ular orqali milliy qadriyatlarimiz yanada boyib, takomillashib borishini alohida qayd etdilar.

Darhaqiqat, keksalarning hayot maktabidan oʻtgan boy tajribalari yoshlar uchun haqiqiy darslik vazifasini oʻtaydi. Nuroniylarning har bir nasihati, har bir maslahati yillarning sinovidan oʻtgan hikmatlardir. Ular yoshlarga nafaqat kasb-hunar sirlarini oʻrgatadi, balki insoniy fazilatlar — mehr-oqibat, halollik, mehnatsevarlik, vatanparvarlik kabi yuksak xislatlarni singdiradi. Bu esa jamiyatimizning maʼnaviy salohiyatini oshirishda muhim omil hisoblanadi.

Tadbir davomida turli sohalarda fidokorona mehnat qilayotgan oʻrta avlod vakillari, yurtimiz ravnaqiga katta hissa qoʻshib kelayotgan faxriy nuroniylar hamda zamonaviy bilimli, tashabbuskor va faol yoshlarning Vatan, el oldilagi xizmatlari eʼtirof etildi. Masʼullar ularga esdalik nishonlari va sovgʻalar topshirib, kelgusidagi faoliyatlarida omad tiladilar.

Oʻzbekistonda soʻnggi yillarda ijtimoiy-maʼnaviy muhitni yaxshilash, milliy oʻzlikni asrab-avaylash borasida keng qamrovli islohotlar amalga oshirilmoqda. Mahalla institutining har tomonlama qoʻllab-quvvatlanayotgani, "Nuroniy" jamgʻarmasining faoliyati yoʻlga qoʻyilgani, yoshlar tashkilotlari samarali faoliyati — bularning barchasi ajdodlarimizdan bizgacha yetib kelgan boy maʼnaviy merosni avlodlarga yetkazishdek ulugʻvor maqsadlarga xizmat qilmoqda. Taʼlim tizimida milliy qadriyatlarga eʼtibor kuchaytirilib, maktab va oliy oʻquv yurtlarida maʼnaviyat darslari joriy etildi. Oilaviy qadriyatlarni mustahkamlash, nikoh va oila muqaddasligini taʼminlash borasida qonunchilik takomillashtirildi. Bu kabi chora-tadbirlar xalqimiz maʼnaviyatini yanada yuksaltirish, jamiyatda mustahkam ijtimoiy-maʼnaviy muhitni qaror toptirishda muhim ahamiyat kasb etmoqda.

Tadbirning badiiy qismi respublika va tuman miqyosidagi madaniyat va sanʼat vakillarining ishtirokida qiziqarli va hayajonli tarzda oʻtdi. Sahna maydonida jaranglagan kuy-qoʻshiqlar nafaqat badiiy zavq ulashdi, balki barcha ishtirokchilarga yurtimizdagi tinch va osoyishta hayotning qadriga yetish, birlik va doʻstlikni ulugʻlash gʻoyalarini singdirdi. Sanʼatkorlarning Vatan madhi, mehr-oqibat va hamjihatlik haqida kuylagan qoʻshiqlari tadbir ishtirokchilarida chuqur taassurot qoldirdi.

Milliy ruhiyatimizni aks ettirgan kuylar, diltortar qoʻshiqlar va dilrabo raqslar qalblarga iliqlik bagʻishladi. Xalq qoʻshiqlari va zamonaviy musiqa uygʻunligi avlodlar oʻrtasidagi maʼnaviy koʻprikning mustahkamligiga yana bir asos boʻldi. Raqqosalar ijrosidagi shoʻx-shodon raqslar tomoshabinlarning koʻnglini koʻtarib, bayram kayfiyatini yanada yuksaltirdi. Sahnadan taralgan navolar va raqslarning betakror jozibasi yigʻilganlarga chinakam bayramona ruh ulashdi.

Chindan ham, inson hayoti – uzviylik va davomiylik zanjiriga qiyoslanadi. Bu zanjirning har bir halqasi avlodlar oʻrtasidagi nozik rishtalar bilan bogʻlangan. Jamiyatning poydevorini tashkil etuvchi bu bogʻliqlik xuddi daryoning togʻdan boshlab to quyi qismigacha davom etadigan bepoyon oqimiga oʻxshaydi. Nuroniylar – bu daryoning tiniq buloqlari, hayotning cheksiz hikmatlarini oʻzida jamlagan manbadir. Oʻrta avlod vakillari – bu buloqlarni keng daryoga aylantirib, jamiyat ravnaqi yoʻlida fidokorona mehnat qilayotgan shijoatli insonlar, yoshlar esa ana shu daryoning shodon oqimi, kelajakka talpinib, yangi ufqlarni zabt etishga intilayotgan kuchli toʻlqindir. Uch avlodning uygʻun hamkorligi natijasida esa irmoqlar, buloqlar daryolarga aylanadi. Ana shu hamkorlik tufayli ming yillar davomida oqqan daryolar yana va yana oqaveradi.

Zamonaviy globallashuv davrida, axborot oqimi haddan tashqari koʻp boʻlgan sharoitda, bunday uzviy aloqalar milliy oʻzlikni yoʻqotmaslik uchun eng asosiy mexanizm hisoblanadi. Agar keksa avlodning donishmandligi va hayot tajribasi yoshlarga oʻtmasa, milliy qadriyatlar bugungi kunning axborot "shovqini"da yoʻqolib ketish xavfi ostida qoladi. Shu sababli, bunday aloqalar shunchaki ijtimoiy meʼyor emas, balki milliy xavfsizlikning ajralmas bir qismidir.

"Uch avlod uchrashuvi" shunchaki bayram tadbiri emas, balki milliy birligimizning, maʼnaviy boyligimizning amaldagi ifodasi boʻldi. Bu uchrashuv ishtirokchilarni nafaqat oʻtmishimizdan saboq olish, balki bugunimizni qadrlash va ertangi kunimizga ishonch bilan qarashga daʼvat etdi. Zero, avlodlar oʻrtasidagi uzviy aloqa — jamiyatimiz barqarorligining, millatimiz bardavomligining kafolatidir. Shu bois ham bunday tadbirlarning ahamiyati beqiyos boʻlib, ular kelajak avlodlar uchun maʼnaviy mayoq vazifasini oʻtaydi.