Ijodkorlar bilan ochiq muloqot oʻtkazildi

Amudaryo tuman hokimligining Axborot xizmati tashabbusi bilan madaniyat va sanʼat sohasini rivojlantirish, ijodkorlarni qoʻllab-quvvatlash, yoshlarning ijodiy salohiyatini yuzaga chiqarish masalalari yuzasidan ochiq muloqot tashkil etildi.

Muloqotda tuman Madaniyat boʻlimi xodimlari, ijodkorlar, yoshlar yetakchilari, hokimlik masʼullari hamda ommaviy axborot vositalari vakillari ishtirok etdi.

Tadbirni tuman hokimining matbuot kotibi Charos Arslonova ochib berdi va boshqarib bordi. U oʻz soʻzida madaniyat va sanʼatning xalq maʼnaviyatidagi oʻrni, yoshlarning estetik didini shakllantirishdagi ahamiyati haqida toʻxtalib oʻtdi.

Shundan soʻng, tuman Madaniyat boʻlimi boshligʻi Murod Ibragimov sohada amalga oshirilayotgan ishlar yuzasidan maʼlumot berdi. Jumladan, yil boshidan buyon tumanda madaniyat maskanlarini zamon talablari asosida rivojlantirish, sanʼatkor va ijodkorlarni qoʻllab-quvvatlash boʻyicha amalga oshirilgan chora-tadbirlar haqida batafsil soʻz yuritildi.

Maʼlumot oʻrnida aytish joizki, tuman Madaniyat boʻlimida jami 97 nafar xodim faoliyat yuritib kelmoqda. Boʻlimning tuman ovul va mahallalarida 6 ta filiallari, 7 ta markazlari mavjud. Boʻlim tarkibida 3 ta xalq ansambli – “Uchqun” ashula va raqs xalq ansambli, “Ofarin” folklor-etnografik xalq jamoasi, “Jayxun moʻʼjizasi” anʼanaviy sahna tsirk xalq jamoalari xalqimizning maʼnaviy qadriyatlarini tiklash, ularni asrab-avaylash va rivojlantirish, milliy urf-odatlarimizni, tarixiy, ilmiy, madaniy merosimizni yuksaltirishga xizmat qilib kelmoqda.

Qayd etilishicha, tuman Madaniyat boʻlimi va uning tarkibidagi qishloq madaniyat markazlarida 23 ta havaskorlik toʻgaraklari tashkil etilgan boʻlib, ularga 220 nafar yoshlar jalb qilingan. Yoshlarning isteʼdod va qobiliyatlarini yuzaga chiqarish, madaniyat va sanʼatga qiziqishlarini qoʻllab-quvvatlash va yosh ijodkorlarni kashf qilish maqsadida turli adabiy-badiiy kechalar, davra suhbatlari muntazam ravishda tashkil qilib kelinmoqda.

Muloqot davomida yoshlar yetakchilari ham soʻzga chiqib, yoshlarning sanʼat va madaniyat tadbirlaridagi ishtirokini oshirish, ularni ijodiy jarayonga keng jalb etish boʻyicha oʻz taklif va mulohazalarini bildirdilar. Shu bilan birga, ijodkorlar oʻzlarini qiziqtirgan savollarga javob olish imkoniga ega boʻldilar. Tadbir ishtirokchilari tomonidan tumanda raqs va aktyorlik sanʼatini yanada rivojlantirish, yosh isteʼdodlarni qoʻllab-quvvatlash va ularning qobiliyatini keng namoyon etish yuzasidan qator takliflar bildirildi. Ushbu gʻoyalar, albatta, soha rivojiga turtki boʻlishi shubhasiz.

Ochiq muloqot madaniyat va sanʼat sohasi vakillari uchun nafaqat erkin fikr almashish, balki ijodkorlar bilan hamkorlikda kelgusi rejalarni belgilash maydoniga aylandi. Zero, madaniyat – xalq ruhiy boyligi, sanʼat esa jamiyatning maʼnaviy poydevoridir.

Charos Arslonova, tuman hokimligining Axborot xizmati rahbari.