“Adolat” SDP Qoraqalpogʻiston Respublikasi Kengashi tomonidan “Odam savdosiga qarshi kurashish oyligi” doirasida tadbir oʻtkazildi

Oʻzbekiston “Adolat” sotsial-demokratik partiyasi tomonidan iyul oyi “Odam savdosiga qarshi kurashish oyligi” sifatida belgilangan. Shu munosabat bilan yurtimiz boʻylab keng qamrovli maʼnaviy-maʼrifiy tadbirlar, davra suhbatlari va uchrashuvlar tashkil etilmoqda.

Ana shunday tadbirlardan biri partiyaning Qoraqalpogʻiston Respublikasi Kengashi tashabbusi bilan Gulzor mahalla fuqarolar yigʻini maʼmuriy binosida oʻtkazildi. Unda “Adolat” SDP Qoraqalpogʻiston Respublikasi Kengashi raisi Nurlibay Qayipbergenov, tuman Adliya boʻlimi, Davlat xizmatlari markazi, mahalladagi "yettilik" aʼzolari va partiyaning tuman Kengashi masʼullari ishtirok etdi.

Tadbirda soʻzga chiqqan masʼullar tomonidan, partiyaning ushbu yoʻnalishdagi faoliyati hamda odam savdosiga qarshi kurashda jamoatchilikning oʻrni xususida atroflicha toʻxtalib oʻtildi.

Aytish joizki, XXI asrda insoniyat uchun uch yoʻnalishdagi transmilliy tashkiliy jinoyatchilik – terrorizm, narkobiznes va odam savdosi eng katta tahdidlardan biri boʻlib qolmoqda. Xalqaro terrorizm va diniy niqob ortidagi zoʻravonlik harakatlari, giyohvand moddalar savdosi bilan bogʻliq jinoyatlar qatorida odam savdosi ham jahon hamjamiyati uchun dolzarb muammoga aylangan.

Odam savdosi — bu inson shaʼni, qadr-qimmati va erkini inkor etuvchi, insonni mol-mulk sifatida koʻradigan jinoiy faoliyat turidir. Bu jinoyat odatda shaxsni aldash, zoʻrlik ishlatish, tahdid qilish, ogʻir holatdan foydalanish yoki moddiy manfaat evaziga shaxs ustidan nazorat oʻrnatish kabi usullar orqali amalga oshiriladi. Shu tariqa insonlarni tashish, yashirish, boshqalarga topshirish yoki qabul qilish holatlari roʻy beradi.

Mazkur jarayonlar oqibatida fuqarolar majburiy mehnatga jalb etiladi, fohishalikka majburlanadi, ularning xizmatidan zoʻravonlik asosida foydalaniladi, hattoki baʼzi hollarda inson aʼzolari noqonuniy ravishda olinadi. Odam savdosining eng dahshatli jihati — inson huquqlarini toʻliq inkor qilish va tovar sifatida muomalaga kiritishdir.

Afsuski, bu jinoyat turidan jabrlanuvchilar orasida ayollar, bolalar va nochor ahvoldagi shaxslar soni yuqori. Maʼlumotlarga koʻra, har yili dunyo boʻyicha taxminan 2 million 700 ming kishi odam savdosining qurboniga aylanmoqda. Jahon miqyosida bunday jinoyatlardan tushayotgan yillik noqonuniy daromad hajmi 7 milliard AQSh dollaridan oshib ketgan. Achinarli jihati shundaki, jabrlanuvchilarning 80 foizini ayollar va bolalar tashkil etadi. Har yili 600–800 ming ayollar va bolalar aldov yoʻli bilan boshqa mamlakatlarga olib ketilib, turli maqsadlarda sotib yuborilayotgani maʼlum qilingan.

Mamlakatimizda odam savdosining oldini olish, unga qarshi kurashish, jabrlanuvchilarni himoya qilish va reabilitatsiya qilishga qaratilgan huquqiy va institutsional mexanizmlar yaratilgan. Shu jumladan, tegishli davlat organlari va fuqarolik jamiyati institutlari oʻrtasida hamkorlik asosida targʻibot ishlari olib borilmoqda. Bu jarayonda partiyalar, ayniqsa, “Adolat” SDP kabi siyosiy kuchlarning faol ishtiroki muhim ahamiyat kasb etyapti.

Tadbir ishtirokchilari tomonidan ushbu tahlikali jinoyat haqida toʻliq maʼlumotga ega boʻlish, shaxsiy huquqlarni bilish va zarurat tugʻilganda tegishli huquqni muhofaza qiluvchi organlarga murojaat etish muhimligi taʼkidlandi. Shuningdek, odam savdosiga qarshi kurash faqat davlat yoki mutasaddi idoralar emas, balki har bir fuqaroning shaxsiy masʼuliyati ekaniga alohida eʼtibor qaratildi.

Tadbir yakunida “Adolat” SDP Qoraqalpogʻiston Respublikasi Kengashi tomonidan partiyaning faol aʼzolari “Tashakkurnoma” bilan taqdirlandi.

Shohzod Qurbonboyev tayyorladi.