QISQA SATRLARDA

Gimnastikachi qizlar bellashdi

Yaqinda Mangʻit iqtisodiyot kolleji sport zalida 9-may – Xotira va qadrlash kuni munosabati bilan 2003-2005-yillarda tugʻilgan qizlar orasida sportning badiiy gimnastika turi boʻyicha Bolalar va oʻsmirlar sport maktablarining ochiq birinchiligi musobaqalari oʻtkazildi.

Musobaqada 1-, 3-sonli BOʻSMlardagi va "Barkamol avlod” bolalar markazidagi badiiy gimnastika toʻgaraklarida tarbiyalanayotgan 35 nafardan ziyod qizlar qatnashdilar.

Musobaqada ular predmetli va predmetsiz chiqishlarni namoyish etishdi.

Gʻoliblarga "Kamolot” YoIHning Faxriy yorliqlari va ota-onalar homiyligida sovgʻalar topshirildi.

Grant mablagʻi monitoringi

Oʻtgan yili 36-sonli maktab rahbariyati "Yaponiya davlatining kichik hajmdagi ijtimoiy loyihalar uchun begʻaraz yordam” dasturida oʻzlarining loyihasi bilan qatnashib, 80517 AQSh dollari miqdoridagi grant sohibi boʻlgan edi.

Oʻtgan davr mobaynida ana shu mablagʻ asosida maktab binosi taʼmirlanib, tamoman yangi qiyofa kasb etdi. Bundan tashqari, maktabga oʻquv anjomlari, jihozlari, kutubxona uchun javonlar, sport inventarlari va oʻquvchilarni kasb-hunarga yoʻnaltirish maqsadida tashkil etilgan tikuvchilik toʻgaragi uchun yangi rusumdagi 15 ta tikuv mashinasi, kompyuterlar, duradgorlik toʻgaragi uchun asbob-anjomlar xarid qilindi.

Yaqinda Yaponiyaning mamlakatimizdagi elchixonasi xodimlari Mu Kan va Shin Ichi janoblari grant mablagʻining qay darajada sarflanganini monitoring qilish maqsadida maktabga tashrif buyurdilar va bajarilgan ishlardan mamnun boʻldilar.

Xotira turniri oʻtkazildi

9-may – Xotira va qadrlash kuni munosabati bilan 30-sonli maktabda sportning shaxmat turi boʻyicha Arslon Niyozov xotirasiga bagʻishlangan turnir boʻlib oʻtdi.

Arslon Niyozov 1938-yil 20-aprelda Xorazm viloyatining Mangʻit tumanida, xizmatchi oilasida tugʻildi. Hozirgi 1-sonli maktabni aʼlo baholarga bitirgach, 30-sonli maktabda bolalar yetakchisi va oʻqituvchi boʻlib ishladi. 1965-1970-yillarda Nukus Davlat pedagogika institutining rus tili va adabiyoti fakultetining sirtqi boʻlimida oʻqish barobarida 33-, 36-sonli maktablarda oʻquvchilarga rus tili va adabiyotidan saboq berdi. 1975-1980-yillarda 36-sonli maktabda direktor oʻrinbosari, 1980-1983-yillarda tuman Xalq taʼlimi boʻlimi uslubchisi, 1983-1985-yillarda 40-sonli maktab direktori, 1985-1998 yillarda tuman xalq taʼlimi boʻlimida kadrlar va maktablar nazoratchisi boʻlib ishladi. Keksalik nafaqasiga chiqqan talabchan va ishchan murabbiy 2013-yilda 75 yoshida olamdan oʻtdi.

Turnirda 50 yoshdan oshgan 14 nafar ishtirokchilar orasida qipchoqlik shifokor Rustam Xidirboyev, 50 yoshgacha boʻlgan ishtirokchilar orasida Xorazm viloyatidan Maxsud Sapayev birinchi oʻrinni egalladilar.

Shuningdek 20 yoshgacha boʻlgan ishtirokchilar orasida Xorazm viloyatidan Shahzod Abdusharipov, Taxiatosh shahridan Saparbek Yergʻaliyev, Xorazm viloyatidan Jasurbek Haytboyevlar, 16 yoshgacha boʻlgan ishtirokchilar orasida esa taxiatoshlik Mirzaahmad Umirboyev, Merdan Toʻrayev, mangʻitlik Saidbek Qadamboyevlar, qizlar orasida taxiatoshlik Mohim Orazmuhammedova, Selbi Kakishova, xorazmlik Malohat Hayitboyevalar gʻolib boʻldilar.

Xotira turnirining eng keksa ishtirokchisi - mangʻitlik 80 yoshlik Qodir Sultonmurodov, eng yosh ishtirokchisi esa nukuslik Guljamol Nurxoʻjayevalar boʻldilar.

Turnir gʻoliblariga, barcha ishtirokchilariga esdalik sovgʻalari topshirildi.

Oygul RAJABOVA.