Amudaryoda V Respublika kitobxonlik haftaligi yuqori saviyada oʻtdi

Mamlakatimizda maʼnaviyat, maʼrifat va mutolaa madaniyatini yuksaltirish, jamiyatda kitobga boʻlgan qiziqishni oshirishga qaratilgan tashabbuslar tobora keng koʻlam kasb etmoqda. Ana shunday maʼnaviy targʻibotning yorqin ifodasi boʻlgan “Kitobxonlik haftaligi” joriy yilning 21–27-aprel kunlari mamlakatimiz boʻylab “Oʻzbekiston – kitobxonlar yurti” shiori ostida yuqori ruhda oʻtkazildi.

Kitobxonlikni targʻib qilish, kitobga mehr uygʻotish, aholi, ayniqsa, yoshlarni mutolaaga keng jalb etish maqsadida tashkil etilgan mazkur haftalik davomida mamlakat boʻylab keng qamrovli madaniy-maʼrifiy tadbirlar tashkil etildi. Ular orasida yangi kitoblar taqdimoti, kitob yarmarkalari, aktsiya va viktorinalar, mahorat darslari, ijodkorlar bilan uchrashuvlar, “Noshirdan kitobxonga” tamoyili asosidagi savdo-yarmarkalar kabi tadbirlar alohida oʻrin tutdi. Bunday tadbirlar orqali kitobxonlar zamonaviy adabiyot, nashriyot faoliyati hamda ijodkorlar hayoti bilan yaqindan tanishish imkoniyatiga ega boʻlishdi.

Haftalik doirasida keyingi yillarda nashr etilgan kitoblar taqdimoti, taniqli va yosh adiblar bilan muloqot, nashriyot va matbaachilik sohasi vakillari ishtirokida davra suhbatlari oʻtkazilib, umumiy dasturning mazmundor va manfaatli boʻlishiga xizmat qildi.

Ayni shu kunlarda Amudaryo tumani Axborot-kutubxona markazida tumanimizning ijodkorlaridan biri, shoira Zulfiya Ollayorova bilan uchrashuv tashkil etildi. Tadbirda ziyolilar, Amudaryo muhandislik texnikumi talabalari hamda umumtaʼlim maktablaridan tashrif buyurgan kitobxon oʻquvchi-yoshlar faol ishtirok etdi. Uchrashuvda kitobning inson maʼnaviyatini yuksaltirishdagi oʻrni, hayotda mustahkam tayanch sifatidagi ahamiyati xususida fikrlar bildirildi.

Shu kuni, shuningdek, Oʻzbekiston xalq shoiri Muhammad Yusuf tavallud kuni munosabati bilan “Sheʼrlarida Vatan tasviri” nomli kitob koʻrgazmasi ham tashkil etildi. Shoir ijodi keng targʻib qilingan mazkur koʻrgazma kitobxonlarda milliy gʻurur, vatanparvarlik tuygʻularini uygʻotdi.

Kitobxonlik haftaligi doirasida “Yaxshi kitoblarni bugun oʻqing” shiori ostida “Manzilimiz – maʼnaviyat bekati” deb nomlangan intellektual oʻyin oʻtkazildi. Tuman IIBning “Yuristlar”, Amudaryo muhandislik texnikumi talabalaridan tuzilgan “Zukkolar” hamda yosh kitobxonlardan tashkil topgan “Kitobxonlar” jamoalari oʻrtasida boʻlib oʻtgan mazkur bellashuvda ishtirokchilar kitobga oid bilim va fikrlash qobiliyatida oʻzaro kuch sinashishdi. Gʻoliblar axborot-kutubxona markazi tomonidan esdalik sovgʻalar bilan taqdirlandi.

Bundan tashqari, “Mahalla – oila – kutubxona”, “Maʼrifatparvar ayollar”, “Bugungi yoshlar va ijod: adabiyotga qanchalar yaqinmiz?” kabi davra suhbatlari, “Adabiy ustaxona” mahorat darslari, “Tabiat qoʻynida mutolaa – kitobterapiya” singari treninglar hamda “Yashil makon” loyihasi doirasida kitob va atrof-muhit munosabatiga bagʻishlangan maʼrifiy chiqishlar ham tashkil etildi.

Kitobxonlik haftaligi doirasida faol ishtirok etgan kitobxonlar, yosh mutaxassislar, talabalar hamda tadbir tashkilotchilari axborot-kutubxona markazi maʼmuriyati tomonidan esdalik sovgʻalar va tashakkurnomalar bilan taqdirlandi.

Mazkur haftalik bolalar va yoshlarda kitobga qiziqish uygʻotish, ularning boʻsh vaqtini mazmunli oʻtkazish, ijodiy va tanqidiy fikrlash qobiliyatini shakllantirishda muhim ahamiyat kasb etdi. Eng muhimi, kitobni hayot tarziga aylantirish, kitobxonlar safini kengaytirishda bunday tadbirlar katta ahamiyatga ega. Zero, kitob bor joyda maʼrifat bor, maʼrifat bor joyda esa taraqqiyot va inson kamoloti sari yoʻl ochiqdir.

Sh. Ollaberganova, tuman axborot-kutubxona markazi mutaxassisi.