Orol madaniyati sammiti doirasida Chilpiq tarixiy yodgorligida kontsert dasturi tashkil etildi

Orol madaniyati sammiti doirasida qadimiy Chilpiq tarixiy yodgorligida ilk bor betakror musiqa ohanglari yangradi. Ochiq osmon ostida oʻtkazilgan kontsert dasturi nafaqat xalqimiz, balki xalqaro jamoatchilik qalbidan ham munosib oʻrin oldi.

Mazkur tadbirlar Oʻzbekiston Respublikasi Prezidenti Shavkat Mirziyoyevning 2025-yil 28-mart kungi “Orol madaniyat sammitini yuqori saviyada oʻtkazish toʻgʻrisida”gi Qaroriga asosan tashkil etildi. Qarorda Orolboʻyi mintaqasida qulay tabiiy muhit yaratish, noyob madaniyat va tarixiy merosni asrash, xalqaro hamkorlikni kengaytirish maqsad qilingan. Shu bois, sammit har oʻn sakkiz oyda — bahor yoki kuzda doimiy ravishda oʻtkaziladigan yirik madaniy-ilmiy platformaga aylanishi koʻzda tutilgan.

6-aprel kuni boʻlib oʻtgan kontsert sanʼat va madaniyat xodimlari, yosh isteʼdod sohiblari tomonidan ijro etilgan kuy-qoʻshiqlar, mohir raqqosalarning chiqishlari bilan ishtirokchilarda katta taassurot qoldirdi. Musiqa, sheʼriyat va milliy raqslar uygʻunligi tomoshabinlarga xush kayfiyat ulashdi.

Tadbirda Qoraqalpogʻiston Respublikasi Joʻqorgʻi Kengesi Raisi Amanbay Orinbayev, tuman hokimi Sobir Xoʻjametov, hokim oʻrinbosarlari, nuroniylar, tumanimiz mehmonlari va mahalliy aholi ishtirok etdi. Tadbir mazmunan boy chiqishlar bilan davom etdi va yigʻilganlarga yana bir karra milliy faxr va ruhiy yuksalish baxsh etdi.

Kontsertda xalq artistlari, madaniyat xodimlari va tumanimiz sanʼatkorlari ijrosida milliy va zamonaviy estrada ohanglari yangradi. Ayniqsa, xorazmcha qoʻshiqlar kechaga oʻzgacha fayz bagʻishlab, sanʼat shinavandalarini joʻshqin raqslarga chorladi.

Orol madaniyati sammiti doirasida oʻtkazilayotgan tadbirlar mintaqaning noyob madaniy merosini tanitish, uni asrab-avaylash va kelajak avlodga yetib borishda muhim ahamiyat kasb etadi. Sammit faqat kontsertlar bilan cheklanmay, keng qamrovli ilmiy va amaliy loyihalarni ham oʻz ichiga oladi.

Jumladan, barqaror yechimlar va strategiyalar yaratishga qaratilgan taʼlim dasturi asosida Orol maktabi faoliyatini tashkil etish, zamonaviy texnologiyalar va anʼanaviy meʼmorchilik asosida “Istiqlol” madaniyat va istirohat bogʻi, bogʻ hududida joylashgan bolalar kutubxonasini qayta barpo etish, xalqaro tadqiqotlar va fanlararo hamkorlikni kuchaytirish kabi yoʻnalishlar belgilab olingan.

Chilpiq qoʻrgʻonida yangragan musiqa oʻtmish, bugun va kelajakni bogʻlovchi madaniy rishtalarni yaratdi. Xalqlar va millatlar oʻrtasidagi madaniy koʻprikka aylangan kontsert simfonik musiqa, Sharq sheʼriyati va xalqona ohanglarning mukammal uygʻunligini namoyon qildi. Qadimiy Chilpiq qoʻrgʻonida yangragan ohanglar Orolboʻyining ruhiy tiklanishi, madaniy qaytadan yuksalishi va global hamjihatlik sari tashlangan muhim qadamga aylandi.

Shohzod Qurbonboyev.