Orzular ortidan – Janubiy Koreya sari

Bugungi yoshlarning orzulari ulkan, maqsadlari aniq. Ular orzular sari dadil intilmoqda, dunyoni zabt etish yoʻlida tinimsiz oʻqib izlanmoqda. Mavjuda ham ana shunday yoshlardan biri sanaladi. U hozirda Janubiy Koreyaning nufuzli Sejong universitetida iqtisodiyot yoʻnalishida tahsil olmoqda.

Mavjuda oʻzining bilimga chanqoqligi, tirishqoqligi va qatʼiyati bilan doʻstlari orasida ajralib turadi. Maktabda oʻqib yurgan paytlaridayoq matematika va ingliz tilini oʻrganadi. IELTS imtihonini muvaffaqiyatli topshirgani unga xorijda tahsil olishga imkon berdi.

Bugungi kunda u Janubiy Koreyadagi talabalar qatori bilim olib, oʻz ustida yanada koʻproq ishlamoqda. Yangi muhit, yangi madaniyat va tilga tezda moslashgan Mavjuda oʻz hayotini oʻzi mustaqil boshqarishni oʻrganmoqda. Bu esa unga yanada kuch, ishonch va tajriba baxsh etmoqda.

Albatta, bu yutuqlarning ortida faqatgina oʻz mehnati emas, balki mehribon oilasining doimiy yordami, ishonchi va qoʻllab-quvvatlash ham muhim oʻrin tutadi. U har doim ota-onasining duosi va yordami bilan orzulari sari dadil intilmoqda.

Mavjuda kelajakda Janubiy Koreyadagi yirik va nufuzli korxonalardan birida faoliyat yuritishni niyat qilgan. U xalqaro tajriba orttirib, oʻz bilimi bilan nafaqat Oʻzbekiston yoshlari hayotiga ham ijobiy oʻzgarishlar olib kirishni istaydi.

U tengdoshlariga shunday maslahat beradi:

- Hech qachon orzularingizdan voz kechmang. Oldingizga aniq maqsad qoʻying. Bilimga intiling, doim oʻz ustingizda ishlang, til oʻrganing. Til – bu imkoniyatlar kalitidir. Mehnat hech qachon besamar ketmaydi.

Haqiqatan ham Mavjudaning hayoti – yoshlar uchun ibrat, orzular sari yoʻl esa faqat harakat bilan qisqaradi. Mavjuda – bugungi yoshlar uchun tirishqoqlik, bilimga intilish va orzular sari dadil yurishning yorqin timsolidir. U oʻz mehnati, sabr-toqati va qatʼiyati bilan nafaqat shaxsiy yutuqlarga erishmoqda, balki oʻz tengdoshlariga ham namuna boʻlayotgan yoshlardan biridir.

Orzulari yoʻlida intilgan inson yoʻl topadi, harakat qilgan inson esa maqsadiga erishadi. Shunday iqtidorli, orzulari ulkan va mehnatkash yoshlar bor ekan, Oʻzbekiston kelajagi porloq boʻlishiga shubha yoq.

Shahlo Yangiboyeva, Qoraqalpoq davlat universiteti talabasi.