Qoraqalpogʻiston qishloq xoʻjaligi va agrotexnologiyalar institutida media-tur tashkil etildi

19-sentyabr kuni Qoraqalpogʻiston qishloq xoʻjaligi va agrotexnologiyalar instituti Matbuot xizmati tashabbusi bilan respublika va mahalliy ommaviy axborot vositalari vakillari uchun media-tur tashkil etildi. Tadbirning asosiy maqsadi – mazkur oliygohga yangi qabul qilingan talaba-yoshlarni institut faoliyati bilan yaqindan tanishtirish va fakultetlar faoliyati haqida batafsil maʼlumot berishdan iborat boʻldi.

Media-turni institut rektori Berdiyar Jollibekov ochib berdi. U oʻz nutqida ishtirokchilarga institutning bugungi kundagi faoliyati, mavjud imkoniyatlari, ilmiy salohiyati va xalqaro maydondagi oʻrni haqida atroflicha maʼlumot taqdim etdi.

Rektorning taʼkidlashicha, institut nafaqat milliy, balki xalqaro miqyosda ham yetakchi taʼlim muassasalaridan biriga aylanish yoʻlida dadil qadam tashlamoqda. Mediya-tur davomida ommaviy axborot vositalari vakillari hamda 1-kurs talabalari eʼtiboriga Yaponiyalik talabalarning institut talabalari bilan birgalikda olib borilayotgan ilmiy-tadqiqot ishlari taqdim etildi. Bundan tashqari, xalqaro hamkorlik aloqalarini yanada kengaytirish maqsadida olib borilayotgan ishlarning natijalari bilan tanishtirildi.

Aytish joizki, oliy taʼlim muassasalarining xalqaro hamkorligi global taʼlim makonida muhim ahamiyat kasb etadi. Bu hamkorlik talabalar va professor-oʻqituvchilar uchun tajriba almashish, ilgʻor texnologiyalarni oʻrganish va xalqaro standartlarga mos keladigan bilimlarni egallash imkoniyatini yaratadi. Shuningdek, u ilmiy-tadqiqot salohiyatini oshirishga hamda innovatsion loyihalarni amalga oshirishga xizmat qiladi, bu esa mamlakatning ilmiy-texnologik taraqqiyoti uchun mustahkam poydevor yaratadi.

Media-tur doirasida jurnalistlar uchun institut boʻylab sayohat tashkil etildi. Unda mehmonlar zamonaviy ilmiy laboratoriyalar, issiqxonalar faoliyati, u yerdagi ilmiy-tadqiqot ishlari hamda talabalarga yaratilgan shart-sharoitlar bilan yaqindan tanishdilar.

Institutdagi ilmiy laboratoriyalar zamonaviy uskunalar bilan jihozlangan boʻlib, talabalar va yosh olimlarga amaliy koʻnikmalarni egallash, ilmiy tajribalar oʻtkazish va yangi gʻoyalarni sinab koʻrish uchun keng imkoniyatlar yaratadi. Issiqxonalar esa qishloq xoʻjaligi sohasidagi innovatsion yechimlarni, yangi navlarni sinash va ekologik toza mahsulot yetishtirish boʻyicha tadqiqotlar olib borish uchun xizmat qiladi. Bu sharoitlar talabalarning nazariy bilimlarini amaliyotda mustahkamlashga va kelajakda malakali mutaxassis boʻlib yetishishlariga zamin yaratadi.

Qolaversa, oliygohga yangi qabul qilingan talaba-yoshlarni institut faoliyati bilan yaqindan tanishtirish va fakultetlar faoliyati haqida batafsil maʼlumot berish ham ularning yangi muhitga tezroq moslashishi, oʻquv jarayoni va kelajakdagi kasbiy faoliyati haqida aniq tasavvurga ega boʻlishi uchun muhimdir. Bunday tadbirlar talabalarning motivatsiyasini oshiradi, ularga oʻz yoʻnalishlarini toʻgʻri tanlashga yordam beradi va kelajakka boʻlgan ishonchini mustahkamlaydi.

Tadbir yakunida OAV vakillari bunday ochiq muloqotlar nafaqat institut hayotini keng yoritish, balki taʼlim tizimidagi yutuq va muammolarni jamiyatga yetkazishda ham muhim ahamiyat kasb etishini taʼkidladilar. Zero, shaffoflik va ochiqlik taʼlim sifatini oshirishning asosiy omillaridan biridir.

Tadbir davomida bu yil talabalik baxtiga muyassar boʻlgan yoshlar ham oʻz taassurotlari bilan oʻrtoqlashib, bunday tadbirlar ularni oʻqish jarayonida yanada ruhlantirishi, mavjud imkoniyatlar bilan yaqindan tanishishlarida katta ahamiyatga ega ekanini alohida qayd etdilar.

Bu kabi tadbirlar yoshlarni ilm olishga ragʻbatlantirish, ularga zamonaviy taʼlim sharoitlarini yaratish va xalqaro hamkorlik orqali jahon andozalariga mos mutaxassislarni tayyorlashda muhim ahamiyat kasb etadi.