Xalqaro oila kuni munosabati bilan harbiy qismda tadbir oʻtkazildi

Har yili 15-may kuni dunyo boʻylab Xalqaro oila kuni keng nishonlanadi. Mazkur sana insoniyat uchun oilaning beqiyos ahamiyatini yana bir bor eslatadi. Zero, oila jamiyatning asosiy poydevori sifatida inson tarbiyasi, sogʻlom avlodni voyaga yetkazish va barqaror kelajakni taʼminlashda muhim oʻrin tutadi.

Shu munosabat bilan yaqinda Amudaryo tumanidagi Davlat xavfsizlik xizmati Chegara qoʻshinlariga qarashli harbiy qismlardan birida “Sogʻlom oila – sogʻlom jamiyat poydevori” shiori ostida tadbir tashkil etildi.

Unda turli sohalar vakillari – Strategik rivojlanish instituti filiali assistenti Sabira Tangatorova, tuman oilaviy poliklinikasi shifokori, pediatr Dilbar Allamberganova, 36-sonli umumtaʼlim maktabi psixologlari Goʻzal Jarliqapova hamda Shohista Abdullayeva, shuningdek, harbiy xizmatchi Mirjahon Majidov va harbiy xizmatchilarning oila aʼzolari faol ishtirok etdilar.

Maʼruzachilar tomonidan oilada sogʻlom muhitni shakllantirish, farzand tarbiyasida ota-ona masʼuliyati, bola ruhiyatini toʻgʻri anglash hamda ota-ona va farzand oʻrtasida samarali muloqot oʻrnatishning ahamiyati haqida atroflicha maʼlumotlar berildi. Xususan, oilada mehr-oqibat, oʻzaro ishonch va eʼtibor tuygʻularini mustahkamlash, bolalarning yosh davriga mos ravishda tarbiya usullarini qoʻllash zarurligi taʼkidlandi.

Shuningdek, tadbir davomida oilaviy ovqatlanish madaniyati, sogʻlom ovqatlanish tarzi, mavsumiy yuqumli kasalliklarning oldini olish, farzandlar immunitetini mustahkamlash borasida shifokorlar tomonidan foydali maslahatlar berildi.

Taʼkidlash joizki, harbiy xizmatchilarning oilalari bilan bunday tarbiyaviy-maʼrifiy uchrashuvlar oʻtkazilishi nafaqat oilalarning maʼnaviy mustahkamligiga, balki ularning jismoniy va psixologik barqarorligiga ham ijobiy taʼsir koʻrsatadi.

Sevinch Oʻmirboyeva, Oʻzbekiston jahon tillari universiteti talabasi,tahririyat amaliyotchisi.