“QIShLOQ JOYLARNI BARQAROR RIVOJLANTIRISh” LOYIHASI DOIRASIDA UMUMTAʼLIM MAKTABLARINING BINOLARI REKONSTRUKTsIYa QILINMOQDA

Mamlakatimizda oʻsib kelayotgan yosh avlod taʼlim-tarbiyasini zamon talablari darajasida tashkil etish maqsadida amalga oshirilayotgan islohotlar soʻnggi yillarda sohada jiddiy oʻzgarishlarga erishish imkonini berdi. Ayniqsa, umumtaʼlim maktablarining moddiy-texnik bazasi tubdan yangilanib, zamonaviy kompyuter texnologiyalari bilan taʼminlanish darajasi oshdi, eng olis hududlardagi maktablarning oʻquvchilari ham toʻliq internet tarmogʻiga ulangan kompyuter sinf xonalarida taʼlim-tarbiya olish, axborot-kommunikatsiya vositalaridan samarali foydalanish imkoniga ega boʻldilar. Davlatimizning beqiyos gʻamxoʻrligi tufayli bugungi oʻquvchi-yoshlar har tomonlama qulay sharoitlarda oʻqib, bilim olmoqdalar. Faqat soʻnggi 7-yil davomida mamlakatimizning turli hududlarida 5 mingdan ziyod zamonaviy qiyofadagi maktablar tashkil etildi. 2025-yilning oʻzida 608 ta maktabda qurilish-taʼmirlash ishlari olib borildi va bu kabi sohani modernizatsiya qilishga qaratilgan chora-tadbirlar 2025-2026 oʻquv yilida ham izchillik bilan davom ettirilmoqda. Xususan, 2025-2026 oʻquv yilida mamlakatimizda 100 dan ziyod maktablar tashkil etilib, 257 ming oʻquvchi oʻrnini ochish, xorijiy tilli maktablar sonini 420 taga, oʻquvchi-yoshlarni kasb-hunarga yoʻnaltirishga qaratilgan taʼlim muassasalarini 400 taga yetkazish koʻzda tutilgan.

Oʻzbekiston Respublikasi Prezidentining 2024-yil 24-dekabrdagi “2025-2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi Qaroriga koʻra, Investitsiya dasturi doirasida “Oʻzbekiston—2030” strategiyasida belgilab berilgan vazifalarni hayotga tatbiq etish, ayniqsa, 2025-yildan boshlab har yili umumtaʼlim maktablarining sanitariya-gigiyenik infratuzilmasini yaxshilash uchun kamida 100 mlrd soʻm ajratib borish amaliyoti joriy etilib, “Ochiq byudjet” axborot portali orqali jamoat fikri va aholi istaklari asosida taʼmirtalab holatdagi va olis hududlarda joylashgan maktablarni taʼmirlash va rekonstruktsiya qilish  belgilangan edi. Ushbu vazifalarni  amalga oshirish maqsadida Amudaryo tumanida ham keng qamrovli ishlar amalga oshirilmoqda. Maktabgacha va maktab taʼlimi boʻlimi tasarrufidagi taʼmirtalab, bugungi kundagi quvvati, moddiy-texnik imkoniyatlari talab darajasida boʻlmagan umumtaʼlim maktablarining infratuzilmasini yaxshilashga qaratilgan  qurish va rekonstruktsiya ishlari  olib borilmoqda.

Ayni paytda Amudaryo tuman Maktabgacha va maktab taʼlimi boʻlimi tasarrufida  umumiy quvvati  33 ming 135-oʻringa ega 86 ta maktab va 1 ta “Barkamol avlod” bolalar markazi mavjud. Ularda jami 38 ming 769 nafar oʻquvchi-yoshlar taʼlim-tarbiya olishmoqda. Davlatimizning beqiyos gʻamxoʻrligi natijasida tumanning eng chekka hududlaridagi maktablar ham internet tarmogʻiga ulanib,  yosh avlodning har tomonlama mukammal bilim olishlari uchun zarur shart-sharoitlar yaratilgan. Choykoʻl ovulidagi 59-sonli umumtaʼlim  maktabi yaqin-yaqinlargacha hududdagi 22-sonli maktab filiali sifatida faoliyat olib boruvchi, sharoitlari haminqadar darajadagi taʼlim-tarbiya muassasasi edi. Moslashtirilgan binoda joylashgan mazkur maktab aholi sonining oʻsib borishi, qolaversa, boshlangʻich taʼlimdan soʻng hudud yoshlarining ovul markazidagi 22-sonli maktabga qatnab oʻqishida   qiyinchiliklar yuzaga kelayotgani inobatga olinib, muassasa 59-sonli umumtaʼlim maktabiga aylantirildi. Albatta, bu bilan muammo hal boʻlmadi, qishda sovuq va zax tortgan tor, yozda issiq va dim sinfxonalarda oʻqish nafaqat oʻquvchilar, balki oʻqituvchilar uchun ham emin-erkin mashgʻulotlarni oʻtkazish imkoni kam edi.

Ayni kunlarda Investitsiya dasturi doirasida 59-sonli maktab uchun 180-oʻrinli yangi bino, 12x24 oʻlchamdagi zamonaviy sport zali qurilishi jadal surʼatlarda olib borilmoqda. Tender bahosi 4 mlrd 500 mln soʻmga yaqin boʻlgan mazkur bunyodkorlik ishlari “Amudaryo xizmat koʻrsatish” MChJ quruvchilari tomonidan sifatli amalga oshirilmoqda.

Shuningdek, Boʻz yop ovulida joylashgan 68-sonli maktabda “Qizketken maxsus  qurilish” MChJ quruvchilari tomonidan umumiy qiymati 10 mlrd. 400 mln soʻmga yaqin boʻlgan jami 510-oʻrinli oʻquv binosi, 12x24 oʻlchamdagi 2 ta sport zali qurilishi jadal surʼatlarda olib borilmoqda.

Qurilish ishlarining oʻz muddatida va sifatli amalga oshirilishi tuman prokuraturasi tomonidan doimiy nazoratga olingan. Bu esa loyiha asosida belgilangan vazifalarning oʻz vaqtida, shaffof va samarali bajarilishiga xizmat qilmoqda.

“Qishloq joylarni barqaror rivojlantirish” loyihasi doirasida amalga oshirilayotgan bu kabi bunyodkorlik ishlari nafaqat hududlar infratuzilmasi bilan bogʻliq muammolarni ijobiy hal etish, balki oʻsib kelayotgan yosh avlod taʼlim-tarbiyasi bilan bogʻliq umummilliy ahamiyatga  molik ishlarni jahon andozalari darajasiga  koʻtarish imkonini beradi.

ROBIYa YOʻLDOShEVA.