USTOZLAR MILLIY FORUMI: YaNGI OʻQUV YILIGA YaNGI REJALAR BILAN

"Ustozlar milliy forumi"ning shuʼba seminarlaridan soʻng Amudaryo tumani Madaniyat boʻlimi binosida anjumanning yalpi majlisi boʻlib oʻtdi. Tadbirda tuman hokimi oʻrinbosari Nodirbek Kamolov, Maktabgacha va maktab taʼlimi boʻlimi boshligʻi Yalgʻashboy Shamuratov, Qoraqalpogʻiston Respublikasi Maktabgacha va maktab taʼlimi vazirligining oʻquvchilar bilimini baholash va tahlil qilish shoʻʼbasi boshligʻi Hamidulla Begdullayev, shuningdek, umumiy oʻrta taʼlim va maktabgacha taʼlim tashkilotlari direktorlari, trener-oʻqituvchilar, faxriy ustozlar va keng jamoatchilik vakillari ishtirok etdilar.

Plenar yigʻilishda soʻzga chiqqanlar tomonidan taʼlim tizimidagi islohotlarning ahamiyati, oʻqituvchi kasbining nufuzini oshirish borasida amalga oshirilayotgan ishlar va kelgusidagi rejalar haqida atroflicha fikr yuritildi. Tuman hokimi oʻrinbosari Nodirbek Kamolov oʻz nutqida yosh avlod tarbiyasidek masʼuliyatli vazifani sidqidildan ado etayotgan ustozlarga minnatdorchilik bildirib, hokimlik tomonidan pedagoglarni qoʻllab-quvvatlash uchun barcha imkoniyatlar safarbar etilishini taʼkidladi. Tuman Maktabgacha va maktab taʼlimi boʻlimi boshligʻi Yalgʻashboy Shamuratov esa yangi oʻquv yilida eʼtibor qaratilishi lozim boʻlgan ustuvor yoʻnalishlar, xususan, taʼlim sifatini oshirish, iqtidorli oʻquvchilar bilan ishlashni kuchaytirish va raqamli texnologiyalarni taʼlim jarayoniga keng joriy etish masalalariga alohida toʻxtalib oʻtdi.

Tadbirning eng hayajonli va tantanali qismi, shubhasiz, fidokorona mehnatlari bilan soha rivojiga munosib hissa qoʻshib kelayotgan bir guruh ilgʻor oʻqituvchi va tarbiyachilarni taqdirlash marosimi boʻldi. 2024-2025 oʻquv yili davomida yoshlarni milliy va umuminsoniy qadriyatlar ruhida tarbiyalashga faol hissa qoʻshgan, taʼlim-tarbiya jarayonida yuqori natijalarga erishgan, oʻquvchilari turli tanlov va olimpiadalarda sovrinli oʻrinlarni egallagan bir qator pedagoglar Qoraqalpogʻiston Respublikasi Maktabgacha va maktab taʼlimi vazirligi hamda tuman hokimligining tashakkurnomasi va esdalik sovgʻalari bilan mukofotlandilar. Ushbu eʼtirof ustozlarning sharafli mehnatiga berilgan yuksak baho boʻlib, ularni yangidan-yangi zafarlar sari ruhlantirishi tabiiy.

Forumni oʻtkazishdan maqsad tizimda olib borilayotgan islohotlar, taʼlim mazmunini takomillashtirish borasida amalga oshirilayotgan ishlar bilan tanishtirish, oʻquv rejalari, oʻquv dasturlari, darsliklar, yangi baholash tizimi, shuningdek, oʻquv jarayoniga tatbiq etiladigan ilgʻor metodikalarning mazmun-mohiyatini soha xodimlariga yetkazishdan iboratdir. Bu esa oʻz navbatida pedagoglarning kasbiy saviyasini oshirish, ularni zamon talablari bilan uygʻunlashtirish va taʼlim jarayonida innovatsion yondashuvlarni keng qoʻllashga yoʻl ochadi.

Shuningdek, forum doirasida oʻtkazilgan tadbirlar oʻqituvchilarga nafaqat yangi bilimlar olish, balki oʻz tajribalarini boshqalar bilan boʻlishish, muammolarni birgalikda muhokama qilish va ularga samarali yechimlar topish imkoniyatini ham taqdim qildi. Bunday yondashuv pedagogik jamoatchilikda birlik va hamkorlik ruhini mustahkamlash, oʻzaro yordam va qoʻllab-quvvatlash anʼanalarini rivojlantirishga xizmat qiladi.

Xulosa qilib aytganda, Amudaryo tumanida boʻlib oʻtgan "Ustozlar milliy forumi" nafaqat anʼanaviy tadbir, balki taʼlim sohasi xodimlari uchun oʻziga xos tajriba maktabi, ilhom va gʻayrat manbai boʻldi. Forumda belgilab olingan vazifalar va yangi rejalar, shubhasiz, tumanda taʼlim sifatini yangi bosqichga olib chiqishga, yosh avlodni zamonaviy bilim va koʻnikmalar bilan qurollantirishga xizmat qiladi. Bunday tadbirlarning muntazam oʻtkazilishi mamlakatimizda taʼlim tizimini yanada rivojlantirish va dunyo miqyosidagi standartlarga moslashtirishning muhim omilidir.