“Biz korruptsiyaga qarshimiz!” nomli grant loyihasi doirasida Qilichboy OFYda davra suhbati tashkil etildi

Korruptsiyaga qarshi kurashish — faqat davlat idoralarining emas, balki butun jamiyatning vazifasidir. Mamlakatimizda mazkur illatning oldini olish, aholi oʻrtasida huquqiy ong va huquqiy madaniyatni yuksaltirishga qaratilgan keng qamrovli chora-tadbirlar amalga oshirilmoqda.

Xususan, Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Biz korruptsiyaga qarshimiz!” nomli grant loyihasi doirasida “Taraqqiyot koʻzgusi” gazetasi tahririyati tashabbusi bilan joylarda maʼnaviy-maʼrifiy tadbirlar, davra suhbatlari tashkil etilmoqda.

Shu kabi tadbirlardan biri yaqinda Qilichboy ovul fuqarolar yigʻini maʼmuriy binosida boʻlib oʻtdi. Unda huquqshunoslar, jamoatchilik faollari va mahalliy aholi vakillari ishtirokida jamiyatda korruptsiyaga nisbatan huquqiy immunitetni shakllantirish masalalari muhokama qilindi.

Tadbirda Xalq deputatlari tuman Kengashi deputati Xonimjon Rajabova, “Madad” nodavlat notijorat tashkiloti Amudaryo tumani huquqiy maslahat byurosi bosh mutaxassisi Davron Pirmonov, Qilichboy OFY raisining Nuroniylar masalalari boʻyicha maslahatchisi Amina Yusupova, “Taraqqiyot koʻzgusi” gazetasi maxsus muxbiri Robiya Yoʻldosheva, loyiha koordinatorlari, mahalliy aholi vakillari hamda yoshlar ishtirok etdi.

Uchrashuv avvalida loyiha koordinatorlaridan biri, jurnalist Shohzod Qurbonboyev “Biz korruptsiyaga qarshimiz!” loyihasining maqsad va vazifalari, kutilayotgan natijalari, aholi ongida korruptsiyaga nisbatan murosasiz munosabatni shakllantirishga qaratilgan yondashuvlar haqida ishtirokchilarga batafsil maʼlumot berdi.

Shundan soʻng “Taraqqiyot koʻzgusi” gazetasi maxsus muxbiri Robiya Yoʻldosheva soʻzga chiqib, korruptsiyaning tarixiy ildizlari, ijtimoiy-iqtisodiy oqibatlari, manfaatlar toʻqnashuvi, urugʻ-aymoqchilik, firibgarlik va poraxoʻrlik kabi illatlarning kelib chiqish sabablari toʻgʻrisida hayotiy misollar orqali keng tushuncha berdi. Shuningdek, korruptsiyaga qarshi kurashishning eng samarali yoʻli — jamiyat aʼzolari ongida huquqiy immunitetni shakllantirish lozimligi alohida taʼkidlandi.

Muloqot davomida “Madad” nodavlat notijorat tashkiloti Amudaryo tumani huquqiy maslahat byurosi bosh mutaxassisi Davron Pirmonov soʻzga chiqib, soʻnggi yillarda mamlakatimizda korruptsiyaning oldini olish va unga qarshi kurashish boʻyicha amalga oshirilayotgan islohotlar, xususan, davlat va jamiyat qurilishida korruptsiyaviy omillarga chek qoʻyish, byurokratik toʻsiqlarni bartaraf etish, “yashirin iqtisodiyot”ni qisqartirish boʻyicha amalga oshirilayotgan ishlar yuzasidan atroflicha maʼlumot berdi.

Shuningdek, “Korruptsiyaga qarshi kurashish toʻgʻrisida”gi va “Manfaatlar toʻqnashuvi toʻgʻrisida”gi Qonunlar qabul qilinib, bu borada davlat siyosati yoʻnalishlari aniq belgilab olinganini taʼkidlab,  tadbir ishtirokchilariga korruptsiya bilan bogʻliq huquqbuzarliklar, poraxoʻrlik va manfaatlar toʻqnashuvining huquqiy tavsifi hamda ularning oldini olish boʻyicha amaliy choralar haqida tushunchalar berildi.

Bundan tashqari, “Madad” nodavlat notijorat tashkiloti Amudaryo tumani huquqiy maslahat byurosi faoliyati va aholiga koʻrsatiladigan xizmatlar xususida ham ishtirokchilarga atroflicha maʼlumot taqdim etildi.

Uchrashuv davomida soʻzga chiqqan Xalq deputatlari tuman Kengashi deputati Xonimjon Rajabova korruptsiya jamiyat hayotidagi eng xatarli illatlardan biri ekanini taʼkidlar ekan, uning ijtimoiy-iqtisodiy oqibatlari mamlakat taraqqiyoti va xalq farovonligiga jiddiy salbiy taʼsir koʻrsatayotganini alohida qayd etdi.

Korruptsiya davlat organlariga nisbatan ishonchni susaytirib, jamiyatda adolat mezonlarining buzilishiga, imkoniyatlar tengsizligining yuzaga kelishiga, eng asosiysi esa fuqarolarda beqarorlik tuygʻularining kuchayishiga sabab boʻladi. Shuningdek, har qanday holatda ham jinoyat jazosiz qolmasligi, javobgarlikning muqarrarligi taʼkidlandi.

Tadbir yakunida Qilichboy OFY raisining Nuroniylar masalalari boʻyicha maslahatchisi Amina Yusupova va boshqalar soʻzga chiqib, shunday muhim va dolzarb mavzu yuzasidan oʻtkazilgan uchrashuv uchun tadbir tashkilotchilariga samimiy minnatdorlik bildirdi. Shuningdek, bu kabi targʻibot tadbirlarini muntazam oʻtkazish orqali aholining huquqiy ongi va fuqarolik masʼuliyatini oshirish, davlat xizmatchilari faoliyatining ochiq va shaffofligi taʼminlanishi taʼkidlandi.

Korruptsiyaga qarshi kurashda jamoatchilik nazorati, huquqiy ong va fuqarolik masʼuliyatini oshirish hal qiluvchi ahamiyatga ega. Shu bois, bunday maʼnaviy-maʼrifiy tadbirlar nafaqat huquqbuzarliklarning oldini olish, balki jamiyatda halollik, adolat va qonuniylik tamoyillarini qaror toptirishda muhim ahamiyat kasb etadi.

Shohzod Qurbonboyev, loyiha koordinatori.