Qoraqalpogʻiston qishloq xoʻjaligi va agrotexnologiyalar institutida “Zakovat – rektor kubogi” intellektual oʻyini boʻlib oʻtdi

Prezidentimiz tashabbusi bilan amalga oshirilayotgan “Dolzarb 90 kun” loyihasi doirasida Qoraqalpogʻiston qishloq xoʻjaligi va agrotexnologiyalar institutida talabalarning bilim va intellektual salohiyatini namoyon etishga qaratilgan “Zakovat – rektor kubogi” intellektual oʻyini tashkil etildi.

Bellashuv yoshlarda mantiqiy va erkin fikrlash koʻnikmalarini rivojlantirish, shuningdek, doʻstlik va hamjihatlik muhitini mustahkamlashi bilan muhim ahamiyat kasb etdi. Intellektual oʻyinda institutning 12 ta jamoasi faol ishtirok etdi.

Talabalar turli fanlar, tarixiy voqealar, maʼnaviyat va zamonaviy bilimlar asosida tayyorlangan savollarga javob berish orqali oʻz bilimi va tafakkur salohiyatini namoyon etdilar. Bellashuv davomida ishtirokchilar nafaqat zehniyatni ishga solish, balki jamoaviy ishlash, tezkor fikr yuritish va oqilona qaror qabul qilish koʻnikmalarini ham mustahkamladilar.

Musobaqa yakunlariga koʻra, “Liderlar” jamoasi 1-oʻringa munosib deb topildi, “Intellekt” jamoasi 2-oʻrin bilan taqdirlandi, “Olimp” jamoasi esa 3-oʻrinni qoʻlga kiritdi.
Gʻoliblarni taqdirlash marosimida institut rektori B.Jollibekov soʻzga chiqib, barcha ishtirokchilarga minnatdorlik bildirdi va gʻolib jamoalarni samimiy tabriklab, ularga kelgusi taʼlim va hayot yoʻlida muvaffaqiyatlar tiladi.

Ushbu bellashuv yoshlar oʻrtasida intellektual oʻyinlarga qiziqishni oshirish va boʻsh vaqtini mazmunli tashkil etishga xizmat qildi.
Taʼkidlash joizki, “Dolzarb 90 kun” loyihasi doirasida amalga oshirilayotgan bunday tashabbuslar talabalarning dunyoqarashini kengaytirish va yosh avlodning ijtimoiy faolligini yuksaltirishda muhim oʻrin tutayapti.

Shohzod Qurbonboyev tayyorladi.