Otalar jasorati - bizning faxrimiz
Prezidentimiz Islom Karimov tashabbusi bilan 9-may – Xotira va qadrlash kuni mamlakatimizda umumxalq bayrami sifatida keng nishonlandi. Bayram arafasida Qoraqalpogʻiston Respublikasi va tumanimiz rahbariyatining urush va mehnat fronti faxriylari xonadonlariga tashrif buyurib, ularga pul mukofotlari va qimmatbaho sovgʻalar, "Ikkinchi jahon urushidagi Gʻalabaning 70 yilligi” esdalik yubiley medali topshirilishi faxriylarimizning davlatimiz va xalqimiz tomonidan qadrlanishini hamda eʼzozlanishini yana bir bor namoyish etdi.
Biz – yosh avlod vakillari ham bayram arafasida ushbu harakatda faol ishtirok etdik. Yosh yigit-qizlar oʻzlari yashab turgan hududlarda istiqomat qilayotgan faxriylarning holidan xabar olib, ularni bayram bilan tabriklashdi, sovgʻa-salomlar topshirishdi, hovlilarini tozalashga va boshqa yumushlariga yordamlashishdi.
Keksa faxriylar yoshlarning bunday izzat-hurmatidan, mehribonchiligidan benihoya minnatdor boʻldilar. Faxriy ota-xonlar va onaxonlar urush davrida xalqimiz boshidan kechirgan ogʻir kunlar haqida gapirishib, bugungi dorilomon zamonning qadriga yetish kerakligi haqida oʻz nasihatlarini berdilar.
Biz urush va mehnat faxriylari bilan uchrashib, ularning oʻtmish haqidagi hikoyalarini eshitganimizda bir narsani – urush davrida elimiz oʻgʻlonlarining mislsiz qahramonliklar koʻrsatganliklarini anglab yetdik.
Shu sababdan ham Yurtboshimiz 9-may kuni poytaxtimizdagi Xotira maydonida ommaviy axborot vositalari vakillari bilan suhbatida:
- Bugun hech kimga sir emas: million-millionlab odamlar halok boʻlishiga sabab boʻlgan, mislsiz yoʻqotishlar, talofat va musibatlar olib kelgan bu urush insoniyat tarixidagi eng dahshatli, eng qonli qirgʻin boʻlganini bu dunyoda hech kim unutmaydi. Va fashizm ustidan qozonilgan gʻalaba naqadar qimmatga tushganini yurtimizda yashayotgan har qaysi oila, har qaysi odam yana va yana bir bor anglashi, qalbidan oʻtkazishi tabiiydir, - dedilar.
Biz – yosh avlod Ikkinchi jahon urushida barcha xalqlar bilan birga boʻlib, fashizm balosi ustidan qozongan Gʻalabamizni, bu urushda xalqimiz koʻrsatgan matonat, mardlik va qahramonlik namunalarini aslo unutmaymiz, jang maydonlarida oʻzbek oʻgʻlonlarining nimaga qodir boʻlganini doimo gʻurur va iftixor bilan eslaymiz. Ularning mardligi va matonati oldida bir umr bosh egamiz.
Husan YOʻLDOShEV,
Amudaryo xizmat koʻrsatish va servis kasb-hunar kolleji "Kamolot” sardori.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
