Amudaryolik tadbirkorlar bilan ochiq muloqot boʻlib oʻtdi

Mamlakatimizda tadbirkorlikni qoʻllab-quvvatlash, kichik biznes va xususiy sektorni rivojlantirish orqali aholi bandligini taʼminlash va turmush darajasini oshirish davlat siyosatining ustuvor yoʻnalishlaridan biri hisoblanadi. Prezident tashabbusi bilan Qoraqalpogʻiston Respublikasida tadbirkorlikni har tomonlama ragʻbatlantirish, mavjud muammolarni joyida hal etish, yangi imkoniyatlar yaratish borasida keng koʻlamli islohotlar amalga oshirilmoqda.

Bu borada uchrayotgan muammolarni aniqlash va hal qilish hamda ishbilarmonlarning taklif va murojaatlarini tinglash maqsadida Amudaryo tumani Madaniyat boʻlimi faollar zalida tadbirkorlar bilan ochiq muloqot boʻlib oʻtdi.

Mazkur uchrashuvda tuman hokimi Sobir Xoʻjametov, Oʻzbekiston Respublikasi Prezidenti huzuridagi Tadbirkorlik subʼektlarining huquqlari va qonuniy manfaatlarini himoya qilish boʻyicha vakil devoni Qoraqalpogʻiston Respublikasi shuʼbasi bosh inspektori Yernazar Dosanov, Savdo-sanoat palatasining Qoraqalpogʻiston Respublikasi boshqarmasi boshligʻi Kazbek Artikov, tuman prokurori Bahrom Masharipov, tuman hokimi oʻrinbosarlari, hokim yordamchilari, tegishli tashkilotlar rahbarlari, tijorat banklari vakillari hamda faol tadbirkorlar ishtirok etdilar.

Uchrashuvni ochib bergan tuman hokimi Sobir Xoʻjametov bugungi kunda yurtimizda, xususan, Qoraqalpogʻistonda tadbirkorlikni rivojlantirish yoʻlida olib borilayotgan chora-tadbirlar, yaratilayotgan keng imkoniyatlar, berilayotgan moliyaviy koʻmak turlari va ularni olish mexanizmlari xususida soʻz yuritdi.

Tadbir davomida Savdo-sanoat palatasi boshqarma boshligʻi hamda tijorat banklari vakillari oʻz yoʻnalishlari boʻyicha soʻzga chiqib, kreditlar ajratish, subsidiyalar, grantlar va tadbirkorlik loyihalarini moliyalashtirish boʻyicha mavjud mexanizmlarni atroflicha tushuntirdilar.

Tadbirkorlar oʻzlarini qiziqtirgan savollar, duch kelayotgan muammolar bilan masʼullarga ochiq murojaat qilish imkoniyatiga ega boʻldilar. Koʻtarilgan masalalar orasida yer ajratish, kredit olishdagi toʻsiqlar, infratuzilma bilan bogʻliq kamchiliklar, ruxsatnoma va litsenziyalar olish jarayonidagi murakkabliklar kabi dolzarb mavzular muhokama qilindi.

Xususan, ayrim tadbirkorlar ishlab chiqarish, servis va xizmat koʻrsatish yoʻnalishlarida faoliyatni kengaytirish uchun yer maydonlari zarurligini taʼkidladilar. Baʼzi banklar tomonidan talab etilayotgan garovlar va hujjatlar tadbirkorlar uchun qiyinchilik tugʻdirayotgani, baʼzan yer maydonlari kadastr reyestriga kiritilmagani yoki hujjatlarda aniqlik yoʻqligi sababli ayrim loyihalar amalga oshmay qolayotganiga urgʻu berildi.

Shu bilan birga ishlab chiqarish bilan shugʻullanuvchi tadbirkorlar elektr energiyasi barqarorligi va quvvati yetarli emasligi kabi masalalarni koʻtardilar, xizmat koʻrsatish va savdo faoliyati bilan shugʻullanuvchilar esa shahar markazida doimiy savdo joylariga ehtiyoj borligini bildirdilar.

Shuningdek, tadbirkorlik faoliyatini yuritishda yuzaga keladigan umumiy muammolar, jumladan, hujjatlashtirish jarayonlarini soddalashtirish va bozordagi mavjud muammolarni hal etish boʻyicha ham takliflar bildirildi. Bu murojaatlar tadbirkorlar duch kelayotgan dolzarb muammolarni va ularga tizimli yechim topish lozimligini yaqqol koʻrsatib berdi.

Muhimi, bu masalalarning aksariyati joyida tegishli tashkilotlar vakillari tomonidan hal etildi. Ayrim tizimli muammolar esa respublika darajasida koʻrib chiqilishi va tez orada ijobiy yechim topilishi taʼkidlandi.

Bunday ochiq muloqotlar mahalliy darajada muammolarni aniqlash, ularni hal qilish va tadbirkorlik muhitini yaxshilashda muhim ahamiyat kasb etadi. Ayniqsa, islohotlar bevosita hayotga tatbiq etilayotgan hozirgi sharoitda tadbirkorning ovozi eshitilishi, uning muammosiga eʼtibor qaratilishi ijtimoiy barqarorlik va iqtisodiy oʻsish garovidir.

Amudaryo tumanida tadbirkorlar bilan oʻtkazilgan ochiq muloqot Oʻzbekistonda tadbirkorlikni rivojlantirishga qaratilayotgan eʼtiborning yana bir yorqin dalilidir. Bu kabi uchrashuvlar tadbirkorlarning muammolarini bevosita tinglash, ularga amaliy yordam koʻrsatish va kelgusidagi faoliyatlari uchun zarur shart-sharoitlarni yaratishda muhim ahamiyat kasb etadi.

Muloqot davomida bildirilgan murojaatlarning tinglanib, muammolarning hal qilinishi va yirik loyihalarning amalga oshirilishi tuman iqtisodiyotining oʻsishiga, yangi ish oʻrinlarining yaratilishiga va aholi farovonligining yanada oshishiga xizmat qiladi. Zero, tadbirkorni qoʻllab-quvvatlash – bu jamiyatni qoʻllab-quvvatlashdir.

Charos Arslonova, tuman hokimligining Axborot xizmati rahbari.