Bola kulgusidan yasharsin olam!

"...Bu yorugʻ dunyoda hayot bor ekan, oila bor. Oila bor ekan, farzand deb atalmish bebaho neʼmat bor. Farzand bor ekan, odamzot hamisha ezgu orzu va intilishlar bilan yashaydi”, deya yozgan edi Yurtboshimiz I.Karimov "Yuksak maʼnaviyat – yengilmas kuch” asarida.

Ha dunyodagi eng bolajon xalq boʻlgan bizning xalqimiz faqat bolam, deb yashaydi. Bor jamiki shodlikni, yaxshilikni bolasiga atab yashaydi.

Xalqimizning kelgusi avlodlarga umid va ishonchi davlatimiz siyosatida ham oʻz aksini topmoqda. Mustaqillik yillarida qabul qilingan ona va bolaning salomatligini muhofaza qilishga, yoshlarning har jihatdan yetuk insonlar boʻlib voyaga yetishini taʼminlashga xizmat qiluvchi qator qonuniy hujjatlar qabul qilinib, turmushga tadbiq etilmoqda va oʻzining ijobiy samaralarini bermoqda. Buni Oʻzbekistonning onalik va bolalikni muhofaza qilish borasida amalga oshirayotgan Dasturlarini YuNISEF xalqaro tashkilotining Sharqiy Yevropa, Boltiqboʻyi va Mustaqil Davlatlar Hamdoʻstligi mamlakatlari boʻyicha ofisi tomonidan mintaqadagi namunaviy model sifatida eʼtirof etganidan ham koʻrish mumkin.

Davlatimiz, ota-onalari gʻamxoʻrligida baxtiyor va shodon yashayotgan bolajonlarimiz uchun 1-iyun – Xalqaro bolalarni himoya qilish kuni bayrami alohida shodliklarga, ajoyib taassurotlarga boy kun boʻldi.

Mangʻit shahridagi aholi dam olish va istirohat bogʻi shu kuni ertalabdan bolajonlar bilan gavjum boʻldi. Mazkur maskandagi turli attraktsion oʻyinlar bolalarga xizmat qildi.

Mangʻit shahrida faoliyat yuritayotgan maktabgacha taʼlim muassasalari tarbiyalanuvchilari orasida asfaltga rasm chizish, "Sogʻlomjon - polvonjon” sport musobaqalarining borishini nafaqat bolalar, hatto ota-onalar ham qiziqib tomosha qildilar.

"Fayz” toʻyxonasida tuman Madaniyat va sport ishlari boʻlimi tomonidan bayram munosabati bilan tayyorlangan maktabgacha tarbiya muassasalari tarbiyalanuvchilari va umumtaʼlim maktablarining boshlangʻich sinf oʻquvchilari ishtirokidagi kontsert dasturi namoyish etildi.

Yigʻilganlarni tuman hokimi muovini, Xotin-qizlar qoʻmitasi raisi M.Ahmedova bayram bilan qizgʻin tabriklab, asfaltga rasm chizish, "Sogʻlomjon - polvonjon” sport musobaqalari gʻoliblariga sovgʻalar topshirdi.

Bayram munosabati bilan tayyorlangan kontsert dasturida baxtiyor bolalikni, ona Vatanni ulugʻlovchi kuy-qoʻshiqlar yangradi, raqslar ijro etildi, tsirk tomoshalari namoyish etildi.

1-iyun – Xalqaro bolalarni himoya qilish kuni munosabati bilan tashkillashtirilgan barcha tomoshalar bolajonlarning qalbida oʻchmas taassurotlar qoldirdi.

Oygul RAJABOVA.